Na Hoih Sep ~ Pau Khan Sing
I nuntak sungin i tup lian pen dingin lawhcin aa, minthan in vangneih ding cihte na hi masa lo aa “Na hoih sep” mite ading a phatuam theipen a nuntak hizaw cihphawk huai kasa hi. Ahau aminthang avangnei mi tampi na hoihsem khollo aa amau adingbek sem kitam mahmah hi.
Vangam i tun ciangin leitung aa i lawhcin na tampite sangin mite ading na hoih i sepkhak sunsunte in man ong nei zaw ding hi.
Tangthu khat sut dihni…
Pasian mi mahmah khat om in, a nuntakna siangtho takleh mite ading manpha takin zang hi. Mi khempeuh in it in, huh ding kilawmte huh aa, akisap nate uh ama hih theih bangin sepsak zelzel hi.
Nikhat ni-in Pasianin tua mipa acing vanmi kiangah ka mi siangthopa kiang vapai inla, Pasianin adeih penpen khat dongin vasep sak in ci-in sawl hi. Tua mah bangin vanmi zong vapai takpi aa mipa deihpen pia ding ci aa sawlna ngah ahih manin mipa ong hopih pah hi.
“Cinate thu na ngetsak ciangin dam pahpah lianlian leh na ut hiam, na deihleh ongpia ding ka hi” ci-in dong hi. Mipa in “ka deihkei hi, ka thungetsakna Pasian in ongza henla, ahi zongin Ama’n adeih hunciang damsak leh ut ingh,” ci-in dawng hi.
“Ahihleh mite lakah thu nagen ciang mikhialte lungtang khoih henla, akhialhna panun kisik pahpah le uh na ut hiam” ci-in dong leuleu hi. Mipa in “lungdam ing ahi zongin Pasianin mite tungah Ama thu gentheih nadingin hunpha leh damna ongpia zel henla ahi zongin kisik kikna ahihleh Kha Siangtho nasep hizaw hen” ci in dawng leuleu hi.
Vami in dong leuleu aa “mipite in nang hong etteh theih nading in hoihna bukim nadeih hiam” ci-in dong hi. Ahi zongin mipa in dawng leuleu aa “hihzong hikei hen, hih in Pasian ong bangsak ding aa, mite in Pasian etteh loin kei hong etteh kha ding aa, Pasian sangin ka kiliansak zaw khading aa alauhuai, Pasian bek etteh le uh ka ut,” ci-in Pasian mipa in vanmi dotna thumte avekin nial hi.
Atawpin vanmi-in khatvei hong dong leuleu in “ahihleh bang ong hih sak leng nadeih hiam?” ci hi. Pasian mipa in “Pasian in katheih khakloh kal nangawn aa mite ading aa thupha nahoih sem ka hih nadingin ong panpih leh ut ing,” ci-in dawng hi.
Pasian in adeihna bangin pia pah hi. Tua mah bangin Pasian in zang mahmah aa, ahawh aciahna munpeuh ah ama hangin mite in thupha ngah in amah nangawn in thei khalo zizen hi. Ama theihloh kalin apai na peuhpeuh ah huh huaite, panpih huaite panpih ahih manin mite lungdam mahmah in thupha sang uh aa ahizongin mipa in bel bangmah thei khalo lel hi.
Sanggamte hih Pasian mipa tung panin sin theihding tampi om in ka lamen hi. Nang le kei in na khatpeuh i sep ciangin mite ading ahoihlo thupha ahih khakloh ding lau huai mahmah cih ngaihsut huai hi.
Tulai in ei Zomite lak ah na hoih tampi i sep sangin mite sep i huhkhakte nangawn i ki sialhpih nuam mahmah lai tazen hi. Ei Pasian nasem a kici te in nahoih mite ading thupha bawl sangin khasum tam dingleh sumpi tampi ngah aa tuate zeekkhak dingbek ngaihsun tawh i kibang ta hi.
Tua mah bangin kumpi lamleh mipi ading nasem kha khempeuh zong ki ngaihsut huai hi. Pasian in panmun le za ongpiak pen mite adia thupha, ahoih na i sep theih nading hizaw aa mite tungpan ngah ding aa ongkoih na hizaw hetlo hi. Mite ading ahoih sem peuh lehang Pasian in ei adingin thu hong hoihsak ding na hi lel hi.
Atawp na ah i ngaihsut mahmah ding thu in i Pasian nasep na mun ah, Pasian in mipite ading sep theih nading mun ah ong koihciang bangci bangin i sem hiam cih tangthu tung tawnin ki ngaihsun kik ni.
Lungdam, Singpu (Pau Khan Sing)
Comment piaknop aomleh...