Singapore ah Zika Virus akilawh mi 215 phakhinta

Singapore ah Zika Virus akilawh mi 215 phakhinta

Singapore gamsung ah zanni Saturday (03 September) ni in Zika Virus angah mi 26 kibehlap leuleu a, zanni ciangciang hih natna akilawh akitheician mi 215 phata cih thunei te’n genkhia uhhi.

Ministry of Health (MOH) leh National Environment Agency (NEA) te’n Joint Statement abawlkhopna panin agenkhiatna ah hih Zika Virus akimuthak lakah mi 24 tepen Aljunied Crescent/Sims Drive/Kallang Way/Paya Lebar Way kuamsung tengpanmah cizel hi. Hihvengsung tengpen Zika Virus aom phatdiakna munteng ahihi.

NEA te genkhiatna ah hih natna hongki patkhiat phadiakna munte ahi Aljunied Crescent, Sims Drive, Paya Lebar Way, Kallang Way cih munteng ah Vector Control nasiatak in kineiden ci uhhi.

Natna kilawhna pen thokang panmah hiphadiak ahih manin, vengtuamtuam ah thoza kikapsak a, tho apiantheih nading in aki ummawh munte ki siansuah hi.

Singapore gamsung aom Myanmar Embassy inzong hih Zika Virus kilawhthei natna om ahih manin Singapore gamsung ah Kawlgam panin naupaai nupite hong zinkei un ci’n thuzaksakna nei uhhi. Tuaban ah tusung Singapore aom Kawlgammi te’nzong naupaai lohding hoihpen cih thutangkona nei uhhi. ZD Sawltak #zomidaily