Mangpha Pi Ning Suan Niang, Kum 64 (Tuimui)

Mangpha Pi Ning Suan Niang, Kum 64 (Tuimui)

USA gam, Texas State, Fort Worth khuapi a teng Pi Niang Suan Niang, Kum 64 (Mate beh) in abeisa November 28, 2017 ni nitaklam nai 10:00PM myanmar time hun, lamet hetloh laitak Zogam Tonzang zatopi panin mual ong liapsanta cihthu ih zakmanin Zomi Innkuan USA kipawlna in nakpitakin kidahpih, ki lainatpih hi.

Pi Ning Suan Niang pen Tuimui Khuami Guite beh, Tonzang khuapi a teng Pu Lal Cin Kham (Late) in a it mahmah a zi hi-in Pu Lal Cin Kham in abeisa April 4,1998 ni in leitung nusia khin hi. Pi Ning Suan Niang pen Zogam Tonzang Khuapi a teng a pasal u pipa a papi uh Pu Mang Cin Pau damlo vehdinga US gam pana avaciah hi-in Tonzang khuapi a tunma in Pu Mang Cin Pau in ong nusia khin a aluanghawm valap lai hi. Pu Mang Cin Pau kivuizawh ciangin ong damlo vat in zato a kipuak hangin siavuanten a nuntakna honkhia zo nawnlo in ong nusia leuleu ahihi.

I it mahmah Pi Ning Suan Niang pen tulaitak USA gamsung Zomite minam kipawlkhopna Zomi Innkuan USA kipawlna ah sumkempi (Treasurer) asem laitak Pu Pau Lian Tuang pianna Tunnu zong ahihi. Pu Lian Tuang zong pianna Tunnu ong nusiatna vaitawh kisai-in Zogam a vaciah laitakzong ahihmanin innlam vaikhempeuh amansiang ciangin cidamtaka USA gamsung ong tunkik nading ZIUSA kipawlna sunga a mapanpih board member khempeuh leh Executive officer tengin in thu ki ngetpih hi.

Hicibanga Zomi leh Zogam ading thalawp leh hanciam taka ma apang mapanpih khat in vaihamsa, hunhamsa ong tuahkhak manin kipawlna sunga mapanpih khempeuh in nakpi takin kithuakpih, kipuakpih mahmah hi.

Pi Ning Suan Niang pen Fort Worth khuapi bulphuh Zomite kipawlkhopna Zomi Innkuan Fort Worth ah pawlmi kician khat leh USA gamsung Zomite sihna vaiah luang kiphamzawh nadinga a ki vaihawm ZIUSA Genvai ah Active member khat ahihnatawh kizui-in Zomi Innkuan USA kipawlna in luangpham nadingin US $ 11,000.00 (Tul sawm leh Tul khat ) kipiakhia a, Paakkual khattawh zong mangpha khakna kinei hi.

I it mahmah Pi Niang Suan Niang luanghawm pen Tonzang khuapi sunga ZBCM pawlpite makaihna tawh a beisa November 30, 2017 ni-in vuina kineikhinta hi. I it mahmah I Nu/ I pi ong nusiatna hanga adah kap pianpih sanggam laizom, khuapih tuipih tanau meltheih beh lehphung teng leh adiakin a nusiat a tate ahi Nu San Lian te innkuan, Pu Lian Tuang, Tg. Hau lian te tungah I biak vanglian Pasian kiangpana ongpai khasiangtho hehnepna bukim ong tung henla lungnop tawldamna ongguan kimtek tahen cih Zomi innkuan USA kipawlna in thu kingetpih hi.

Dahpihna Lianpitawh,

Tg, Kai Lam Thang
Secretary of Genvai
Zomi Innkuan USA, Inc.
Tulsa, OK,
December 07, 2017