Earth Hour 2017: Leitung gamtuamtuam in 8:30pm pan Electric Power sumitding

Earth Hour 2017: Leitung gamtuamtuam in 8:30pm pan Electric Power sumitding

Tuni Saturday (March 25) ni pen leitungbup in “Earth Hour 2017” in aciapteh ni ahihi. Leitungbup gamtuamtuam pan gam 172 bangin “Earth Hour” ki zangta hi.

“Earth Hour” cihpen World Wide Fund for Nature (WWF) te hong makaihkhiat hi a, leitungbup phialin zangta ahih manin Worldwide Movement thupi mahmahkhat ahihi. Ih omna leitung Planet kepbittheih nading ngimna tawh kumsim in “Earth Hour” ci’n naikhatsung Electric Power te ki mitsak hi.

Kumsim in “Earth Hour” akibawlni pen akibatlian lohhangin March kha beikuanlam hiden a, tuni in leitung gamtuamtuam te’n amau gamtek ii Local Time kizangin, nitak 8:30pm panin 9:30pm dong akisamlualo Electric Power khempeuh sumit uhhi. Tua naikhatsung Electric mei ki sumit pen “Earth Hour” ci’n aki ciamteh ahihi.

Mipil misiam Scientist te’n ihteenna leitung Planet pen siatlam manawh semsem ci uh a, khuahun zong kilaihgawp in thusia bekbek ki limzatzaw takpi hi. Tua hi in ih omna Planet kepcing nadingin Carbon Footprints khiapding kisam a, Electric Lights leh Electric Power azang vankhempeuh khiaptheihzah in khiapding kisam hi.

Abeisa 2016 kumin Earth Hour pen Saturday, March 19 ni in ki ciamteh a, leitung gamtuamtuam panin gam 178 takin Earth Hour zangin Electric meite naikhatsung sumit uhhi. Adiakdiak in leitung in atheih aminthang munte, “World’s Most Iconic Landmarks” te ah Earth Hour pen kizang hamtang hi in, 2016 kum inzong leitung iconic landmarks mun 400 val ah kizang hi.

Tukum zong Earth Hour hunsung in leitung innminthang leh Landmarks minthang ahi Empire State Building, Space Needle, Golden Gate Bridge, Colosseum in Rome, Pyramids of Egypt, Sydney Opera House, Eiffel Tower, KLCC (Kuala Lumpur City Centre) cih munte ah kizang hamtangding cih kiza hi.

Video na etnopleh: Earth Hour 2016 At A Glance

Tuni Saturday nitak na omna gam ii 8:30pm hunin mei amihleh alamdang in ngaihsunken, Earth Hour akibawl hikhading hi.

Leitung gamkhangto te’n Carbon Footprint tamlua, Electric Power ngahtheih nadingin Carbon Dioxide aki khahkhia tamlua ci’n lunghimawh mahmah uh a, khiaptheih nading a ngaihsutsut uhciangin kumkhat sungin nai 1 beek Electric Power sumitleng cih Idea hong neikhia uhhi.

More: Mexico gamsung ah singkung 18 Million ki suanding

Ih Zogam ah kumkhat in naikhatsung Electric Power angah zolo khua tampi omkhalai dinghi. Gamkhangto te ah Carbon Dioxide kikhahkhia tamlua ci’n lunghimawh mahmah uh a, Zogam ah Carbon Dioxide khahkhiatding takpi nangawn zong aki neizo nailo hilaimawk hi. ZD Sawltak #zomidaily