Na Naingangyi cih uh bang ahia? ~ Kap Lian

Na Naingangyi cih uh bang ahia? ~ Kap Lian

Ka neulai thu mangmawh a ka theih, “Democracy na cih uh ASSK maw” cih ahi hi. Ki-uk zia deihloh na hangin gamsung buai cihtak hong buai, khua hun kikhel ding hita a thei tawh theilo tawh kam nei khempeuh in Democracy kici ngeingai vial dep hi. Tangval lengkul kum 40 kim phal khat in Democracy pen thei cih thadah za ngeilo vetlo a zakcilna ahih manin Democracy na cih uh ASSK maw ci hi. Kician kasa lel hi. I theihloh thu khat a thei bang a I om sang a theite I dot ding mah ahi hi. A dong lote zong a thei uh hi tuanlo uh a, a thei bang dan a om pong uh hi bek hi. A theihloh lam zong a theilo ahkl a mai zum hilel tak ding hi.

Ken zong kong dotnop gige khat bel Politic (naingangyi) na cihcih uh bang ahia? Min leh za (min leh vang) maw, neih leh lam (sum leh pai) maw, thu neihna maw, mimal angsung hamphatna maw, khantohna (development) tuamtuam te maw?

Eimite gengen Politics pen hih a tung ate hi ngelngel leh kilawm kasa hi. Politic I cih pen a taktakin tua te hi masa hetlo hi. Tuate pen Gam khat ki-ukna a hoih leh hong pai ding hamphatna ahi hi. Tua bangte hong pian theih nading a sepna pen politic ahi hi. Kawlgam ki-ukna hoihlo tawh kum tampi kikalsuan khin ahih manin thumanna leh cihtakna om nawn vetlo a mimal hamphat nopna lungsim hong lut khinta, tua nangawn ahi ding mah kisa ta lel dinmun ki tung ahi hi.

Kawlgam sung a Kumpi langpang Politic semte lakah Mualtung mi khempeuh phial in thatang suang thautawi in sem uh hi (a thu tawh kingah lo ahih man hizaw a amau ut leh deihtel lampi hi lo hi). Party lam pan NLD zong Thukhunpi bawlphat ding buaipih uh a sikhop mahmah uh hi.

ZCD in bel liangko kikimna (human rights, birth right) cihte “ei zingvai ding ei ma’n hawm ding,” Federal ki-ukna zang ding, ei mun ciatah ei mah a thunei pen hipah ding cih thu hi a, THUPI mahmah leh THUGIL Politic taktak tawh a kalsuan uh na hi gige hi, en I telloh manin thupi a sa lo khawng hibek hang a hih thute pen Mualtung mi khempeuh in neih leh lam beilawh liang a sih leh hin ding phamawh sa lo, nuntakna tampi bei lawh a, a sep uh ahi hi. A lampi tot uh kibang lo hi bek hi. A tupna uh hong tangtung hileh tu a I gengen neih leh lam, sum leh pai, min leh vang (za) cihte zon cihtak zon kullo sa in I lungkim zah khop ciat uh mikim in I mu lel ding uh hi.

Tulai tak a mite ngah ci a I et giaugiau I en mahmah uh College, Mei, Vanleng tual, District, Lampi cihte khawng Democracy taktak tawh ki-uk leng I sep khit zawhloh zahdong a hong pai lua ding, ki hazat leh kideihgawh zong a kul vetlo khantonna (Development project) Democracy gah vive hizaw hi. I ki-uk zia uh diklo manlo ahih man a deihzah kicing ngeilo kituhtuh niloh I hi leltak uh hi. Ei mun ei gam ciatah thu neileng thunei tuam zong hong om nawnlo ding hi. NANG a thunei pen na hipah lel ding hi.

Zomi Party neu salua a gambup Party suah ding khawng zong I gam I lei-ah mi dang (namdangte) thu neisak ding a va cialcial tawh kibang kasakna khat om hi. I pu I pate hunlai a Panglong Thukimna tawh Kawl lak a va kiphum lut tawh kibang lo ding hiam ka ci nuam dektak phial hi. Ei minam tawm cik khat in bel minam liante va uk zo kei lua ni, ahih hang amau ukna thuneihna nuai hikei peuh leng hithei lel hi. Zomi neu a sa luate Kawl lut vet ve vua (galkap tum danin Kawltum vet leng cih lah hithei tuanlo zel). Amau lak ah va lut mah leng zong ei mi tamlo leltak thugen hong kimang lo lai ding, Democracy takin thu kikhen ding hi leh lah amau mah tamzaw zel hiven, bangcih nawn tuan ding.

