MP Pu Kham Khan Thang teelcing angahna Tonzang huamteng ah zinkawikawi

MP Pu Kham Khan Thang teelcing angahna Tonzang huamteng ah zinkawikawi

Tutung Kawl tuibuah leh Hluttaw Meeting kikhak sung MP Pu Kham Khan Thang in ama teelcingna Tonzang huam tengah va zin koikoi thei hi. April 12-15, 2018 kikal sung Zogam gamgi dung khua tuamtuam ahi Tuimang, Luangel, Saipimual, Dalkhai (Old & New), Tauleng, Mauvom, Cikha, Tuimui, Haiciin, Tualkhiang, Pangmual, Puantal, Vaanglai leh Khenman khuate va van koikoi thei hi. Tua bang ava zin koikoina khuate in lungdamtak leh aangtangkak na zindo zihziah uhhi.

Apaina khua khempeuh aa om khua makai hausate leh khuanu khuapate tawh MP Pu Kham Khan Thang in Hluttaw sung nasepzia, tulai gamsung kumpi kivaipuakzia khuamite’ theihcian ding teelnoptakin pulaakna nei koikoi thei hi.

Tua ban ah apaina khua tengah khuamite’ kisap tuineek, pilnasang inn (စာသင္ေဆာင္ နွင့္ ဝန္ထမ္းအိမ္ရာ), khuakim ah cidamna phual (ေက်းလက္က်န္းမာေရးဌာန/ဌာနခြဲ) ngah theihna ding vai, khuakim ah meitanzawhna ding vai, khua khat leh khuakhat kikawmna lei leh lampi vai cihte khua makaite tawh kamkupna leh ngaihsutna pulaakna, mailam nasepzia dingte kikum thei uhhi.

Khua makaite lam pan in zong gennop bangbang MP pu tungah hangsaktak leh lungsim siangtho tak tawh khua leh tui khantohna ding kisapnate hong pulaakkhia ziahziah uhhi.

Tutung Zomi MP Pu Kham Khan Thang in ava phaak koikoina khuate lungdam thei leh khamuang tuam mahmah uhhi. Tauleng khua makai khat in Pu Kham Khan Thang’ kiangah “Tuma kum (5) lai (2010-2015) hun sung bang MP te muhhak mahmah mawkin ki lungleng mahmah hi mah leh tutung iminam party Zomi Party in hong mapanzawh kum (2) val deuh sungin khua leh tui khantohna tampi hong kilangh hanhan ahih manin Hluttaw khak sunsun teh hun ngahlo kawmkal ah hong pha tanghtangh MP pute tungah ko khuabup aitangin ka lungdamna kong pulaak nuam hi” ci’n alungsim tawng pan aphuulkhia kammalte hong luikhia hi.

Tua acih zahkhop in ah khuakim kizopna lampite leh adiak Tonzang huam khua (Tonzang gungal) lampite pen nidang abeisa kum (60) tawh tehna’n tusung na kilamdang tatak mawk mah e maw! ci-in MP Pu Kham Khan Thang azui Zogam aphaakloh zawh’asawt simsimta khangno khat in ama muhna hong pulaak hi.

More: Kawlgam kiteelna leh Zomi MP thakte muakna

MP Pu Kham Khan Thang in zong akhuakhua ah om khua makaite’ kiangah avaikhak koikoi in ah “khuazangbup kilemna leh ki itna kithuman diamdiamin khua-le-tui khantohna mapanna ah khut khat tawi khekhatkhai bang amapankhop liailiai ding uh vaikhakpi in nei thei aa, khantohna lam bel (development) ahih theih zahin taangpi taangta ading apanlaak ding khuamite tungah kamciamna leh vaikhakna nei tanghtangh hi. Akhuakhua ah om khuamite in zong vaimuakna leh pahtawina thupitak na nei koikoi uhhi.

Zomi leh Zogam khantoh nading Zomi minam party ZCD damsawt henla Zomi ta’ding zing nithak hong suak mengmeng ta hen! Bob Tuangpi