Zomi Namni A Phawkhuai ~ Prof. Dr. Thang Za Tuan

Zomi Namni A Phawkhuai ~ Prof. Dr. Thang Za Tuan

February 20, 2002 ni pen Zomi namni kum 54 cinna hita hi. Ei Zogam khamtung ah atung nunung pawl, kum zalom 14 hun peka kipan in eimau Hausa leh Ukpite tawh limtak in ki-ukna a kician in I nei hi. Mikhang gamkek te in, Kawlgam hong uk khit ciangin ei Zogam pen kawlgam ii gam khat (province) in 1896 September kha in hong ciapteh sak in 1896 Chin Hills Regulation Act tawh I zatngei Ukpi ki-ukna mah hong zang paisuak sak uh hi.

Kawlgambuppi in 1948 kum in suahtakna I ngah kik in Parliamentary Democracy tawh ki-ukna hong kilaih ciangin ei Zogam ah zong Ukpi ngeina kizang nawnlo in Council kiteelna tawh kilaih hi. Tuabang hoih tak a kilaih nadingin ei Zomibup in Falam khua ah mihing Tulnga val kikhawm in thu khensat ni a hi February 20, 1948 pen Zominam ni ci in 1951 kum ciangin ki kipsak hi.

Zominamni hong tunsial in ngaih sut huai leh phawk huai a thupite lak ah thu nih om kasa hi. Tuate in Ei Zomi kithutuah nading leh khantoh masuan zawh nading cihte a hi hi. Nidang lai in Kikkoman hatsat manin khua kaht leh khua khat zong mindang pi kisa kha liang hi. Ih pau leh awkaihzia tawmtawm kilamdan manin mikhual in I kingaih sun kha liang hi. Tu in khat leh khat kipia, kikawm, kimu, semkhawm a I om ciangin midang sadang I hih het lohna kip hawk semsem in kitheih siam, kisansiam at hi hang.

50 veina Zominamni Golden Jubilee Yangon ah a kibawl lai in Zomite khantohna ciaptehna Golden Jubilee Commemorative Magazine laibu limci mahmah khat hong bawl khia uh hi. 52 veina Zominamni bawl Yangon Commiteete in Zomi pianzia sutna, Ngeina, khantohna leh mailam ngimna ci in Myone buppi sagih in she in thukanna kieni a, tu in a laibu in Zominamni lap in hong suak khia ta hi.

Tua ahang thupi pen khat in ei Zomite Chin ci in Kawlgam, Vaigam ah hong kilawh hangin ei leh ei Zo, Lai, Cho, Sho, Yo, Yaw, Khu ci in Myone zui a I kilawh ngeingei pen phungpi khat, I pianna I Pu min kibang gegu pen lawhna leh ciaptehna kibang lo lel hi kha ding hi cih ciang kitungta hi.

Tu hun in Pilna, Siamna khangto mahmah in Kawlgam zong Kawlgam zong hong khangto ta hi. Kawlgam sung aom minam lak ah ei Zomite zong a tuantual I hih khak loh nading leh mailam ah kithutuak a, masuan zawh nading nakpi takin keelhaul, Zomi namni in phawk huai kasa mahmah hi. Professor C. Thang Za Tuan (Deputy – Director General, Basic Education Dept., Ministry of Education, Myanmar)