Tunnu It Na ~ Rev. S. Lang Kho Gin

Tunnu It Na ~ Rev. S. Lang Kho Gin

Thupatna: 1 Kum. 3:16-27 May kha nipi nihna pen “MOTHERS’ DAY” ci-in kumsimin kizang hi. Nute Ni hong kipat khiatna American numei Anna Jarvis in a nu May 9, 1905 in si-a, Anu it lua, phawk lua mahmah in anu-in Nipi sang kumsawmnih asepna Methodist biakinn ah Nipi-sang thuneite kiangah ngetna bawl hi. Tua biakinn ah 1908 kum in Nute phawkna in kikhopna kinei in tua pen Nute’ Ni kici hi. May 8, 1914 in U.S.A. President Woodrow Wilson in May kha nipi nihna pen Nute’ Ni ci-in hong pulak khiat a kipan tuni dong Nute’ Ni kizang den hi.

A. TUNNU ITNA:

i) Ta kituh nupi nih: Kumpi masa 3:16-27 sung I sim leh Solomon hun lai in numei nih ta kituh in Solomon kiang hong kihek uh hi. Solomon thukhenna pen ahing naungek phelnih suah in nupi tegel kihawm dingin thukhen hi. A nu taktak in ata sih ding ngaihsun ngam loin alawm nu’n ahingin tang leh cih deih zaw hi. A khat nu pen in khasiat se lo hi. A nu itna hangin tua naungek kithat loin anu in tang hi. A nu kineih khem pen in naungek asih ding zong phamawhsa se lo hi.

Hong gimpih i nute in atate uh hong it mahmah cih kilang hi.

ii) Miss India-2009: Pooja Chopra apian zawh nisawmnih a phak in apa-in thah sawm hi. India gam Hindu mite mo-van ken (dowry) hangin nu le pate zawnlawh tampi om hi. Ta numei deih lo uh hi. Pooja Chopra anu’n it lua ahih manin a pasal kiang pan taikhiat pih in, itna leh lainatna tawh hong kem picing hi. Miss India kitelna 2009 in MISS INDIA TITLE hong ngah hi. Nu itna leh agimpihna hangin hih bang minphatna ngah ahi hi.

B. NA NU-IN NANG HONG GIMPIH:

Na nu-in tu-a na dinmun natun nadingin bangzahin hong gimpih hiam? Nang hong haih lai in nibang zah an leh tui duh loin om hiam? Na nu’ gilsungah kha bang zah om na hiam? Na nu-in aphei tungah it takin hong tawi in anawitui tawh hong vak tapa/tanu na hih lam mangngilh kei in. Tu-a na dinmun na tunna dingin na nu-in bang zah hong gimpih hiam?

Na khuasak, aniam in asang zongin, na pil in na hai zongin, na hau in na zawng zongin, na nu-in hong gimpihna na mangngilh leh nu hong pia Pa Pasian maipha ngah ngei lo ding hi teh. Pasian ka it hi na cih leh Pasian na itna, theibang senlai na tunnu tungah lak in. Zosuan tate nu-it lo i tam luat manun innkuan, nam leh gam in THUPHA ngah thei lo hi. Gospel(Itna) zosuante’n i zak zawh kumza val phata hi. Gospel I zuih zawh uh kum bang zah a pha ta diam? Nu in a nunkhum tawh hong vak atate hong it lua ahih manin atute dong ah itna luang suk lai hi.

A tanu, a tapate in pasal/zi nei khin mah leh abuai lamlam huh dingin nu kiman den hi. A hatlai in a tanu/tapate a buai lamlam in nu om pih ut kitam na pi-in a teek, avuai ciangin atate a kem/om pih ut ki-om nawn lo hi. Na nu hong itna leh hong gimpihna, a sih nunga, damlai hileh, ka nu tungah tua bang, tua bang hih/gen ning na cihte nu nei lai tate’n tuni-in lungdamna lak in itna tawh kem-in, nu-in a thupha hansungah paipih man kha ding hi.

i) Birbal mipil pa in nu itna hih bangin gen hi: Akbar the Great hun lai in mipil mahmah Birbal in Nute itna tate’n a phawk loh dan hih bangin gen hi. Nupa om hi, tapa khat nei in a sawt lo-in a pasal si hi. Tua nu’n atapa kisapna khempeuh adingin sun leh zan in man lah den hi. Atapa hong gol ciangin zi hong nei in Akbar vaihawm upa khatin hong panga kumpi inn khat luah hi.

Anu in atapa kiang “Nong it taktak leh hong ciah inla ka kiangah hong giak in” ci-in sam hi. Hih Ministerpa zong anu kiang hong tun ciangin,“Nu aw, bang kisam na hi hiam? Na deihdeih gen in” ci hi. A nu’n,“Bawi aw ka kisap om kei, tuzan ka kiang hong giak in hong ngai lua ing” ci hi. Khua hong mial in lum dingin hong kithawi in a nu kiangah zan giah ding kihta mahmah kawm in hong lum hi. A khua uh tunna ding lamsuk, lamto paina in agim manin ihmu pah hi. Ihmut nop …..laitakin anu in “Bawi tui ka duh” ci-in atapa phong hi.

