Na thukupna naita hi, na lungkim mahhiam? ~ Dong Mung

Na thukupna naita hi, na lungkim mahhiam? ~ Dong Mung

Tukum 2018 adingin i laibu gelh a zo kuan ihi ta-a, a tawpna lam a tung ihi ta hi.

2018 laibupi sungah khenpi 12 om-a, tua sungah khenpi 10-na ciang a zokhin ihi ta hi. Hih i zawhsa KHENPI 10-na ciangciang bangci i lungkim lel hiam? I gelhnop thu le late i gelhkhia thei hiam? Khasiat muisiatna le thangpaihna bek tawh kidim laigual bekbek i gelh kha hiam? Kisikna le dahna tawh kidim laigualte i gelh kha hiam?

Ei a gelhte mahmah in i thangah hiam? A sim ding bang hileng i thangah zo taktak diam?

Sanggam aw, tukum 2018 adingin tu-in kha 10 bang hong bei hiziau hi. Tu-a abeisa kha 10 sung i nuntakna i lungngaih kik ciangin ei le ei zong thangah zolo, lungkim zolo, i gel bangin piangkhia khollo, dahna, bangmatna, lungkham sinkhamna bekbek in hong tuam, ci-in na lungkim zo kei lua kha hiam?

Ngaihsun kik mah dih ve! Na lungkham ni sangin na lungdam ni tamzaw a, na lawhsap ni sangnin na lawhcin ni tamzaw veve hi. Na dah ni sangin na nuam ni tamzaw a, na guallelh ni sangin na gualzawh ni tamzaw veve hi. Hiciang na tun’ theih nadingin Pasian hong angvanna hang bek mah hilo ahi hiam?

I lungsim gelna bangin hong tangtun’ pah ziahziah loh hangin i gelna sangin a hoihzaw, a phazaw in Pasian in hong kalsuanpih veve hilo ahi hiam?

A beisa kha 10 sunga i gelhsa KHENPI 10-te i thangah zawh keileh…Lungngai phadih ni.

• 1). Ei gelkhialhna hangin i supna zong om ding…
• 2). Ei kidoplohna hangin i thuak haksatna zong om ding…
• 3). Ei pilvang loh manin i tuah buaina zong om ding…
• 4). Ei ginatloh manin i tungah hong piang siatna zong om ding….

Tua ahih manin a beisate i puahphat kik theih nawnloh hangin, tua a beisa hunte tungtawn in pilna, ciimna, picinna in nei-a, a om lai KHENPI 2-te i lungkim bang lian, i thangah bang lian in gelhkhiat sawm ni…

Tu-a kipan in hanciam thasan in kalsuan peuhleng i thukhupna hong zaknop mahmah dinga, ei mahmah zong i lungkim in, Pasian min zong hong thang semsem ding hi.

Takheh… Thasan in laimai thakte ah thu laigil le thu manphate gelhkhia ta ni… Lungdam, Dong Mung