Na pianna nu leh pa it-in, zahtak inla, lungkim/lungdam sak in (Pai 20:12, Ef 6:1, Pau 6:20, Pau 30:17, Pau 23:25, Pau 23:22).
A masa in i phawk gige ding ah, “nu leh pate pen tate’ adingin gimna kici khempeuh leh lungkham haksatna kici khempeuh hong thuaksak masate ahi uh hi,” cih kigen nuam hang. Tua ahih manin nu leh pa it ding, zahtak ding leh lungkim/lungdam sak ding pen vaipuak lianpen khatin i neih ding ahi hi.
Leitungah mi bangin i piankhiat theihna dingin Pasian in i nu, i pate thupha pia-in, amau tungtawnin tate i piang hi. Tua ahih manin Pasian in nu leh pa it in, a lungkim/lungdam sakte adingin thupha tampitak hong koihsak hi. Nu leh pa thu mangin, i lungkim/lungdam sakna tungtawnin leitungah cidamna, khansauna leh hauhna nopsaknate ki ngah hi. Nu leh pa a lungkim/lungdam sak tate in a khantawn un, khut dawhngen in vak ngei lo uh a, mi khan eng’ ngei khol lo zaw hamtang uh hi.
Nu leh pate tungtawn a,hong luang thuphate deih napi-in, ngahtheihna dingin nuntak, gamtat ding pen haksa kisa zel hi. Nu leh pate’n hong it mahmah uh ahih manin, tate’n it zo den kei mah ta leeng amau hong itna bei ngei lo hi. I nu i pate it in, i lungkim/lungdam sak ding pen a haksa lua zong hi lo hi. Nu leh pate’n hong itna uh a bei theih loh hangin, tate’ tungah thupha hong piak dan uh kibang kim lo hi, cih i phawk gige ding kisam mahmah hi. Tua ahih manin na nu leh na pa a lungkim/lungdamsak pen hih sawm den in. I u nau kimin tua bangin hanciam tek leeng, nu leh pate’n zong i unau kim mahin thupha hong pia ding uh a, i unau kim mahin i nuamsa ciat ding hi.
Leitung nuntakna sungah nu leh pate khasiat sakna pen a lauhuai mahmah leh adahhuai mahmah dinmun ahi hi. Nu leh pate simmawh in, khasiat sakna hangin ei khang bek hi lo, tu leh ta khang dongah supna leh buaina lianpi om thei hi. Noah in leenggah zu kham in, khua phawk loin guak tangin a om laitakin, a tapa Ham in mu-a, a pa’ zumhuainate seel sak loin, a sanggamte kiangah va ko hi. Tua hangin a tapa Canaan in a sanggamte’ sila ahi dingin ciamsiatna ngah a, ahi zongin a pa uh’ zumhuainate a seel sak Shem leh Jafeth te tungah a pa un, thupha pia hi(Pian 9:18-27).
I nu i pate pen pilna, siamna nei loin, midangte nu leh pate bang kei mah ta le uh zahpih, ko bawl se loh ding ahi hi. Ahoih lohna uh a om leh zong gensia kha loin, itna takpi tawh i seel sak ding kisam hi. Nu leh pate pen a tawntungin i deih bangin kicing den zo sam lo ding uh a, ahi zongin i itna pen kiamsak loin i nu i pate’ tungah thupha bawlbawl in, i lungkim/lungdam sak det zawhna dingin hanciam tawntung ding ahi hi.
Absalom in, a pa David lehdo in langpan ahih manin khang lai pipi, thahat lai pipi mah in, sihsia tawh khansih hi(2 Sam 18:9). I nu i pate langpan’in, lehdo kha kei ni. Simmawh in, bawlsia kha kei ni. Pasian’ deihna tawh a kituah loh banah tua bang gamtatna in, a lauhuai mahmah nuntakna ahi hi.
David in a tapa Absalom in bangzah takin langpan’ in lehdo mah ta leh, a itna kiam tuan peuhmah lo a, Galkap makai thum(Joab,Abishai leh Ittai)te tungah, “Keimah nong khualna-un tangvalpa Absalom hong dawm mahmah un,” ci-in vaikhak hi (2 Sam 18:5). Pasian it in, a zahtak nu leh pate khempeuh in zong tate in bangzah takin simmawh in, langpan mah ta le uh tua bang lungsim nei kim ciat uh hi. Nu leh Pate pen bangzah takin simmawh in, i langpan hangin hong itna uh bei tuan lo hi.
Nu leh Pate tungah i bawlna zahzah tawh kituakin, gentheihna ahi a, nopsakna ahi zongin hong tung ding hi. Eima bawl zia tawh kizui-in thupha ahih kei leh ciamsiatna cihte hong tung ding ahi hi. Deihdeih kiteel thei-a, teelkhial leeng tu leh ta khang dongah supna lianpi om in, teelsiam leeng tu leh ta khang dongah nopsakna om ding hi.
Tua ahih manin, cihmawhna, gentheihna, khangual en’na leh a deihhuai het lo, sihsia(khantomna)cihte tawh kipelh in, cithei-in, nuamsa a, na khan a sau theihna dingin,
“NA PIANNA NU LEH PA IT IN, ZAHTAK IN LA, LUNGKIM/LUNGDAM SAK IN,” ci-in aki hanthawn nuam ihi hi. A telsiam ding leh ahi zo ngiat dingin, Topa’n thupha hong pia kim ciat ta hen. Amen 🙏
Khazih sungah, ✍️ David Tuang
Comment piaknop aomleh...