Duterte in galtai kalading uh a, inn kapia ding uh ci

Duterte in galtai kalading uh a, inn kapia ding uh ci

Nov. 18, 2016: Philippines President Rodrigo Duterte in nitumna lam gam ten galtai la nuam loin a gam gite uh a khakcip lai takun galtaite teenna ding leh lu ngakna ding nei lote ko gamah hong sawl un, teenna ding inn ka na pia ding uh hi ci hi. 2015 in galtai (refuge) leitung ah million 1.8 bang om hi ci-in kituat a, 2005 sangin 300% in tam zaw hi kici hi. Galtai million 1.8 lak panin a kim khat gam 10 bekin na la uh hi.

Duterte in nitumna gam ten la nuam lo, huh nuam lo uh ahih manin ko la ding hi ung ci a, “Nitumna gamte aw ko kiangah hong sawl un, ka la ding uh hi. Galtaite zong mihing mah hi,” ci-in Al Jazeera 101 East newste kiangah gen hi. Philippines gam pen mi million 100 bang a teenna leh mi zawng tam mahmah gam hi napi in Duterte in galtaite a ut hun peuhpeuh ciangun hong pai thei uh a, kimuak den ding hi.

Nitumna gam ten human rights a ot pihpih hangun thudon vet lo uh a, gamgi ah kulhbang bawl ding leh sikdai kaih ding peuh gen uh a, ahih hangin ka lukhu gong/bel gong (brim) uh a dim dong galtai ka la ding uh hi. Nitumna gamte’ kineih khemna (hypocrisy) kilang ta a, mit sal gega in hong en uh hi ci-in gen beh hi.

Duterte in a gam uh-ah guih theih zuakte leh zangte nasia takin a do in, tuate do dingin death squads kici a zatna hang leitung gam tuamtuam, a diak in EU leh US ten human rights palsat hi ci-in ngawh uh a, Muslim ngongtat Abu Sayyaf gamnuaimite dona in zong dollar million za tampi zang hi. Philippine president a let June 30 khit nung guihthei zuakte leh nete 3,680 val police leh mel theih loh misuam (unidentified attackers) ten that ta uh hi. Duterte in President a let khit nung Abu Sayyafte leh guih theih dona dingin police leh galkapte thuneihna lian zaw sem na pia hi.

Duterte’ gamtatna nitumna lam ten a gensiat ngeingai hangun a pan’na dual tuam lo a, “Mi gilo bangin hong koih/ngaihsut uh leh phamawh ka sa vet kei hi. Amau kua kisa uh hiam? Bangmah hilo uh hi,” cih san phieuphiau lel hi. US data sungah Philippines tungah 2017 in huhna (aid) $188m kipia ding hi cih tuang hi. 2015 in bel US in huhna $236m na pia hi.
#Nung kal bekin Mediterranean Tuipi ah galtai mi 240 si hi. Source: Al Jazeera News/ Thang Khan Lian