Zomi leh Music ~ Paul Thangpi

Zomi leh Music ~ Paul Thangpi

Zomite in Music (La le tumging) thupi a sa mahmah minam khat ihi hi. Tanglai ipu ipa te hun pekpan Music tawh a nungta khawm minam te ihi hi. Zogam, Kawlzang, thamloh Kawlgam bup level ah Zomite Music lam mite’ etniam in ki omlo hi.

Khanglui Music

Ipu ipa te in aheh adah uhciang la tawh ki hehnem in, a nuam uhciang zong la mah sa khawm in, kiit kingaihna a lah uhciang zong la mah na kiphuah uh hi. Khuang, Zam, Sialki, Daak cihbang tumging in na zang uh hi. Khanglui te’n lakam ci-in lasak ciang akizang lai na nei uh hi. Gtn. In Thangho le Liando la:

• Thangho leh Liando a nun’n kuangpi a khuhlup aa, A nuai ah siallei a suak hi aw ee.
• Siallei suak albang a dah man in, Geltui ah nibang a lun hi ee.
• Thangho leh Liando a sen sanggah, A mi kai ee miza luang kai aw ee.
• A mi kai ee miza luang kai ee, Khua kim kai ee, lawi bang thang na aw ee.

Dahna, lungzuanna, itna, ngaihna ih lahnop ciang lakam tawh kilak leng kampau sang’ thuukzaw, khumzaw in lungsim sukha zaw hi. Tuhun ciang-in zong Zomi laphuak siam te’n khanglui lakam mah zang-in la na phuak uh hi. Lakam akihel phalo la ih ngaih ciang athu pawng kisa in lungsim hong sukha zo tak lo hi.

Khangthak Music
1980 kum pawl pan kipan Zomi sungah laphuah siam le lasak siam ki om ta hi. Sia Lianbawi, Sia Thawng Kim, Sia En Lam Cin te makaihna tawh la lamah khantohna hong piang hi. 1980 kum-in Sia Lianbawi makaihna tawh Cassette la khum ki pan hi.

Tua zomah Sia T.S. Khai, Sia Lengtong Pauno, Sia Vum Nang, Siamah Cingsan te unau, Evan, Do Khup, Sia Thawn Kham, Sia David Kham, Sia David Suum, Sia Zogam Lalpu, Sia Lianpi, Sia V.C.Mang, Sia Kam Khen, Sia Sizang, Sia T.L. Mungbawi, Sia Suanno, Sia JK Kam, Sia Stephen Mang, Siamah Sanlun, Siamah Zamnu, Sia T.S.Khai (AZBC), Sia M.V. Pauno, cihte hong khang hi. Sia T.S. Khai in la dawng 1200 val phuak hi.

Music Band tuamtuam zong kinei hi. Lengtong Band (Pauno, Kam Khen, Go Hau, Sua Mang le Pau Thawn), Hornbil Band (Sia Zen Lian makaihna), Grace Music Band, Gatam Band, Falcon Band (Deihpi, Khuppi, Thawn Thang, Jacke). Tulaitak in Khamtung leh Kawlzang ah Falcon Band kizang mahmah hi.

Kawlgam bup Music Band minthang te ah zong Zomi tumging siam ki om hi: Sia Kam Za Lian (Bass) Aces, Sia Cin Khan Pum (Bass nidang in) Emperor, Cinpi (Bass) Lazy Club cihte ki om hi.

2000 kum in Zomi lasiam thungaihsun thei pawlkhat in Zomi bup ahuam “gamgi a neilo” la le tumging tawh nasepkhawp nang kipawlna lianpi ZOMUS (Zomi Music Uplift Society) hong phuankhia hi.

2005 kum in Sia David Suum makaina tawh Tedim khuapi ah mi (3900) in “Halleluijah lapi” mihon (choir) sakna nasia tak in kinei hi. La Pawl tuamtuam (49) kihel in, sum Ks. 16, 900,000 (teng 169) bei in ZOFOP (Zomi Festival of Praise) nidanga apiang ngeilo, zong apiang zo paklo ding ki bawl hi. Hih ZOFOP lasak pawi hang-in Zomi biakna tuamtuam sung ah ki telsiamna le ki itna tampi hong khang hi.

Zomite in ipu ipa khangpan Music tawh anungta khawmte ihi a, Khangthak Music ah zong ikiim ipaan ih phalah kei hi. Music in Zomi sung ah ki itna, ki lemna, ki telsiamna le khantohna tampi hong piang sak ahih man in mailam ah zong Music (la le tumging) lam ihamciam toh lai ding thupi mahmah hi.

Note tawh ma apang khawm, Paul Thangpi (Germany)