A khanghamsate’ deihzia, donzia kepzia ding

A khanghamsate’ deihzia, donzia kepzia ding

Mihing nuntak na pen Laisiangtho in Kum 70,80 kiim hi ci hi. Asawt nungta te kum (100) kiim kinungtathei hi. Kumpite in kum (60) ciangin pension pia tawlnga sak uh hi. Na semzo nawnlo cihna ahihi.

Khanghamte amit, abil, aha uh hoih nawnlota hi. A tha uh zong hatnawnlo hi. Pawlkhat nupa kopin nungta nawnlo uha, lungzuang thanem uh hi. Deihluat, duhluat, muhnop luatna kiamta hi. An haizo nawnlo uhhi. Amau khangualte tawh kituahkhop nuamsa uh hi. A sa, avot thuakzawhna kiamta hi.

An Piakzia Ding:

A sak, a minphalo ne zolo uh hi. A nekte anip dingin satnem dikdek in minsak in. Zingsang, sun, nitak moh leh niangtui pia in. A thawh tungin pia in ngaklah baih thei uh hi. Tampia lua kei-in sungtholh baih thei hi. Zing, Sun, Nitak tawmta in thumvei bang pia in. Akuang, akeu, ahai te siangtho sak in. Sa napiak leh minsak dikdek in a tui limpiak in. Mangbuh, vaimim tang vuisakin bawngnawi tawh helin pia-in. Ha-sak pianzaw in. A khum, a-al, alim dingin hel in. Singgah leh atui pia in. Na duh a om hiam ci’n dong den in. na dotdot kei leh a duh leh a utte hong genlo in om lel ding uh hi.

Awng paina akiang nai ah bawl in:

Zun leh ek pai mun nuam uh hi..Awng tawh kinaisak in. Sawpsiang sakden in. Apuan anikte uh laihsak pahpah in.Zunhing nambaih uhhi. Sun nilum ciangin tuilum tawh sil in. Zan puante phokeu inla alum laitak tum in. A khe votsa baih thei uh hi. A lum ding tam deihzaw uhhi. Nitak lam in silkei in, sun in silin.

Akam khuahsak ding mangngilh kei in. Cina baih thei uh hi. Delhphah leh zanpuan agik lo azang pia in. Amai zingsang leh nitak phiatsak in. Khasia baih hehbaih thei uhhi. A tek te zun leh ek ipna thahat lo-in tehbaih mahmah uhhi. Anai ah haza, satpiang, hanawtna, mainul, limlangte koihsak in. A khecin, khutcin tan sakzel in.

Don Zia, Kep Zia:

Khanghamte aguh ngot hi, puksak kha peuhmah kei in, dawm mahmah in. Guh zatui zatote dongin pia in. Ciangkhut zangsak in. A paina ah zui-in len in. Amit uh hoih nawnlo ahihman in palkhial, sikkhial baih uhhi. Aha uh hoih nawnlo ahihman in zatote dongin a kituak ding zatui pia in. Anat ma in zatote kha thum hal bangin lakin bawlsak in. Anik apuante uh kiatsuah baih uh ahihman in akip dingin vetsak, bawlsak in. A zattawm dinguh sum, letsong piazel in. Lungdam mahmah ding hi.

Cimbaih uh hi.

Acim uh ciangin mawtaw cialin vakpih zel in. Khaulak leh a utna meltheih te kiangah vakpih in. Agei ah anek ding nektheih themthem suakluu, thangkhuai, moh alakbaih dingin pia in koihsak in. Milim, video, radio, cassette late ngaisaksak in. Laisiangtho, labu simding atna ding alakbaih dingin koih in. Dip kuatna, dahna, hehnate akul kei leh gen kei in, phatphat in lungkimsak in. Ama kiangah napai teh letsong nektheih pia in thupha kipia sakin thungen sak in.

US ka va pai-in ka muh, Sangah Nu le Pa leh Pi le Pute sam uh:

Bang hanghiamcih leh pitek putekte in sum nei in pia zozaw uh ci hi. Bang hang ka cih leh amau a nasep lai-in sumkhol neizo uh a tute tate letsong pia zozaw ci uh hi. Zomite in zong khanghamte in sum kholkholh ding kisam mahmahsa ing. Hong kipia kei leh na ngawlhkul mawk ding hi. A khanghamte in an kipia kei leh agilkial lam theilo thei mawk uhhi.

Khangham te khasia sak, hehsak, dahsak kei-in:

Lungdambaih, khasiabaih, hehbaih uhhi. Nalian a thupi amanpha pipi thupi sakna nei nawnlo uh hi. Khamhamte-in naupang lungsim neita uh hi. Napiak zawh leh moh, suaklu, singgah nek pakpak theih ding piaden in. Sum tawmtawm pia in. A giluh kialbaih thei hi. Hehsak kei in, thupha kipiasak in. Hopih den in. khasiasak kei in.

Hong samsia leh hoihlo hi. Hong samsia leh gunei hi. Ept 6:1 Tanu te tapa te aw Topa deih bangin na Nute na Pate uh thu namang un.Bang hanghiam nacih uh leh hih gamtatna in thuman ahihi. 2-3 Nangmah in nuamsa in leitungah na nuntak a sau na dingin na nu leh na pate zahtak in ci-in thuciam na tawh kipawl thukham amasa bel ahihi.

Piancil 27:1-4 “Ka sihma in nang thupha kong piaktheihna dingin ka duh bangin anlim hongbawl inla nek dingin hong paipih in ci hi. Zomite Pasian i up hangin khangham zahtak kisiam hetlota hi. Hang Cin Hau B. Min (Tedim Khuapi, Myomah VengInn No.195)