Mihing sa ne Cannibals

Mihing sa ne Cannibals

Mihing khat in amah tawh kibang mihing dangte’ sa a neekna pen Cannibalism kici hi.Zoological terms ah ganhing khatpeuh in ama kibatpihte’ sa a neek ciangin cannibalism kici hi.Canibalism cih pen Spanish pau hi a,Carib minam sa sial ne Cannibales pana kilasawn ahi hi.Hih carib nam te pen West Indies kiim a teeng minam khat ahi uh hi.Nidanglai pek pan in hih minam ten mihing sa ne mawk uh hi.Hih thu pen leitungah a lipkhap huai pawl hi.Nidanglai in minam pawlkhat in mihingsa ne zel uh hi.Mimal zong mihing sa ne tu dong mah in gen ding om zel lai hi.

Leitung mun tuam tuam ah mihing sa ne minam om hi.Kum zalom 19na hun lai in zong mihing sa ne minam honkhat ph alai hi.South Pacific tuikulh pawlkhat, Africa gam khen khat, Melanesian, Fiji leh Amazon gama teng minam pawlkhat ten mihing sa ne uh hi.New Zealand gama Maori minam ten zong mihing sa ne uh hi.Tuhun ciang nangawn in mihing sa ne gen ding om lai mawk hi.Liberia leh Congo kiim a teeng nam pawlkhat ten kidona ah a galte uh a thah ciangun a sa uh ne zel uh hi.Korowai minam ten zong kidona ah a melma te uh a thah ciangun asa ne uh hi.Bek tham lo in a biakna utawh kisaia kithawihna dingin zong mihing sa mah zang uh hi.

Minam pawlkhat in mihing san eek pen ngeina khat in nei uh hi.Tua banah lungsim gitloh mana mihing sa ne zong gen ding om veve sam hi.Lungsim kicin loh mana mihing sa ne zong om hi.Rick Gibson bang tuadan mi minthang mah mah khat ahi hi.Kum 1988 in zato inn a tonsil atna muna kikoihte sa Walthamstow High Street ah mipi muhna ah ne tang hial hi.Kum 1989 in Lewisham High Street ah mihing ciltang ne kik hi.Tua khitciang Vancouver, Canada ah mihing ciltang mah mipi muhna a neek a sawm laitak police ten man uh hi.Gitlohman leh lungsim buai hanga mihing sa ne gen ding tampi om hi.Kum 1874 February 9 in Alfread Parker, a lawmte nih tawh Colorado lamah kham(gold) zawng dingin pai uh hi.Khanih khitciang amah bek tung kik hi.A lawm te geel that in, phalbi khuavawt ah neek ding om lo ahihmanin gilkial-a a sih loh nangin a sa ne hi.Amah pen kiman mahleh kikhahkhia kik bilbel hi.

Albeert Fish in zong numeino thum thatin a sa ne hi.Kum 1936 in New York a Sing Sing thong ah kithat hi.Africa gam Sierra Leone a kum 1990 kiim a Revolutionary United Front ten zong a galte uh a thah ciangun a sa uh ne uh hi.A galte u’ sa a neek ciangun hatna thathak ngah dingin ki lam-en uh hi.Japanese mi Issei Sagawa, Paris a laisin a om lai Kum 1981 June kha in a lawmngaih lui a inn a hawh dingin zon a that sim in a sa ne hi.Sagawa pen kiman mahleh kikhahkhia kik vanglak hi.Tu in Japan ah suakta takin om hit-hiat hi.Ukarainian mi Andrei Chikatilo zong mi 50 val that leh a sa ne in ki ngawh hi.Russian history ah mithat a lauhuai pen a kigen ahi hi.Kum 1994 in Russia gam Rostov ah amah zong kithat hi.American serial killer minthang Jeffrey Dahmer zong mi 13 that leh a sa ne in ki ummawh hi.Aman zong tua ngawhna nial tuan lo hi.A kimat in Fridge sungah mihingsa neek ding a koih ki mu khia hi.Lungsim buai hanga tua bang dana gamta in kigen hi.That lo in khantawn thongkia dingin thu kikhen hi.Ahizongin kum 1994 November 18 ni in Colombia Correctional Institution ah ki satlum hi.Mi gilo Idi Amin zong mihing sa ne in kigen hi.

Mihing sa ne gen ding a tuam tuam tampi om lai hi.Mihingsa a neekna hang uh zong a tuam tuam om ding hi.Ahizongin eimah tawh kibang mihing dangte sa n eek mawk pen lipkhap huai mah mah mawk sam hi.

N. Pau Tun Thang