Na phawk ding thu ~ David Tuang

Na phawk ding thu ~ David Tuang

Mipil thu ngaihsun theite bangin, kampau in la, mizawng, daipaam bangmah theilo te bang in kiniamkhiat in!

Mihau a cithei te bangin pia khia in la, mizawng a gentheite bangin om hithiat in kisial se kei in!

Pasian’ nasem bangin kingaihsun in Pasian hoihna leh ama kammalte pulaklak in la, Pasian’ thu-um taktak lote bangin, Pasian’ hoihna leh ama kammal te na pulak ding haksa sa se kei in!

Pasian’ thu-um taktakte bangin nungta in la, tapidaw min pua bekte bangin nungta kei in!

Na mai-ah gualzawhna in hong ngak cih lamen in la, na guallelhna panin thotokik in! Khris sungah, David Tuang

Na hi ci kha hiam?

Hong it dinga kilawm tengin, hong it loin, hong simmawh a, hong zuakzuak leh na phawk gige ding thukhat om hi.

Joseph zong, a it dinga kilawm tengin simmawh in zuak uh a, mihing’ lam panin, haksa mahmah dinmun ahih hangin, Pasian in amah a laptoh nading lampi a honsakna kal masa na hi gige hi.

Tua mah bangin, hong it dinga kilawm tengin, hong simmawh in, hong zuakzuak a, hong thusim khol kei leh, Pasian’ laptoh nading kal masa a suan i hi gige hi.

*A phawkhuai thu khat-ah bel, eima ginatlohna hanga,hong ki simmawh leh hong kizuakzuak ahih loh ding thupi ding hi. Khazih sungah, David Tuang

Mi hampha/thupha ngah mi

I tate pen i deih bang lian in om den zolo uh hinapi-in, amaute kisapna khat pen piakloh a phatmawh mah bangin, Pasian in zong, eite ama deih bangin nungta den zo kei mah ta le’ng, i kisap khatpeuh lungsim takpi leh upna tawh i nget nak leh hong pia hamtang hi.

I tate pen, i deih bangin a nuntak zawh loh manun, a deih/kisap khempeuh uh kipia kim lo pah a, i deih bangin a om nak uh leh bel, a deih bangbang uh piak ding pen haksa kisa hetlo hi. Pasian in zong amah mangngilh in i taisan ciangin, i deihna hong kicingsak lo thei-a, ama deihna sungah i nuntak/kalsuan nak leh bel, ama thuphate hong piak ding pen hamsa sa lo hi.

Nu leh pa a lungkim/lungdamsak zozo mi hampha hi-a, Pasian a lungkim/lungdamsak zozo thupha ngah mi ahi hi. Khazih sungah, David Tuang