Zeisu sisan vangliatna zangin
Thu-um minih teti pan sak sawnna: March kha 21 ni Tulsa ka pai na ah, thupiang pawlkhat Musalim pan a kikhel MawMaw Thein leh a ta nu in thunget deih in OKC pan ong delh hi. A mah pen Sia Kam Ngin tungtawn a na piangthak in a ci zong na dam ahih man in, teci pangin nuam a sa mahmah hi.A hi zongin, aci damna kisam lai hi.
A ma nuntak tawntung in a nat dan pen a ngawng teng ah hi a, tua mun zato lam a ki lah ciangin, a spinal cord teng ah avang dan maw, spot dan maw om suk ditdet hi. At ding ci uh a, aki velvel na zato lam pan sum tampi bei khin zo hi. Leiba loh zel na sem zel hi. Tua bek thamloh in a ngawng pen tangtak dak zolo ahih man in, a dak zawh na ding zatui ki sun zel hi. Tua natna teng mah in amah pen Zeisu Khazih upna ah apuak na hihi.
Hun khat ciangin, Zotung sia Pasian mizat khat pai in, tua kikhopna sung ah ku in kap in, anatna ong nuam tuam leuleu hi. A hi zong in, adam tuam nuam tuam bek hi a, apumpi sung ah natna tampi om kawikawi ahih man in, zatui pen habak den hi. Mi khat in Youtube pan Pasian thu ka hilhna leh cidam na te na mu kha ahih man in, tua pan in ka phone no. na ngah khia a, Tulsa pai ding aki ciam thei ka hi uh hi. Ama ngaihsut na ah, tutung tatak ciangin, dam taktak kei leh hi thei nonlo a ci na hihi.
Pasian Kha Siangtho in na ong sem a, a nuntakna avekin ong gen (Personal inventory) ka hih sak khit teh, mawh thumna kisikkikna ah paipih in, nuntakna lui, biakna lui teng nutsiatna pulak khiatna neih pih in, tua pan in, Muslim Pasian Alah dawi ka sam khia masa hi. Ong ling pah kelkel in, abanban in dawi tampi pusuak hi. Atawpna ah Khin Maung Soe aki ci min khat tua nu kam pan ong ki lo in, kap gawp a, akhut lang khat in angawng tung teng ah len in, “Ka pai khia kei ding hi, amah ka ngai lua hi.cik mah ciang ka pu suak kei ding aci hi” Thai pan hi lo na hiam? Ka cih leh hi mah ingh, ama pumpi mun khempeuh ah ka om khin ka luah khin hi a ci hi. Zeisu min suangin hawlkhia in, atawpna ah ong pusuak khia a, tua nu zong tangzang ki sa in nuam lua mah mah hi. Tu in ahih lah a zatui neek teng ne nawn lo in ka dam hi a ci hi.
Thu-um mi tampi tak in, Zeisu hon pa leh Topa in aup khit uh ciangin, na khempeuh aman pah ahih lohna ki mu thei hi. Tua hih man in Pasian in Laisiangtho, Kha Siangtho, leh nasep nading letsongte anei, Apostle,Prophet, Evangelist, Teacher leh Pastor te ong na koih sak hi gige hi. Zeisu thu I zak a I san ziau ni pen an sai a, an lei ding a, I ciap bang hi a, kisik kik na mawh sutna te abei sa a khempeuh “Good Bye” I cihna hun tawh I zop ding ki sam mahmah ahihi. Gupna ngah na ding upna pen Zeisu nungzuih ding I khen tat a, abeisa te I nutsiatna ahihi.
Thuman thutak I theih taktak leh tua thu in ong khahkhia ahihi. Mark 16: sung ah thu-um mite tung apiang ding thu te lakah nam khat in, dawite ahawlkhia ding uh hi a ci hi. Tua in mihai te sung pan dawi hawl ding na ci tuan lo a, dawite hawl khia ding na ci limlim hi. Piangthak thu um khat peuh mah in, ama sung a, nuntak na lui sunga a uk a ma kaih dawite pen ahawl zo dingin Pasian in vangliatna ong pia ahi gige hi.
