Mipilte leh nangmah ~ Tdkhen
1. Mipilte in a leitung nuntakna ciang bek tawh lungkim lo-in, hong tung ding hunte a lung himawh uh hi.
Na nek zonna bek buaipih lo-in, na nungciang hun dingte na lunghihmawhleh nang zong mipil na hi hi.
2. Mipilte in naungek Jesu’ aksipi a muh uh ciangin, kithutuakin Jesu a zong khawm uh hi.
Jesu hong hilh Lai Siangtho a simte zong Jesu mu nuamin a ki thutuak uh hi.
3. Mipilte in a inn a lo, a neih a lamte nu sia-in naungek Jesu a zong uh hi.
Na pil na siam, na hoih na phatnate phawkkha lo-a, Jesu na lungngulhleh nang zong mipil na hi hi.
4. Mipilte in lampi ngeina tawn lo-in, aksipi en-in naungek Jesu’ kiang a zuan uh hi.
Mihingte’ geelna, hoihna, phatnate suang lo-in, Lai Siangtho mitsuan lecin Jesu kiang a zuan na hi ding hi.
5. Mipilte in naungek Jesu a muh nadingin hunpi khat sung a paipai uh hi.
Jesu na muhna dingin lungngulhna nei a, na muh mateng na khawl keileh mipil na hi dinghi.
6. Mipilte in khuapi a naih ciangin aksi en nawn lo-in leitung uliante thu a dong uh hi.
Na neihsate hong khang in, na pilnate hong sangin, na lungsim hong liat ciangin, Lai Siangtho deihkaihin, na pilnate na suang kha ding hi.
7. Mipite in a pilna uh a suan manin naungek Jesu galtai’lawhin, naungek honkhat in a silawh hi.
Na pilna nasuanleh Jesu paikhia ding a, kha naungek honkhat a si lai ding hi.
8. Mipilte in kisikin, aksi lamlahna hongzui kikin, khuano Bethlehem-ah Jesu a mu petmah uh hi.
Lai Siangtho deihkaihnate panin kihei kik-in, Lai Siangtho gen bangin na zuih pahleh, na gualnop laitak hilo-in, na gamdaih laitakin na zon Jesu na mu ding hi.
9. Mipilte in Jesu a muh uh ciangin, a vanpuakte uh, KHAM, PAKNAMTUI, MIR RAH-te suahin naungek Jesu a bia uh hi.
Jesu na muhkhit ciang na Kumpipa-in pomin, na Siampipa hisakin, na Gumpa-a na sanleh, KHAM, PAKNAMTUI, MIRRAH tawh a bia na hi hi.
10. Mipilte in naungek Jesu kiang panin, a lampi ngeina uh-ah kihei kik nawnlo dingin vantungmite in hilh-a, lampithak a tawn ta uh hi.
Jesu na muhkhit ciangin, na nuntaknaluite takik nawnlo dingin, Kha Siangtho in hong hilh dinga, lampithak na tawn ta ding hi. Tdkhen
Comment piaknop aomleh...