Kachin, Myitkyina leh Tanai kikal lampi tungah mi 700 val awkcip

Kachin, Myitkyina leh Tanai kikal lampi tungah mi 700 val awkcip

Kawlgalkap te’n Myitkyina – Tanai lamzikpi tungah Road Block bawl uh ahih manin, Kachin State’s Hpakant Township sungah khualzinmi 700 valbang awkcip uh cih Irrawadday pan kiza hi. Myitkyina – Tanai kikal ah mawtaw akhawlsakcip bekbekzong 70 valbang phading kici hi.

Hih kuamsungteng anawkkha mawtaw te tungpanin KIA (Kachin Independence Army) te’n siahdong uh, Tax ngen uh cih Myanmar Army te’n azak ciangin, khualzin mawtaw khempeuh akhawlcipsak kici hi.

Dun Bum khuagei aom Tatmadaw’s Light Infantry Battalion No. 298 te’n lampi apaisuk, apaito khempeuh avekin Friday sunlam akipan akhakcip uh hi a, tua khualzin mite lakah numei naupang, nupi naupaai leh kumhamkhinsa tezong kihel uh cihi.

Kachin State ii khuapi Myitkyina panin sathau leh vantuamtuam puain Tanai khua azuan Truck mawtawpi tezong ki khawlcip sak hi.

Sunday zingsanglam in mawtaw bekbek 70 valbang akhawlsak lakpan 6 te paikhuan pia uh a, ahi zongin adangte khawlsaklai veve uh cihi.

Myitkyina leh Tanai kikal mawtawneu tawh azinzelzel mawtawhawl Ko Sai in agenna ah September 22 ni akipan Hpakant, Lawa khuageiteng ah KIA te’n mawtaw apaikhempeuh sumdong uh cihtawh galkap kumpi te’n hong khawlcipsak uh ahihi ci’n genkhia hi.

Ko Sai in kumkhat aiding in KIA te tungah 50,000 kapiakha cihi. Sumpiak ciangin KIA te’n Receipt piakik uh a, KIA Checkpoints te nawkkhaksim in tua Receipt lahkul cihi. Passenger tezong khatciangin 5000 ta ngen uh cihi.

Myitkyina leh Tanai azinzel Driver dangdang te genna ah KIA te’n mawtawneu khatciangin kumkhat 50,000 piakkul a, mawtaw agol te ahihleh kumkhat 100,000 panin 200,000 tabang piakkul cihi.

Kawlgalkap te genna ah KIA te’n khualzin Passenger khatciangin 5000 ta ngenciatciat uh ahih manin, KIA te’n sum tampi ngahding uhhi.

KIA Battalion No. 6 panin Lt-Col Tang San in agenkhiatna leuleu ah hihbang in sum kadon uhpen tutawm in kadonpat uh hizenzenlo hi. Abeisa kum 50 hunlaipek akipan kadondet uhhi cihsanlel hi. Ahi zongin khualzinte nawngkaisak, zaikaisak nading in bawllo hi ung, sumzong aki pumnget hilo in, huhna Donation ci’n akingen hi ci’n genbeh hi.

Tulian laitak in Hpakant kuamsungteng ah KIA Battalion No. 6 te leh Myanmar Army te bangmah buaina, kikapna omlo cihi.

Abeisa kum August khasung inzong Hpakant’s Sha Htu Zup khuasung aom KIA te ukna suangmanpha khuk “Gold Mines” tengah Kawlgalkap leh KIA te buaina piangngei uhhi. Tukum June khasung inzong Tanai Township sung aom Amber leh Gold Mines te ah buaina piangkik hi.

Related: Aung San Suu Kyi Kachin State sung aom galtai te kiangah hawh

Myanmar Army te’n agenna ah KIA in kumkhat in siah adonna panun sum 2.8 Billion peuhmah ngahdending uhhi ci’n genkhia hi. Tuate pen Gold leh Amber Mines tawhna panin sum angah uh hi a, tua sumte tawh hiamvan Arms & Ammunition te leina in zanguh a, Kawlgalkap te hongkapna uhhi ci’n genkhia uhhi. Kachin State sungzong daihhun cihbang omtuaklo hi. Sawltak #zomidaily