Malaysia, PJ sung aom Billboard khat kicimsuk in mipi ki patau

Malaysia, PJ sung aom Billboard khat kicimsuk in mipi ki patau

Malaysia, Petaling Jaya vengsung aom Advertisement bawlna Billboard golpikhat kiasuk, ki cimsuk ahih manin khuasung mipi te ki lauthawng mahmah cih theStar pan kiza hi. Petaling Jaya, Jalan SS20/1 tungah tuni Friday (Dec 8) sunlampawl in thupiang ahihi.

Hihvai tawh kisai in thuneikhat ahi MCA Petaling Jaya Utara chairman Tan Gim Tuan in agenna ah hih buaina Incident hangin Kuala Lumpur khuapisung aom adang Billboard tezong bangacidiam, amuanhuai mahdiam ci’n ki lunghimawh mahmah cihi.

Adiakdiak in mipi omna Housing Areas tawh akinai in akilam Billboard te amuanhuailo ahih khakding kipau mahmah hi.

Tuaban ah hih Billboard tepen kumpi phalna mahtawh akibawl, akilam ahidiam, Legal mah ahidiam cihpen kitheilo hi. Tuni akicim Billboard pen lamzikpi Main Road tungah kiasukmawk a, khuasungvak mawtaw te kuamah dengkhalo bilbel hi.

Hih Billboard akiatsukna tengpen khuasung mipi te teenna Residential Area sungteng hisawnsawn a, hihbangdan buaina aom kikding pen ki lunghimawh mahmah hi ci’n genkhia hi.

Petaling Jaya mayor Datuk Mohd Azizi Mohd Zai in agenna ah hih akicimsuk Billboard pen alui hi a, aki phelkhiatsawm laitak in aki cimsuk cihi. Alui aomsa Billboard pen LED Billboard tawh laihding in akisawm laitak in aki cimsuk hi ci’n genkhia hi.

Hih Billboard bawltheih lamtheih nadingin phalna Licence pen 2003 kumin akipia cihi. Tukum August khasung in aomsa Static Billboard pen LED Billboard tawh laihtheih nadingin MBPJ te’n phalna apiak uh cihi.

More: Malaysia, PJ SS3 sungah numei khat aguaktang in kileh kawikawi ~ ZD

Alui aomsa Static Billboard pen aki lakkhiat laitak, vangik dopna Crane ii akhutbom pen kitan in Billboard pen akiasuk hi ci’n gencianna nei uhhi.

Hih Billboard kicipna hangin khuasung mipi te alim abaai omlo, Public Property zong asia omlo hi. Nitaklam 5pm hunin akicimsuk Billboard teng ki hemkhia khin hi ci’n Mohd Azizi in genkhia hi. Sawltak #zomidaily