Malaysia Uber Taxi tungah numei khat damiah tuak, van manpha teng kisut

Malaysia Uber Taxi tungah numei khat damiah tuak, van manpha teng kisut

Zanni Monday nitaklam in numei khat Uber mawtaw “Taxi” akawmleh mawtaw sungah damiah tuakin avanteng kisut cih theStar pan kiza hi. Tua numeinu pen kum 26 aphakhin khat hi a, nidang atuanngei Uber tetawh kibanglo in, lungsim patausak gawp hi.

Monday nitaklam 9:30pm hunpawl in Mid Valley panin Puchong Jaya ciahding in Uber Booking abawl ahihi. Uber mawtaw sungah atuan ciangin mawtaw hawlpa gei ah pasal khat tu cihi.

One Puchong Business Center atun uhciangin amai mawtaw hawlpa geiah atu pasalpa in temta ngatin numeinu ii avan manphaneih teng suhsak hi.

Adeihteng uh alaksak khitciangin tua numeinu pen lamzikpi gei ah nusia uhhi. Kamphatna tawh tua numeinu pen mawtawhawl khatin hunin, Police Station ah Report bawlpih hi.

Damiah atuak numeinu pen lauhuai in khitui naptui tawh kidim in lingkelekel cihi.

Serdang Deputy OCPD Supt Lee Wai Leong inzong hih Uber damiah tuakpen apiang takpi hi a, mawtawhawl Uber Driver pen aki zonsan laitak hi ci’n genkhia hi.

Uber Company tezong hihvai kidong himahleh athu aki kansan laitak ahih manin, Uber Company paninzong bangmah genkhiathei nailo uhhi.

Uber thuneite leh kumpi thunei te kipawlkhawm in, hih Uber Driver pen aki kansan laitak ahihi. Uber Company in khuasung mipi te ii Safety pen athupipen in ka ngaihsutkhat uhhi ci’n Uber Company te’n genkhia uhhi.

More: Malaysia gamsung ah Bawngnawi, Kelnawi sialdawn kiphallo

Taxi limlim asungah ahawlpa lobuang adangmi atuangsa aomleh kidop huaihi. Adiakdiak in Grab Taxi te’n GrabShare cihkhat mawtawsaap akiman zawdeuhding in abawlkhat uh om a, numei khatguak in GrabShare pen zat huai khollo hi.

Grab Taxi leh Uber Taxi te hongom ciangin Malaysia gamsung ah Taxi damiah atawm zawdeuh in akituat, amuanhuai zawdeuh in akituat ahihi. Ahi zongin migilo, damiah tezong haihetlo uh a, mipi muanmahmah Taxi Services te tungpan inzong damiah nataih vevemawk uhhi. ZD Sawltak #zomidaily