Ahun om lai in

Ahun om lai in

Leitungah mihing khatin i piankhiat theih nadingin Pasian in nu leh pa hong pia-a, nu leh pa lo tawh mihing khat ii nuntakna kipan theilo hi. Mihingte pen Pasian’ hong piansak sa hi, ici phial zongin, Pasian in Adam leh Ave simloh nu leh pa’ tungtawn in hong piansakte ihihna i phawk masak ding kadeih hi.

Nu leh pate pen tate’ adingin gentheih haksatna leh gimna kici khempeuh hong thuaksak ban vuah, nuntakna buppi kikham in tate’ adingin hong dosak galhangte ahih manun tate’n it loh theihloh(it loh a phamawh)nu leh pate ahi uh hi. Nu leh pa it-in azahtak mikhat pen khangual eng in hong om ngeilo ding hi. Tua ahih manin nu leh pate’n hong dampih lai uh, ahun om lai-in, nu leh pate it-in zahtak ding pen i vaipuak lianpen khat hisak den ni.

Mi pawlkhatte in nu leh pa it lo, zahtak lo bek tham loin, kem nuamlo, khoi nuamlo thei mawk uh hi. Pasian it-in, Pasian a zahtak taktak mikhat in anu leh apa it-in zahtak pelmawh dinga nawlkhiin/pampaih ngeilo ding hi. Nu leh pa a khasiasak, khitui aluangsak tate pen tawmvei sung alem uh ahi phial zongin nu leh pa’ khasiatna khitui gu-le-gau te a thuakkik hun khat uh hong tung pelmawh ding hi.

Tua ahih manin nu leh pate adam lai-un ihih zawh zahin itna lakin lungkimsak zawh ding hanciam den ni. Bang hang hiam cih leh nu leh pa it-in zahtak aa, a thu uh i mang ding pen Pasian’ deihna hi-a, i thupha naak ding zong ahi hi. Mi pawlkhatte in nu leh pate’ duh leh deih khat nangawn leisak ngamlo, pia ngamlo uh a, dam lo zawngkhal in hong om in bangmah hong nek zawh nawnloh ciangun a duh/deih te uh vaihawm sak panpan thei mawk uh hi.

Tum teta hipeuh leeng, dam loh cianga i piakzawh, i piaktheih khat pen adam lai un zong kipia thei(kipian zo)lua mahmah lel ding hi. Nu leh pa adam lai un akno khat zong gawhsak ngamlo napi-in, hong nutsiat khit(asih khit)ciangun sialpi/sialtal go lianga i vuibawl keei khawng zong amawkna taktak hilel hi. (Nu leh pate in amuh theih, anek theih lai un pia tangtang zaw ni. Kisik ngeilo ding hi hang).

Tua ahih manin, “A hun om lai-in,” nu leh pate;

👉 It-in, zahtak ni.
👉 Kem in, khoi lel ni.
👉 Thupha dawh siam ni.
👉 Dop bawl mahmah lel ni.
👉 Ngekbawl mahmah lel ni.
👉 Lungkim, lungdamsak ni.
👉 Khual mahmah in, vei mahmah ni.
👉 Hehpih in, awnem tawh hopih ni.
👉 Amuh theih, anek theih lai un aduh/adeih te uh hanciampih tangtang ni. Sih khit nungah bangmah ihih zawh nawnkei leh zong phamawh lo zaw lai hi. Sih nung(sih khit)sangin nuntak lai(dam lai)mah thupisak zaw den ni. Kisik ngeilo bek tham loin, nu leh pate zong lungkim, lungdam mahmah ding uh aa, ei zong i lungkim/lungdam mahmah ding hi.

Lai sim mimal kim tungah Topa’n, telsiamna leh nu leh pa it zawhna thupha hong pia ta hen. Amen 🙏

Ahun om lai-in, nu leh pa lungkim/lungdamsak ni, ci-in, Khazih sungah, ✍️ David Tuang