Na Nu le Na Pa um kei in (8) ~ Lian Tuang

66
Nuntak bei ding ngakin lupmun tungah a kikem na Nu le na Pate veh ding inn lam na ciah ciangin nidang lai inn lam na ciah ngei mah bangin, nik le puan leh nek theih tuamtuamte puak veve in. Amau a nek zawhnawn loh hangin a nek mah bangin lungdam ngetngut ding uh hi. Ne zo nawn ken teh, silh zo nawn ken teh ci in bangmah na puak keileh tua in a lungsim uh neu sak mahmah citciat.

67
Nu le pa kiang na tun ciangin ahih theih nakleh lenglate ban hopih pah nai sese loin nu le pate lupna gei mah delh pah vingveng zaw in. Minute 1 minute 2 sung bek ahih hangin amau na ngaklah mahmah uh a, midang tawh na kiho masak phot hithiat ciangin kei kiang ong ciah hi lo ai tam ci in na khasai man zezen uh hi.

Neu lai a nu le pate khualzinna pan ong ciah ta ding cih i galzak ciangin ong tun kal ding ngaklah lua in zan nangawn ihmu ngam loin konglam nga in i ngakngak lai hunte tawh a kibang ahi hi.

68
Mundang theih ngeilohna mun ahih hangin Nu le pa tawh hi peuhleh naupangte lungmuang takin om in nuam a sak theih mah bangin, nu le pate zong cina zawngkhal in zing le thai ah bangpiang ding cih a kigen theilo hun laitak nangawn in a gei ah a tate om peuhleh a lungsim uh thakhauh in khamuang mahmah uh hi. Tua bang hun ciangin atate vangngaih in lunggulh nguangua uh a, ama kim le pam ah a om uh ciangin nuamsa ngaungau in sih ding nangawn maingap mahmah zo uh hi.

69
Nu le pa cina na kep ciangin ahih theih laiteng a gei ah om hithiat in la a maitang en gige in. A lunggulhna te a kam tawh ong gen zawh nawnloh akl gen noploh hangin amai puakzia tungah ong kilang ding hi. Amau lunggulh thute in a dangtak, a ha kawm ah an neng baang, a lukham om dan nuamlo, a buanza om dan lemlo, a khe kham, a elzang kham,…, cih bang peuh hi a, kam tawh gen tak sa hetlo napi nang na phawkkha khinkhian lecin nuamtuam sa in nak lungdam mahmah vetse hi.

70
Nu le pa kemin a gei ah na om uh ciangin ahih theih laiteng gamdai theithei in om zaw in. Akem akoi teng kithanop suah in ciamnuih peuh bawlin I gamlum henhan theih pen khat veivei ciang cina in nawngkai sa lua mahmah thei hi. Ihmut laitak a, bil gei ah thokang ham vauvau bangin cinate in gamlumna nawngkai sa mahmah uh hi.

Lian Tuang