Hih thu I tel zawk na ding in, ka ciah kuan March 26th ni a ka ki muh pih Sia Lian in ong thugen tawh ka hong hawm sawn nuam hi. Sia Lian pen Tamu te hi a, tu in Tulsa ah a zi Phengnu tawh tengin, Sia Khaipi(MCC) te pawlpi ah Associate Pastor sem hi.Malay aom lai in zukham an kham te vei in amau te tungah Pasian na sem hi. Amah pen nidang in, Karate lam ah black belth ciang tungin a hilh zong hi ngei hi.
Boxing zong tum ngei hi. Karate a aki mawl lai in, alen ziahziah theih na ding in apum tungah alu tung khawng ah kawl phungyi te phuisamna zatui te kisun zihziah hi.Tua zatui in tha anei sak hi lo a, dawi tampi asa sungah lut ahih man in, huihlak ah aleng thei uh na hi zaw hi. Apianthak ciangin, Pasianna sep na sungah alut ciangin, Karate leh boxing akhawl hi. Ahi zongin, aheh ciangin, amit san gelgal in, aheh sak mipa mi nu pen en in, agilzang khawng lakhia in, asa nekding cih zah dong a om aci hi. “ Ka zi in, na heh teh lau huai lua teh” ong ci hi” ci hi.
Tua bang hun lian in, Kha siangtho ki phawk sakna khat ong suak a, ka lungsim ka khiap suk ciangin, ka hehna, ka sa nek nop na te abei zel hi” a ci mawk hi. Nisim Pasian tawh aki zopna, alai siangtho sim na thunget na te khiam lo in pai suak a, aom ciangin, nung kum November kha,2017 sung zan khat amang sung ah, dawi te in hopih in, ko ong ngai non kei the, ko zong nuam sa non kei ungh, ka vek un, na pu suak nung ci in, dawi tam cih tak atam pi pusuak khia uh hi aci hi. Zingsang ka thawhciangin, ka tang zang mahmah a, tua a ki pan hih bang dan heh na ding ong pai hangin, abeisa ngaihsut bang ka nei non kei ong ci hi. Apianthak khit kumtampi tak tua khanin te akem khinkhian a na hih na ki lang hi.
I piangthak ciang in I mi lui leh mithak pen ki vatvat lai a, tua te pen dawi hi kei I ci hi. Ahi zong in dawi or khanin te mah hi. I sungah Khazih Kha siangtho pen deposit bek ong ki pia hi a, akahn sak ding pen ei lampan I tavuan/ I mawhpuak hi gige hi. Hih sia Lian nuntak na ah, tua milui mun apaik loh man in asawt the avek un pusuak khia uh hi. 1 Cor 10:13 na ah, Ze-etna tawh ki sai in, I zawh theih na ding huhna Kha siangtho in ong piak tawntung pen I zawh sak ding ki sam mahmah hi. Gualzawhna pen automatic a ong pai hi lo a, ei lampan in zong Pasian tawh ki it ki ngai,kihta in kizop ding ki sam mahmah hi.
Ephet sung ah na hehna uh ni tum sak kei un, dawimangpa akhuan na pia kei un acih thu I thei hi.
Tu in, mimal khat ciat in, abeisa dawite vai ahi, khutlam et, ai san na, Pasian thu tawh ki sai lo mi biakna khawng I va zuih haihai na te pen khanin te in I ci I sa sung or tung ah ki belh in na sem nuam mahmah a, tua te pen thei khol kei le hang, I khantawn aki buaipih thei mahmah ding ahihi. Thei baih in, mawhna nusia baih, khanin hawl khia baih , Zeisu nungzuih ding mah ci tentan baih leng, tua dawi te aki zo zo ding a, ei te singlamteh hangin, vangliatna ong ki piaksa hi a, I nuntakna ah mapai daupai baih ding hi zaw ahih na teci pan sawnna leh hopsawnna ka hong nei nuam hi.
(Atung a mite kiangah phalna tawh hih lai kongat hi.) Dim Lun Zam
Comment piaknop aomleh...