Caritas in Veritate Lungngaihna
Deus Caritas Est – Pasian in Itna Hi, cih pen Pope Benedict XVI na ii amasa penpen Encyclical (Pope honghilh na Laipi) ahihi. Tua tawh kizomin, Caritas in Veritate – Itna in Thumanthutak tawh Nungta – cih hongat leuleu hi. Hi Caritas in Veritate sungah a Lianbel Siampi Pa honghilh na thu in, tuhun tulai tak in, leitung muntuamtuam ah liangko kikimlohna, thuneihna zatkhialhna te hangin muntuamtuam gam tuamtuam te ah haksat gentheihna thuakna te tungah bangci gualzawhkikding cihthu ahihi. Banghanghiam cih leh Pawlpi sung kipawlna tuamtuam te ahi (Caritas kipawlna cihte akipan), gamvai kipawl na leh khantohnang kipawlna akipan, Pawlpi mintawh nasepna kipawl na khempeuh te ah, liangko kikimna omlo in, thuneihna zatkhialhna te hangin, kitelkhialhna, ki etkhialhna, buaina, gamlum na, kitot kiselna pan kipan, minam khat le khat, gam khat leh khat kikal nangawh ah gal le sa pianna thu te hongom hi. Hi bangthu te tungah ei Catholic te in ih Pawlpi mintawh nasepna tawmtawm te akipan, midangte tawh nasepna te ahi, it na minki vawh nasepna te khempeuh Pasian thutawh kituak a, ihsep ihbawl theihnang, Pawlpi leh Pasian min athangzat leh adaisak hilo zaw in, Pasian mintawh mite tungah utbangin pau in, utbang a agamta te hi loin, asiangtho, a etlawm, Pasian nasepna te ihsep tawntung theihnang in a Lianbel Siampi pa ii honghilh na ahihi.
Tuabang thu hoih thumanpha honghilhnate ah, Christu Topa nuntakzia, Christu Topa honggen thu leh, ama ii mihing ahih naleh Pasian ahih na thuthuk leh thuman thutak te etteh in, itna nasep asem dingin hongsapna laizong ahihi. ‘Pasian in mihing hongsuak in eite lakah hongom hi’ cih thuthuk lungngaih ding leh hi thuthuk pen Christian nasepna khempeuh ah ihbul leh ihzung hongsuaksak nuam hi. Banghanghiam cih leh Mihing hongsuak Pasian ahi, Jesu Topa in mihingte ading in bangci bangin phattuam na bawla, bangci bangin mite huh a, bangci bangin mite nuntak na lamsanghiam cih thute Lungdamna laisiangtho ahi Mate, Maku, leh Luka te sungah teltak in honghilh hi ci in, a Lianbel Siampipa in, Laisiangtho kammal te kammal in mawkbei saklo in, gamtat na ihsuah saknang honghilh hi. Caritas in Veritate sungah, a Lianbel Siampi pa – Benedict XVI na in, Pawlpi mintawh nasepna te (Catholic social servies) a et ciangin thuman lohna, diktat lohna te mu in, beisak nuam manin, Pawlpi in mite nuntak na’ngtawh kisai hanciam nate leh nasep nate ah kisapna te phawkkik in, Pawlpi honghilh na leh deihna bangin ihsep nading, thu khauhtak honghilh hi.
Asiangtho Catholic Pawlpi mintawh nasepna khempeuh ah, mite hauhnang, veng leh pam leh minam hauhnang ngimna leh gelna himasa lo in, haksat gentheihna athuak mite, deidan na leh pampaih na athuak mite tungah Pasian piak nuntak na ahi Leitung nuntak na leh Vantung nuntakna piakna’ng ahi hi. Leitung nuntakna leh Vantung nuntakna cihciangin, gilkial dangtak te an le tui vaihawmsak ding leh, tua an le tui te leh phattuamna te, angahna uhtawh, upna lamah khua musak ding, theisak ding cihna ahihi. Topa Jesu in mitulnga an avakna ah hita leh, tulli avakna ah hita leh, anungta Pasian thu ahilh dikdek khittak ciangin leitung an piapan hi. Tua mahbangin Caritas in Veritate in, eite 
zong mite huhna’ng Pawlpi mintawh nasepna te ah, an le tui vaihawmsak masa dinghilo in, Pasian thu mopmasa in, Pasian thu hilh masa ding hongthei sak hi.
Khua khatah leitung nuntak na’ng tuinakkhat ihpiak ciangin, tua tui hongpiak khiatna, hongpia pa theisak masak ding ahihi. Ahi zongin Caritas in Veritate hong hilhna tawh kileh bulh in, tu hun ciangin, mite in tui project, inn project masak in, Pasian thu nunun tawntung ahih manin, Caritas in Veritate – Itna in Thuman thutak tawh nuntakna – dingpan in, deihloh pen ahi, itna nasepna hangin muhdah na leh ki etkhialhna te hongpiangin, ki deidan na leh ki nawlkhinna (inequities and injuctice) hongpiangsak hi cihna thu honghilh hi.
Deus Caritas Est – Pasian in ki-it na hi a, Caritas in Veritate – Itna in Thumanthutak ahih manin, itna nasepna khempeuh ah, thumanthutak a omding thu apelmawh leh aphamawh ahihi. Pasian in Itna ahih manin, it na nasepna khat peuhpeuh ah, Pasian thu kigenmasa in, kihilh masa in, kilungngai masa dinghi. Pasian thu genlo, hilhlo, upna sungah makaih masa lo in, Itna nasep semdinga akipan te in, social workers hi in, Caritas in Veritate honghilh natawh hongkituah loh ding ngaihsuthuai hi cihthu honghilh ahihi.
Rev Fr Damian Dal
Ref:
Caristas in Veritate,
Pacem in terris nos. 134-35, 137.
Pope Benedict XVI, “Fighting Poverty to Build Peace” no. 1, World Day of Peace 2009
Conference, ed. Linda Hogan (Maryknoll, N.Y.: Orbis, 2008) 271-77.
Comment piaknop aomleh...