Australia gamte’n Syria leh Iraq pan Refugee 4400 lading

Australia gamte’n Syria leh Iraq pan Refugee 4400 lading

Syria gam leh Iraq gampan galtai cimawh dongtuak te mi 4400 Australia gamah ki lading hi ci’n Immigration Minister Scott Morrison in Monday ni in genkhia hi. Hihbang in mi 4400 alakzawh sawmna ahangpen Australia gamsung ah Boat tawh alutding khaamzo uh ahih manin, tuatang mun awng om ahih manin, mi 4400 alaksawm ahihlamzong genbeh hi.

Australia kumpi in agam ah thumanlo tawh alut Unauthorized Boat tawh atung mite pen Refugee in ciamteh nawnloding a, Resettlement zong vaihawm sakloding ci’n a tangkosa uh ahihi. Tua ahih manin Unauthorized Vessels tawh apai teiteite pen Papua New Guinea leh Nauru gamte ah ki puaksawn hi.

Tuabang in Boat tawh Australia gamah alutding akhaamna hangin tuipi tungah asihlawhzong hong tawmtuam pah a, Humanitarian Programme tawh kizui in leitung ah gentheih hamsat athuaklua mahmah mite ading inzong mun awng hong omtheipan hi ci’n Immigration Minister Scott Morrison in genbeh hi.

Iraq gampan galtai mi 2200 peuhmah atawmpen lakding in gelna nei uh ci a, tualak ah namvai leh biakna vai (Ethnic and Religious) tawh bawlsiat athuak te ki helding uhhi.

Tuaban ah Syria gampan galtai tezong mi 2200 peuhmah lakzawh nading in gelna nei uh a, tualak ah Lebanon gam atungsa cimawh genthei galtai tezong kihelding cihi.

Australia gam in kumsim in Humanitarian Refugee Program tawh mi 13,750 ta aladen uh hi a, Scott Morrison genkhiatna ah mi 11,000 pen Australia gampua aom te adingin kigelsak cihi.

Abeisa kumsung in Australia kumpi te’n agamsung ah Syria gampan in Refugee mi 1000 val lutsak uh a, Iraq gampan inzong mi 2000 val lutsak uhhi. Afghanistan gampan inzong mi 2754 lutsak uh a, Kawlgam pan ahihleh mi 1800 bek alutthei suak hi.

Scott Morrison genkhiatna ah Kawlgam pen khuahun hoihzawta ahih manin, Malaysia leh Thai gam aom Christian Ethic Minorities ahi Karen State leh Chin State pan galtai te lakzawhding ka hanciam laiding uh cihi.

Australia gammakai thakte’n 2013 September kha akipan ukna hongkipat uhciang in kumkhatsung Refugee alakzahding mi 20,000 pan mi 13,750 ah hong khiamsuk uh a, Refugee Action Coalition te’n mawhsak mahmah uh cihzong AFP News pan kiza hi. ZD Sawltak