A tapa zong tho-in suah pah hi. Naikhat zawh ciang atapa phong leuleu in “Bawi tui duh ing” cikik hi. A tapa tho in tui suah hi. Ihmut nuamtak hong ihmut zawh in a nu’n “Bawi tui ka duh” cikik hi. A tapa tho in tuisuaha, a lupna tungah anu’n buasak kha ahihmanin, atapa in anu taai hi. Tua ciangin anu-in a itna leh a gimpihna thu hibang in gen hi, “Bawi na ngek lai, phalbi khuavot zan mial ah lupna ah zun na tha-a, puan dang nei lo I hih manin na zun kawt ah kei lumin, ahulna lam-ah nang kong sial a, na zun kawt pen ken ka delh keu hi.

Zan khatin zun nih/thum vei bang na thak ciangin na zun kawt ah lum in khua ka vak zel hi. Kong itna leh kong gimpihna, na damsungin nong loh zawh na ding om lo hi” ci hi. Na nu hong itna leh hong gimpihna ahiding mah in tuat ken. Tua na dinmun na tunna dingin na nu’n bangzahin hong gimpih hiam? Tui sik a na-om lai a kipan tu-na dinmun, na tunna dingin na nu hong gimpih na phawk in na nu lim bawl mahmah in.

ii) Manager ding interview thu: Company lian mahmah khatah manager ding lakna dingah laisiam mahmah tangval khat va kihel hi.

Director pa’n a lai kisamte a etcian zawh in laisiam sa ahih manin manager dingin deih mahmah in thu dotna tuamtuam dong hi. Khatna-ah scholarship na ngah hiam? a cih leh ngah ngei lo cih tawh dawng hi. Dotna nihna-ah, na laisim na dingin na pa-in hong gimpih ngel ding aive maw? a cih leh, kei kumkhat ka phakin ka pa’n hong nusiakhin hi ci leuleu hi. Dotna thumna ah director pa’n kuan na laisimna ding leh na kisapte hong sik hiam? Ka nu’n hong piaksak hi ci-in dawng hi. Dotna lina, Na nu-in sum koi pan ngah hiam?

Dawnna, ka nu’n puansawp a sum angahte tawh sang hong kahsak in akul khempeuh hong leisak hi. Tua zawh in director pa’n tua pa khut a etsak leh nosuak lua keei hi. Dotna khat bawl kikin na nu puansawp na huh ngei hiam? Ka huh ngei kei hi, bang hang hiam cih leh ka nu’n hong it lua in lai kasiam ding hong deih lua ahih manin na hong sem sak lo hi. Director pa’n na inn uah ciah inla na nu khut va silsak inla tua zawh hong pai kikin ci-in kikhen uh hi. Tua pa zong ciah pahin a inn a tun ciangin a nu khut sil dingin hong kithawi hi.

A nu’n lamdang sakna lianpi tawh na dawh hi. A nu khut hong silsak leh kham zawh loh in a khitui hong phul khia hi. Bang hang hiam cih leh anu itna leh gimpihna – anu khut liamma pawnte in a lungtang hong vut/sun kha hi. A theih loh kalin anu khut na vuai gawp ta hi. A mah vakna dingin anu sepgimnate leh natnate a muh ciangin, pai khia in khitui luang kawm in anu puansawp zawh nai lohteng sawpsak hi. Directorpa tawh kimu dingin vapai leuleu hi. Director pa’n na nu tung panin na sin/muh thak om hiam? ci-in dong hi.

Ka nu khut ka sil sak zawhin a puansawp khit lohteng kasawpsak hi. A hong itna, hong gimpihna hangin kei hitan atung ka hih lam athak in ka phawk hi. Ka nu-in tua zahta-in a hong itna sepna tawh na pang lo hileh tuni- in kei na mai-ah ka hong ding thei kei ding hi. Hih bang nu ka neih manpha lua sa-ing a cih leh director pa’n, Nang bang mihing, mite manphatna a thei, sum bek tawh buai lo-a lawhcinna dingin midangte in bangzah takin hong gimpih uh hiam cih a thei siam Manager a zong ka hi hi. Tua bang mi hong mu kha ka hih manin tu-in nang kong la hi ci hi.

