Na deek akham luatleh na nuailam en in ~ Dong Mung

Na deek akham luatleh na nuailam en in ~ Dong Mung

1). Tulai hun tawh kituakin Phone hoihnono, Computer hoihnono, khasum tampipi sangte na et ciangin lungkia in na tha a nem kha zel hiam?

2). Motor hoihpen, Motor Cycle hoihpen tuangin a leng vavate na et ciangin na lungkia in na tha a nem kha zel hiam?

3). Khasum tampi sangin duhduh ne in, deihdeih leite na muh ciangin na lungkia in na tha a nem kha zel hiam?

4). Khedap bulh ding thak lei zolo, silh le teen thak lei zolo in na om ciang na lungkia in na tha a nem kha hiam?

Sanggam aw, phone hoih nono neite, computer hoihnono neite na etet manin na deek a kham lua hiam? Sang daak lua kha hiteh…Na nuailam en dih ve….. Phone zat ding neilo, computer cih a thei ngeilo mi tampitak mah om lai hiven…

Sanggam aw, motor hoihpen, Motor cycle hoihpen na neihte na etet manin na deek kham lua kha ahiam? Sang daak lua hiteh…Na nuailam en dih ve… Motor mu ngeilo, Motor Cycle mu ngeilo mi tampi om lai hiven.

Sanggam aw, khasum tampi sangin duhduh ne, deihdeih leite na etet manin na deek kham lua kha ahiam? Sang daak lua hiteh…Na nuailam en dih ve… Nisim lut neilo, khasim sum lut neilo gilvah takin an ne khalo, tui dawn khalo, silh le teen gina neilo mi tampitak om hi.

Sanggam aw, khedap bulh ding thak lei zo, silh le teen thak lei zote na etet manin na deek kham lua kha hiam? Sang daak lua hiteh…Na nuailam en dih ve… Khedap bulh ding neilo, puan silh ding neilo, pheituam teen ding neilo mi tampitak om hi.

Sanggam aw, sang daak lua kha na hiam? Na nuailam hong en dih in… Pasian in nang tawh kituak in thupha namkim hong pia a, nang adingin ahoihpen vive mah hong pia hi.

Sanggam aw, sang daak lua kha na hiam? Na nuailam hong en dih in.. Pasian in mite mai ah hong maizum saklo a, nang tawh kilawm kituak in hong zeem hong puah hong zuun hi…

Na nuntakna ah thanem kisa den keei kei in! Nang sangin a lianzaw, a sang zawte enin deek gui khamin na omna panin na nuailam zong en zel in.

Nang tunna ciang, nang dinmun ciang tung zolo in, nang hong eeng mahmah mi tampi om hi. Banghang thanem in lungkia a, na Pasian tungah lungdamko theilo zenzen ding na hiam?

Topa’n nang tawh kituak thupha hong pia in, hong makaih den hi. Na deek gui a kham luat leh na nuailam en zel in… Lungdam, Dong Mung

Lai simna hanga i ngah hamphatna nam 10

Lai simna in:

1 – Lungsim thungaihsutna hong thahatsak hi.

2 – Khentel siamna, khinkhai siamna hong nei theisak hi.

3 – Lungkham lungzin lungkiatnate kiamsak tuam hi.

4 – Ciapteh theihna khuak hong khangtosak hi.

5 – Lungsim sungah daih hithiatna hong nei theisak hi.

6 – Laigelhna lamah siamna hong kibehlap sakin hong khangtosak hi.

7 – Lungsim hong thahat sakin hong hangsan sak hi.

8 – Thu theihna khang sakin hong pilvangsak hi.

9 – Kammal thuukpipi hong theisak in hong khangtosak hi.

10 – Lungnop, gualnopna a mawkna in hong ngahsak hi.

cih bang tuamtuam hamphatna nam 10 hong ngahsak hi. Lungdam, Dongmung/ Credit: https://bilingualkidspot.com/ 10 Benefits of Reading Books