I kulhpi ciang kik ni ~ Job Thawngno

I kulhpi ciang kik ni ~ Job Thawngno “Hong pai un, zahkona i ngah nawn loh nadingin Jerusalem kulh ciangpha ni” Nehemiah 2:17b.

1. A sunglam thu:
Kanan gam sak lam leh khanglam kikhen in, saklamgam Israel gam kici in, khanglamgam pen Judah gam kici hi. BC 722 ciangin Israel gam Assyriate’n simin la hi. Judah gam pen Babylonte’n thum vei simin la uh a, Jerusalem vut leh vai suah in sal in kai khin phial uh hi. Meigong tagah mizawng a poi teng bek nusia uh a, a kiim a om gamdangte in a omlai teng simmawh uh a, biakna lam kumpi lam pan nengniam in bawlsia den uh hi.

BC 538 ciangin Persiate’n Babylon gam simin zo-a, Babylon leh Judahte uksuk pah uh hi. Saltan zawh kum 20 ciangin Jerusalem pan Babylon ah Hanani hong pai hi. Jerusalem a kisiat gawpna, a dahhuaizia leh kulhpite a cipgawpna teng Nehemiah tungah gen hi. Nehemiah tusukin kapkap a, ni tampi an tang in Pasian’ tungah Israelte’ mawhna pulak hi.

Nehemiah pen Kumpi Artakzaksia’ leenggah zu a piapa, an luipa hi a, a maitai ngei loin a khin keei teh kumpipa’n dong in, “Na ci na hiam? Na dahna om hiam?” a cih ciangin Nehemiah in a vekpi’n gen a, a puahkik theih nadingin zong Judah gamah hong pai sak in ci-in ngen hi. Kumpipa in phalna pia bek loin huhna tampite zong pia a, a sawt tan ding limtakin dong hi.

Nehemiah in a gam a tun ciangin ni 3 sung tawlnga a, zanin sakol tung tuangin kulhpi limtak in veel hi. Upate leh Uliante kaikhawm in kulhpi ciankik ding limtakin kuppih a, a kisam ding van teng leh sepzia bawlzia ding khempeuh limtakin vaihawm ahih manun ni tomno sungin Jerusalem kulhpi ciang khin zo uh hi.

2. I kulhpi cim bang teng hiam?

(a) I minam sung i pawlpi sungah minam tampi kihel i hi a, pau tuamtuam zia/za tuamtuam a zangte i hih manin kitelkhialhna a om thei zel ahi hi. I Khristian nuntakna sang semsemin picing semsem ding tawh kilawm napi in pawlpi sungah minam sungah a behbeh a paina, a minamnam a kikhenna, a kampau zuia kipawlna cihte hong tam semsem mawk hi. Tua manin midangte adingin i etteh suahna, i kipumkhatna, mite’n hong en’na uh kulhpi khempeuh cim khinin pualam galte lutna simna hangin haksatna thuak hilo hiam? Hih in i kulhpi cipna lianpi khat ahi hi.

(b) Zomite a thumaan a citak, vaphual tawh a kiciamteh i hi a, zuauthu gen ngeilo, ‘Zuau in a khaap tawn, Thallam cil siat eimau tung tu’ cih paunak a neite i hi hi. Thumaanna tawh aitui dawn ngam in suang a pet ngamte zong i hi hi. Kampauna pan gamtatna pan zi leh pasal neihna panin a thumaan a citakte i hi hi.

Tuhunin ahih leh hih i hihna khempeuh, i thumaan i cihtakna khempeuh cim khinin thu zuau gen, guta sukvak tovak, nu leh pa mawhna, uangtatna cihte a kipan i vaphual hihna khempeuh beikhin ta hi. Hong kithei kei peuh leh hong kimu kei peuh leh ci-in zuaugenna, khemna bekbek tawh pawlpi sung, gam sungah kinungta mawk ta hi. Hih in i kulhpi cipna lian mahmah ahi hi.

(c) Zomite a ki-it a kingai diakte hihang a, nuntaklai hinlai bek zong hi loin sih khit ciangin zong ki-it lai-in ni tampipi a kikoih a kikahkahte i hihi. I uih i than donga kikih lote i hihi. Luhawm nangawn kum tampi mah an kipuakin galsung site a lutang bek nangawn a puate i hihi. Puak zawhlohte a guh taii ciangin kipuakkik ngiat hi. Hizah a thukhual a ki-itte i hihi.