Tua bang dinmun I hih manin kua in I deih uh hong tangtun pih zo ding cih I kipawlpih ding uh zon siam kisam ahi hi. A beisa ciangah ZCD in NLD muang mahmah in 88 khit a kipan kibelpawl (pang bel hilo hi) uh hi, ZCD bek hi zenzen kei Kawlgam bup a minam khempeuh in muanna tawh nakpi tak tha kipia ciat hi, ahi zongin NLD in gambupah tutna hong ngah ciangin hun haksat lai a lawm hoih a neihte uh phawk kha nawnlo uh tawh kibang dektak hi.

Mualtung mite thu NLD makaih Gambup innpi sungah kisungkhia ngei tuanlo hi. Tua manin namdangte’n kimuang zo nawnlo hi. I ngimna kibang lawmhoih zon siam ding kinak sap mahmah ta hi. NLD ten tukum kitelna ah hong zo kik mah le uh zong a sep nop uh hong sem zo takpi diam, galkap tawh kizawl pian zawmah lai uh a, mipi muanna ngah zo nawnlo kiamsuk lam manawh pian zaw uh kasa hi (bangbang hileh gal mainawk, a hampi phu uh hi a, haksa veve tham ding mah hi).

Tu ta a bat uh leh bel tu a Term (2020-2025) a bei ciang manta kha ding uh hi (mi muan Su Kyi bek hiven, a makai mipilte uh lah tek lua mahmah ta uh hi). Tutung kitelna upmawh ma gen hileng, gambupah NLD kiamsuk ding a, Tedim leh Tonzang gamah ZCD kiamsuk in NLD hong hatzaw thei ding hi, hoih hi bang hang hiam cih leh hong nak hanciam kik mahmah tuak ding uh cihna ahi hi. Kipuahphat hun leh thasan hun ngah uh cihna hi a, nasep hong hanciam zaw ding uh hi. Party khat in kitelna zawh leh zawhloh tawh kisai hetlo-in nasep a kikhol thei ding hilo, sep ding nak tam mahmah veve hi.

Tua banah tutung kitel hunlap kei ta leh mailam a ding ka gen nop khat bel, mailam kitel ciang pitek putek inn a naucin ding (a tute uh) tampi a neita tengin inn ah nau cingin na om phot mai uh henla, kitelna khawngah ki Candidate in hong utnawn kei phot le uh ka lunggulh mahmah maita hi (Tukum kitelna a lap loh hang hong pailai ding hun saupi lap veve cihna tawh kong pulak hi). Khangno mipil tampi tak Kawlgam, Zogam ah om hiven tua te mun pia in hileng kikhangto zaw lua mahmah ding hi. Hi thei hileh a deih huai masa khollo

• 1. Pension khinte (upa lua ta uh)
• 2. Laitan kician neilote
• 3. Internet leh social media zang theilote
• 4. Biakna thupi simlote
• 5. Mi duhhop huaihamte

Hi thei leh a deih huai mahmah Minam palai ding Candidate pen

• 1. Kum 30-60 mi (Khangno sinsen tangzang kum tam nailo hileh sawtpi kizang thei ding)
• 2. Kawlpau leh Mikang pau siam mi
• 3. Laitan kician Degree nei ngiat mi
• 4. Biakna hahkat Pasian zahtak mi
• 5. Mi a thusim ngiat mi
• 6. Mimal phattuam nading sang, mipi phattuam nading tawh a lungkim zaw mi
• 7. A lungsim siangtho (khialhna a pulak ngam) mi
• 8. Khialhna pan sinna a la thei mi
• 9. Mi pilte thugen a pom siam mi
• 10. Gualzawh dan leh guallelh dan zong a siam mi
• 11. A gualzote pahtawi dan a siam mi
• 12. I Minam leh ngeina a thupi sim ngiat mi
• 13. Hamphat pakna ciang bek hilo Nampi namneu tualsuak mite liangko kikim a suahtakna, a bukim khantohna masuan mi
• 14. Media tawh kizom nuam mi (thuthak om ciang mediate kimuh pih pahpah leh khasim a tawm pen khatvei thu pulakna nei nuam mi)

cih bang dan hileh kikhangto ding hi. Politic sem dingte thunei nuam mi hilo ding a mi sawltak utte hi ding hi. Hamphatna ngah nuam mi hilo ding a, hamphatna piakhia nuam nasem nuam mi hi ding hi.

Tukum kitelna lut thei ding Candidate pen Party khempeuh in member sung pan palaite’n tel masa uh ahih manin lungkim huai mahmah ta leh, khangham tamzaw lai ahih manin deihdan bang zo nailo deuh hi. Tulai tak a makai khangham khinte’n thu hong khual unla mai lamah khangno thahat laite mun hong awn ta un cih ka thum nop thu ahi hi.

