Muanpu leh Manno – 12
Hospital a tun uh ciang oxygen bung thuahpah, thahatlo ahih cianga sisan ann thun pah, aktui sial khawng dawnsak pah… nai 3 zawh khawng ciang hong khanglo a, a kiim a pam a et leh lupna vive mu ahih manin lamdang asa hi.
“Nu, i omna koilai a?”
“Manno, zantak na luvai in puk cin-a, zato ah hong puak hi ung”
“Aw, hi maw, nu. Ciahta ni, kei damta”
“Awle bawi, ciahpah ni maw”
“Doctor pa, ka tanu a damta hia, ka ciah theita uh hia?”
“Ciahta ding e, tu zan giak lai henla, a hoihtoh zel leh zingciang ciahta un aw..”
“Awle, doctor”
“Tun, zan hong sawt ding, lup hunta ding ahih cianghong ciahsan ningin, noh na nu tawh na om un maw?”
“Awle, pa”
Zan ciang a pa bek inn ah a om khinkhian laitak phone hong ging kik…
“Hallo….”
“Hallo, Muanpu hiveng, Malaysia pan…. Manno ka hopih thei diam?”
“Hopih thei kei niteh, hospital ah om… bang gen nuam na hia?”
“Aw, ka itna thu khawng hi. A lamdang lua hi kei….”
“Aw, na gennopte damin hospital pan ong ciah ciang na kiho mai uh kul lo dia…”
“Awle, lungdam ei leh… mangpha”
“Mangpha”
Ciangsau zong a panote inn ah ahawh laitak inn pan hong kisam a, a va ciah leh gamdang pan phong hong kisam na hilel tak hi.
“Hallo, Ciangsau… Manno bangci a, hospital ah lum cih a gen vua?”
“Hallo, nang kua?”
“Kei Muanpu, Malaysia pan…”
“Aw, aw, aw…. himah ei. Ka lawm Manno, zanhal nitak a inn vuah phone a let laitak kipuk in sibup a, khuaphawklo in om a, zan zingsang ciang hospital ah kipuak hi. Tun bel oxygen khawng a kipiak zawh ciang khuaphawk ta, a hoihzel leh hong ciah haknawn se diam…”
“Aw, (aw, aw…. ka hopih nintak, ka hopih nawnloh ciang kipuk ahi kha tam aw), lungdam ei… ka phawkna thu na gensak in maw”
“Aw, aman zong nang hong phawk mah hiven, nang lawmngaih dang neihsan cih a zak ciang a lungtang na salua ahi tam maw….”
“………. tua bang om sam kei e…….”
“Om cih za ka hih ciang vua…..”
(zop lai ding)
Hau Za Cin
Phuitong Liim
Comment piaknop aomleh...