Myanmar, Shan State, Laukkai khuasung kikapna hangin mi 30 val si

Myanmar, Shan State, Laukkai khuasung kikapna hangin mi 30 val si

China leh Myanmar gamgi aom Shan State, Laukkai khuasung ah Monday (Mar 06) ni in kikapna nasiatak in piang a, mi 30 val in sihlawhding hi cih AFP pan kiza hi. Laukkai khuapen Kokang Region ii khuapi hi a, Sengam tawh gamgi ahih manin khuanopci mahmahkhat ahihi.

2015 kum khitzawh Kokang Region sungah kikapna huaisia lua omlo himahleh hih Monday ni kikapna pen thaupi Artillery te nangawn kizangin nasia mahmah hi.

Suu Kyi’s Office (State Counsellor Office Information Committee) ii genna ah hih Laukkai khuasung akapgawp pen MNDAA (Myanmar Nationalities Democratic Alliance Army) kici thautawi te hi ci’n genkhia hi. Laukkai khuasung aom Kawlgalkap te omna Military Posts leh Police te aki ginlohding laitak in akapgawp uh ahihi.

Hih kikapna hangin mawhneilo khuasungmi tampi in sihlawh a, Sangsiama (Primary School Teacher) khatzong si hi. Thautawi MNDAA te’n Kawlgam Police Uniforms silh uh a, mawtaw honkhat halgawp in, Hotel leh inn pawlkhatzong halsakgawp cihi.

Kikapna apianhun pen Monday zingsanglam 2am hunpawl hi a, Social Media tungtawn in aki khahsawn Video sungah Monday ni sunlamdong in khuasung ah meikuangkuanglai cih kimuthei hi.

Hih thautawi tepen National Peace Talks ah aki helnailo te kici a, Northern Alliance inzong ami te un Laukkai khuasung kap cih genkhia uhhi. Kawlgalkap te nungkum December kha akipan Operations bawl uh ahih manin, amauleh amau kidalna in akap uh cihi.

More: Kawlgam Shan State sung aom Laukkai khuasung ah kikapna piang

Kokang tepen China tawh kilimzop mahmah uhhi. Kokang Region sungbang ah Senpau vive kizangzaw ci a, khuasung ahzong Kawlgamsum sangin Sensum kizangzaw cihi. Kawlgam sungah kilemna leh daihna lunggulhna tawh akibawl “Myanmar Peace Talks” pen lawhcing haklaileh kilawm hi. ZD Sawltak #zomidaily