Laigelh uk laibu bawlnuam lawmte tungah ngaihsut piakna

Laigelh uk laibu bawlnuam lawmte tungah ngaihsut piakna

Keimah bangin laigelh ukin laibu gelhnuam lawmte tungah ka theihsunsun hong hawmsawn nuam ing.

Phawk Masak Ding

Eimi sungah laibu bawlna hangin hauh lawhin Millionair, Billionair a suak kuamah om nailo cih phawk masa ding… Laibu zuak baih ngiatlo ahihlam phawk ding… Mawk piak nangawn lungdam hong kiko khollo ding cih phawk masa ding… Ahizong tuate hangin lungkia lo ding, thanem lo ding!!!

1). Thulu or Laibu min

Laihawm khat peuhpeuh adingin laigelh na kipat ciangin thulu guang masa hamtang in.. Thulu mah om masa leh tua thulu tawh kizui-in na laigelh ding hong kizom toto thei ding hi. Thulu tawh kimemat in laihawm a gelh ding hong kicial ahihleh hong cialte’n a thulu hong pia kha thei ding hi. Tua tawh kizui-in na gelhsak ding ahi hi.

Ahi zongin nangma gelhtawm a, na khak ding ahih leh zong tua laihawmna sungah banglam kigelh phadiakin bang lam ki thupisak hiam cih zong I kan masak ding kisam simsim hi. Banghanghiam cih leh amau Suang Manpha thu gengen kimlai, en’ Vokpi thu khawng suahsak dingin I khak ciangin hong suaksak zo phalo uh a, tua ciang peuh I khasia nuam thei zanzan hi.

Laibu khat bawlsawm, gelhsawm na hihleh Laibu Min ding guang masa, gel masa limlim in. Ahi zongin tuapen na zatsuak nop leh zong na zatsuak ding hipah a, ahi zongin na laiteng na gelh khit ciangin na guansa min sangin ahoihzaw, a zaknop huaizaw, a muibun zaw min na piaknop hong om thei hi. Tua laibu min tawh kizui-in a thu le la na kaihkhopna ah na gamtat dan hong nuamtuam mahmah ding hi.

Laibu min zong a sim hak bialbual, a tel hak gawp khawng zong hikei henla, et phet in mite lungsim a la thei, mite mit a la, mite’n simnopna lungsim a neih pah theih ziau ding, laibu min a muh phet un a sunga thute simnopna lungsim a guan thei ding min ahih ding zong kisam hi. I laibu min in mite mit la masa dinga, tua panin a sunga thute simnopna lungsim guan ding ahi hi.

2). Outline bawl in

Na laigelh sawm thulu tawh kizui-in outline bawl masa limlim in. Magazine ading ahi a, laihawm tuamtuam ading ahi zongin na gelhsawm thulu ii nuai ah outline gelh suk limlim lecin na laigelhna hong nuam tuamsak mahmah ding hi. Tua na outline tawh na puak nop kei phial leh zong na laigelh khit laigualteng na leptuah khit ciangin outline teng paikhia lel lecin zong phamawh lo hi.

Laibu na gelhsawm ahih leh bel outline limtak gel masa, guang masa lecin na thu kaihkhopna ah nuam mahmah tuam dinga, na outline tawh kizui-in a banban in na zo to thei ding hi. Outline na bawl ciangin a masa in khenpi bangzah phasak ding cih khensat masa photphot inla, tua khenpi phazah gentehna khenpi sagih bang phasak ding na hih leh tua khenpi sagih teng ading thulupi sagih guangsuk photphot in. Tua Khenpi teng le Thulupiteng nuai ah thulu neu a nengneng na guan beh ding hi. Tuate tungtawnin na laigelhna ah hong nuam mahmah ding hi.

3). Thu le la kaikhawm in

Nangma tuah khak, phutkhak thute bekbek gelhkhiat sawm na hih kei naakleh na laibu sunga guan theih ding thu limci, mite zaknop ding thu le la a tam theithei kaikhawm inla, tuate na laibu sungah a thulu tawh kituak in guang kawikawi lecin na laibu hong limci sak tuam ding hi. Laibu tampipi sim inla, tua panin na laigelh sawm tawh kimemat laigualte laibu khat ah ciamteh pah inla, tuate na laibu sungah guang in.

4). Etkaaknate teltak in lakkhia in

Mite laigelhsa, laibu khat tungpan a na laksawn laigualte na laibu sungah limtak in ciamtehna le theihsakna gelh hamtang in. Mi pawlkhat in amau gelh bang keekin gelhziauziau thei uh hi. Tuhun ciangin na khat peuhpeuh theih baih mahmah ta ahih banah copyright a neite tawh kinai mahmah ta mawk ihih manin mawk guan ziauziau ngam huailo hi. Note: Mailam ah Thulu teldan, Laibu min piakdan, Outline bawldan, Thu le kaihkhop dan cihte kikupbeh to lai ni….. Lungdamna lianpi tawh, Dong Mung