Hurricane Maria huihpi in anawk khitzawh Puerto Rico ah Phone Signal hamsa mahmah
Nungsungteng Hurricane Maria kici huihpi in Caribbean Island sung aom Puerto Rico leh US Virgin Islands te nawkgawp ahih manin mipi te cimawh mahmah uhhi. Hurrican Maria in anawkzawh Phone Line leh Internet Wireless cihtezong siacip ahih manin, ki thuzakna khaktancip hi.
Electric Power tezong kisiacip in lampi te kikhakcip sawnsawn ahih manin, acimawh tampitak om uhhi. Tua tuikulh tungah ateeng pawlkhat tepen khatlekhat nangawn kithuzak nading hatsa mahmah hi.
US gamsung New York leh Florida khuapi sungte ahzong Puerto Rican population tammahmah a, ameltheih atanau te uh atuahsia tampi om himahleh kithuzakna avekin kitatcip ahih manin, kuamah hamsatzia kitheihpih khalo uhhi.
Wireless Carriers te’n ahunlap in puahzolo ahih manin khuasung mipi te’n Mobile Phone tawh vakkawikawi uh a, Signal aki ngahna aomhiam ci’n Antenna Tower geikhawng ah ngakcipmai uhhi.
Hurricane Irma kici in anawkkhit ciangin Hurricane Maria kici in khatvei nawkthuah leuleu ahih manin, adiakdiak in Puerto Rico gamsung limsiat mahmah hi. Adiakdiak in Landline PHone leh Cable Service teng kizangthei vetnawnlo hi ci’n US Federal Communications Commission te’n genkhia uhhi. Cell Sites zong 10% sangin atawmzaw bekin nasemmawk ahih manin, Cell Phone tawh kihotheih nading pen haksa mahmah ci uhhi.
US Virgin Islands ah phadawm zawdeuh in Cell Site te ii 39% bangin nasemlai cihi.
Hih gamnih te tawh tehkakna in US gamsung ah Hurricane in anawk sungin Cell Site asia tamzawtham hi. Texas State sung ah Hurricane Harvey in anawkgawp hunlaitak in Cell Site te ii 4.7% bek kisia a, adangteng kizangthei vevelai hi. Hurricane Irma in anawk hunlai inzong Florida State sung, adiakdiak in Disaster Area tengah Towers 27% bek kisia in, adangteng in nasem veve, kizangthei veve hi.
Related: US ah Hurricane Irma huihpi hangin Electric mei angahlo 7.3 million bangpha
Tuate tawh tehkakna in tulaitak Puerto Rico ii thuakna pen huaisia phadiak hi ci’n T-Mobile US Inc panin Spokeswoman Stacey DiNuzzo in genkhia hi. Tua ahih manin Wireless Carriers khempeuh kipawlkhawm in, amanlang in aki ngahkiktheih nading, Online kiktheih nadingin ki hanciam mahmah a, ahi zongin baihpaklo khading hi ci’n genbeh hi.
Nidang hunkhatlai in Zogam ahzong Mobile Phone akizatnop ciangin mualsang theithei ah kahtoh ciatciatphot kul himahleh tulamlam ciangin Viber, Messenger, WhatApps cihte tawh innsung lupnatung panin lupsa inzong aki hotheihna khuapawlkhat om tasam hi. Sawltak #zomidaily
Comment piaknop aomleh...