C. JESU IN HONG GIM PIH:

Kum 70/80/100 etc, i nuntakna ding nute in hizahta in hong gimpih ahih leh tawntung nuntakna dingin Jesu’n bang zahtakin hong gimpih diam?

i) Jesu hong kipatna Van mun thupi ah nuam tak a om lai, A thupina khempeuh nusia in leitungah mibangin hong piang hi. A hong kipatna thupi leh nuam lua ahih manin leitung hong pai zong nang hong gimpih na ahi hi.

ii) Hong pianna mun (Lk. 2:1-17) Tawntung nuntak nuam na ngahna dingin Jesu’n lam hong lahna in hong genthei na mai ee maw? A pianna mun gan buksung, a kisialna gan annekna kuang sung ahi hi.

iii) Nazareth khua mi Jesu khan khiatna khua Galilee gam sungah khuata Nazareth ahi hi. Khuata nuntakna leh khuapi nuntakna pen kibang lo hi. Khuata pen naupangte genthei mahmah uh hi. Hih ong tu-a na dinmun, bek hi loin vangam na luah na dingin hong gimpih na ahi hi.

iv) Jesu Gethsemane huan ah (Mrk.14:32ff) Jesu in a thuak ding thei ahih manin apa kiang thungen in, “Hih ka thuak ding gimna tawh hong kipelhsak in” ci-in thungen hi.

v) Jesu Uliante mai-ah (Mrk. 14:53ff) Uliante mai-ah kam khat beek pau lo hi. A dikna thu kam khat gen leh suakta ding hinapi nang leh kei in vantung gam i luah theihna dingin mawhsak thukhenna hong thuak hi.

vi) Jesu Pilate mai-ah (Mrk. 15:1ff) Jesu mikhempeuh in mawhsak uh hi. Jesu in adikna kamkhat beek pulak lo hi. Nang tang in mawhlawh tawi hi.

vii) Jesu kisim mawh (Mrk. 15:16ff) Linglukhu khusak in cilphih uh a, sat in engko uh hi. Singlamteh pua sak uh a, gim lua in pukpih leplep hi. Jesu-in hong gimpih na lua hi lo maw.

viii) Jesu Samsiatna ngah mite kibawl bangin Singlamteh ah kikhai hi. A pa’n nusia/taisan ahih manin, nakpi takin kiko a,“Ka Pasian, ka Pasian bang hangin kei hong nusia/taisan na hi hiam?” ci hi. Na mawhna khempeuh a puak manin a pa-in taisan/nusia hi.A hong itna gimna leh thuakna tawh hong lak hi.

D. HONG GIMPIHTE’N LAMETNA HONG NEI HI:

Nute nau awih la, na ngek lai-in na nu in hong pua/nau luai ah vei kawm in hih la tawh hong awi ihmu zel hi. “Bawi aw hong khang mengmeng aw, pam a luidawng hong bang aw; Pam a luidawng nong bat ciang, nutha khek aw pa tha khek aw bawi aw e” ci-in lametna lianpi hong nei uh hi. Na nu hong lametna tungsak dingin hanciam in. Nute hong lamet bangin Jesu in zong hong gimpihna pen lametna lianpi hong nei hi. Mi dangte nungzui suahsak ding hong lamen hi.

E. TOPA IN TAGAHTE HUU HI (Pau. 23:10-11):

Tagahte’ leitang Topa in huutpih in amaute pawlpih ding kamciam hi. Na nu meel zong thei man loin hong sihsan a nong khua theih ciangin kamsia kisa in nuntakna cimtaakin na om kha hiam? Leitungah hong it ding khat zong a om loh laitak in nang hong it in hong gimpihmahmah khat om hi. Tua pen kua mah dang hi loin Jesu ahi hi.

Tulai takin lam-et bei in na nuntakna kicimtaak lua in kithah ding bang na geel kha phial zongin na nu sangin hong it zaw Jesu-in hong sam hi. Na mai lam hun a ding lam-etna Jesu sung bek ah om hi (Jer. 29:11). Hih geelna pen nang siatna ding hi loin nang hoihna ding tawntung nopsakna ngahna ding ahi hi. Tagah kisa lua in lam-et bei in om kei in, nang tungtawn in Pasian in na lianpi khat sem ut hi. Nang mikhat na suahna ding tan bek hi loin vantung gam na luah theihna dingin Jesu in hong gimpih mahmah ahi cih phawk in Jesu bel tinten in nang hong it lawmpha pen hi.

THUKHUPNA:

Kumpi masa 3:16-27, sung a nupi nih naungek hing kituhte mah bangin i nuntakna pen Pasian leh Satan kituh den hi.

Hih naungek a gimpih nupi in asih ding aphal loh bangin Jesu in hong gimpih lua in sihna Hell sung i tun ding hong phal lo hi. A gimpih lo nupi in naungek sih ding a ut bangin Satan in Pasian haza in eite sih ding leh siat ding pen phamawh sa loin i siat theihtheihna dingin lampi na bawl den hi. Tuni-in Pasian hong itna na muh theihna pen na nu ahi hi.

Na nu hong itna leh hong gimpihnate na phawk khiat theih kei leh Jesuin hong itna leh hong gimpihna, na phawk khia thei kei ding hi. Jesu hong itna leh hong gimpihna na phawk theih leh na nu tungah Jesu na itna zahzah itna na lak ding hi. Nu manphatna thei-in nu tungah lungdam kohkoh a itna a lak den ta i hong tam ciangin mimal, inn kuan leh minam in Nu’ Thupha I ngah dinga, Zosuante Thupha ngah Minam hong ki ci ta ding hi. Amen. Rev. S. Lang Kho Gin