Thu khup nading in Politic I cihcih pen min, za, vang, sum leh pai leh tawmvei sung kimang ding phat tuamna leh kilawm lo pi a I ngah khak hamphatna lam hi masa zenzen lo a I ngah ding a kilawm hamphatna, kideidanna omlo a liangko kikim, thuneihna kikim sinsen a khantoh khopna cihte ahi hi. Ei gam ei mun ei mual ciat a thuneihna dong hong pia hong ngahsak ding Politic leh hong semkhia ding tangmi palai kician a kisam I hi hi.

Khantohna tuamtuam (development ဖွင့်ဖြိုးရေး) khawng pen Politic pansan kul sese lo in kisem thei lel hi, mun khempeuh pan lampi tuamtuam tawh kisem thei hi. Dr. Sa Sa in zong vanleng tual khawng bawlsak ziahziah thei lel hi. Politic tawn a khantohna sep sawmte Vote piak huai kasa kei zaw hi. Khantohna I lunggulh leh mun leh za I ngahloh hang I hihna bangbang tawh a tawm a tam kisem thei veve hi. Mipi phattuam nading a semsem khinsate hong ki Candidate uh leh tua bang mite a sem nuam taktak ahih manin muanhuai a piak huai zaw hi. Politic zang a thuneihna deihte (zang khialte) hangin I gam kisia dipdep khin a bawl hoih kik nuam I hizaw hi.

Min leh za, min leh vang deihte kumpi nasep na sungah lut ding hoih zaw sa ing, kum ciang tan omlo (Term neilo) sawtpi sem thei hi. Mi dangte tawh kidemna zong kul se lo in cinna (qualification) a neite in tua lam hong bulphuh zaw mai ta un. Kumpi nasepna sungah U lian , Za lian suak zaw leng sum leh pai bek thamlo min leh vang zong om pah hiven. Tua ahih kei vet leh sumbawlna kician takin sin in sem leng sum tampi kihau thei lel hiven. Hih bang dan te politic ah hong lut kei zaw henla a lampi ciat zui sawm zaw mai leng hoihzaw lo ding hiam. Tua banah hih bang te Politic hilo a nasep (Career) khat veve ahi hi.

Behlap vetlai leng Politicians taktakte pen min leh za, min leh vang, sum leh pai, mimal angsung bek metna ding a nasem hilo zaw in ken bang piakhia thei ding, mipite ading bang sepsak thei ding, bang bawlsak thei ding ka hiam cih hi a, leitungah gam makai minthang tampi tak I gen ding om khinta hi. US ah Trump in telcing a ngah ciang President khasum ka la kei ding hi ci hi kici hi (a lak leh lakloh thei keng). Tulaitak Zomite tampi sum thalawh a I omna gam Malaysia zong sawt nai hetlo khat pan Dr. Mahatir in nakpi takin hong khangto sak ziau hi. Singapore gam leitung a gam minthang khat suak ziau hi. A makaipi uh Li Kuan Yu in bem panin hun tom cik sungin hih ciang tunto ziau hi.

Politic leh politician tawh kisai-in a Party uh mungtup, a mimal (tangmi-palai), a genkhiat leh a gamtatna (a sepkhiatna) kituak maw kituaklo cih zong mipite lam pan etcik ding kinak sap mahmah leuleu hi. NLD leh ZCD bang pen a nih un a Mungtup uh nak hoih lua peuhmah tuak uh hi. A palai telcingte un a gen bangun a sem takpi uh hiam, tu a I tel ding candidate thakte e leh a gen bangun a sem takpi dingin mi muanhuai mah ahi uh hiam cih ngaihsun teta sa-in vote piak ding hanciam ciat ding ahi hi. ASSK in zong a Party enkei unla a mi enin pia un a cih pen ei Kawlgam a dingin thuman mah zong hita lel hi.

Tua ahih manin Zomite’n I kitangsap uh Minam makaite tangmi pen Kuakua Party pan ahi zongin I minam tang mi na hihna uh mangngilh theih hilo hi. Gam leh minam mah nong vei vua, mimal a ding bek hilo-in gam leh mipi khempeuh phattuam nading nong sep ding uh mipite in kong lamen uh hi.

Politic leh politician vai a telsiam dingin Topa Pasian in laisim mimal kim thupha hong pia tahen. Kei muhna ciang tawh kong gelh hibek a nang muhna tawh a kituak kei leh hong telsiam un. Kap Lian