Mozambique ah Fuel Tanker puakkham, mi 73 si

Mozambique ah Fuel Tanker puakkham, mi 73 si

Nov. 18, 2016: Africa continent sunga om Mozambique gam-ah petrol puakna mawtaw puak kham a, mi 72 a sih banah mi 100 val in liamna tuak hi ci-in kumpi ulian ten pulak uh hi. Mozambique government official ten statement a piakna ah tua petrol puakna mawtaw pen Malawi panin Beira zuan a tai hi a, Tete province sunga khuata khat ah khuami ten petrol la dingin a kithawi lai tak un a mawtaw sa lua ahih manin puak kham a, kilumlet vau (overturned) hi ci hi.

Hih thupiang a kizak cil in mi 43 si kici a, tua khit a sawt loin ulian ten mi 73 si a, mi 110 kang gawp hi ci-in pulak kik uh hi. Local journalist khatin AFP news agencyte kiangah tua mawtaw pen zan nitak lamin khuami ten a mawtaw panin petrol tui lawng in la khia (siphon off) dingin a kithawi un puak kham hi ci hi.

Liamna/katna tuakte Tete provincial hospital ah kipuak a, kumpi in tu ni-in hih thupiang en dingin minister thum leh hutkhiatna nasem (rescue workers) sawl hi. Mozambique pen leitunga gam zawng pente lak-a khat hi ci-in International Monetary Fund in ciamteh a, 1992 in tualgal na piang a, tua hangin tu dong gammi ten sum leh paai lamsang giautauna lianpi tuak lai uh hi. Nung diakin Mozambique gamte sum (currency) pen dollar tawh a kikimna nakpi takin kia ahih manin kumpi in namgimtui man khan’sak beh hi. New Agencies/ Thang Khan Lian