Ahizongin tuhun in Khristian nuntakna sang semsemnapi ki-itna dai semsem a, itna gengen napi hangin ki-itna leh kikhualna bei mai ta hi. Thukhen zumah thunei la neite Khristian vive hiphial a, nisim a kitawng kisat kiliamsakte Khristian vive hita hi. I pu i pate kikhualna kinekngaihna, zu leh sa kibahna, zukholh sakholhnate koiah om ta mawk ahi hiam?

Khuado pawi, sialsawm pawi, unau khat beh khat phung khat annek khopnate koi ah beimang ahi hiam? “Thanghote unau in zong taangtang phel hawm” cih paunak a nei a zangte i hi a, Pasian’ deih ki-itna Jesu in, “Na pumpi na it bangin na Lawmte it in” acih a nuntakpih a neikhinte i hihi. Tuate khempeuh beikhin ahih manin i kulhpite cimkhin himawk lo hiam?

3. Bang ci ciankik ding?

(a) I kibatlohna tawmno khat thupisak lo zaw in i kibatna tampite thupisak zaw a, kipumkhatna kipawltheih nangin vaihawm den ni. Kibatlohna tawmno in kibatna tampi siasak kha thei hi.

(b) “Khris sungah kikhen lo hi” cih la i sak mah bangin Khris sungah sakmi khangmi pammi om tuan loin Khris lungsim neih ciatna tawh kipumkhatna lunggulh pen in nei ciat ni.

(c) I minam ciaptehna ahi i VAPHUAL, i thumaan i cihtaknate, ciam pello a tangtutnate khahsuah loin i mimal nuntakna i pawlpi nuntakna leh i gam sung nuntakna ah nuntakpih sawm ciat ni. Kampauna, gamtatna zi leh pasal neihnate ah thumaan ni. Guta sukvak tovak om loin thatang sanin i pu i pate mah bangin khawhsa kham, sepsa khamte hi ciat ni.

4. Nehemiah kulhpi cianzia etteh huai:

(a) Kulhpi cipna hangin an tang in nakpi takin kap a, kulhpi ciankik nopna lungsim nei pah hi. Ei zong i gamsung nuntakna en in mu a, lainatna veina tawh puahnopna lungsim nei ciat ni.

(b) Ama thubek tawh kalsuan mawk, sem gawp mawk loin kumpipa kiang pan phalna ngen a, tua khit ciangin Upa Uliante tawh a kikup khop khit uh ciang kulhpi cian kipan pan hi. Tuamah bangin eite’n zong kumpi lam, kim leh pam nuntak ziate en siam a, dothuaite dotna tawh nasep a siamte hih sawm ni.

(c) A cian ding kulhpite zan in sakol tung tuang kawmin vil khol a, a kisapna leh a kulna khempeuh mu masa hi. Ei zong na mawk sep, mawk gamtat loin a kisam dingte vil khol vankhol a, kiginkholhna tawh kalsuan sawm ni.

(d) Judah uliante, khuasung uliante, siampite kaikhawm in kulhpi a kisiatna, a cian kikhuainate genin nasem khawm dingin zawn hi. Ei zong i makai luite, i siate leh thu thei la thei khuasung papite thu dongin na semkhawm theite i hih nangin hanciam ni.

(e) Nasepna ding panmun hawm dimdiam uh a, amau panmun ciatciat ah na sem sak ciat thei hi. Ei zong siamna pilna kibang lo, uukzia vakzia kibang lo hita leh i hihtheih na mun ciat pan ma pang sak ciat in nasem khawm theite i hih nang hanciam ciat ni.

(f) Kulhpi acian sungun Sanballatte leh Samariate in simin do uh a, nawngkai sak den uh hi. Tua manin a langin nasem in a langin galvil uh hi. Hiam, namsau, teipi leh thal tawh sik puan silh in galdo uh hi. Eizong i kulhpi cianna ah hong simmawh, hong nawngkaisak nuam tampi om ding hi. Tua bang kawmkal mah ah kulhpi ciang kik ni.

(g) Ngimna hoih leh lawp mahmahna tawh nasem uh a, zing khuavak pan in nitak aksi suah dong na sem uh hi. Tua manin ni 52 sungin kulhpi ciang zo uh hi.

Eizong i ngimna i tupnate hoih sakin mimal vai beh vai phung vaite hisak kei ni. Gam leh lei minam hoih nang leh Khris minthan nading hisak den ni. Lawpna tak tawh na sem khawm ni. Tua hileh hun tomno sungin a kicimsa i nuntakna i gamtat i luhek i ngeinate hong kiciangkik in kulh muanhuai a nei, gal leh sa a patau lo a khangcing Zomite suak ding hihang. I kulhpi ciang khawm ciat ni. Job Nang Khaw Thawng (Nuntakna An Sermon Sawmnga)