Kumthak ah Vision leh Mission neihna ~ Pau Do Lian
Habakkuk 2:2Topa in hongdawnga, suangpeek tungah akitel dingin vision gelhin taikawmsa nangawnin kisim thei ding hi. Paunak 29:18Vision omlohna ah mite mangthang a, ahizongin Pasian thukham azui mite ahih leh a lungdam uh hi (KJV Laisiangtho pan keilet tawm)
Vision leh Mission khentelna:
“Vision omlohna munah mite mangthang a” acih mahbangin mimal, innkuan, pawlpi leh kipawlna organization tuamtuam te ah vision kician a omkei leh nasep kician om zolo hi. Vision leh mission kibang tawhkibang napi in ahih hang kibanghetlo ahihmanin akhentheilo tampitak kiom hi. Tua ahih manin vision leh mission gencian phot dihni.
Vision
Vision ihcihpen ei Zolai-in kammal khatsanga tamzaw in kiletthei hi. Ngimna, tupna, leh tunsawmna (goal, target, destination) cihbangin amanglai mahmahtawh zong akhenthei lo mitam piki omlai hi. NGO, Private business te’ vision teltakin aneih masiah’ kalsuanthei lo uhhi. Atomkim in vision pen kammal danga letsangin “vision” mahzang leng mikim inthei baihzaw ahihman in tua kammal mah zangni. Tuzawh ni,kha,kum bangzah ciangin na-nasepna ii gah bangcibangin munuam na hiam?
Gentehna, INGO, Action Contre la Faim ah kasep lai-in ka vision uhpen, ‘zawnna akiam nading’ hiziau-in ahih hang anuai ah program nampi nih in kikhen a, ‘Food Security’ leh ‘WASH’ ahihi. Tua nampi nihte GTN: ‘Food Security’ nuai-ah’ Rice-Bank, Agricultural, Income Generation, Fuel Efficiency, namli in kikhen in ‘WASH’ nuai ah Water supplies, Sanitation, Health cihbangin kikhen hi. Hih nampi nihnuai a’ program te pen, ‘Organization’ ii vision in mawtaw banga ahawl ahihi. Tua vision ‘zawnna akiam nading’in tua program tengin damdam in gualzawhpih hi. Tua ahih leh ‘mission’ bang hileuleu hiam?
Mission
Mission kammal zong, ‘missio’ Latin pan kila hi in ‘paikhia in sem’cihna ahih manin mission cihkammal mah kitelpen ahihmanin hih laisungah kizang zawding hi. Vision leh mission koi masa zawding cihzong dotna omthei hi. Ataktak in vision a om masak keileh sepkhiatna kician omthei lo hi. Pawlkhatte in mission/semkhia phot in tuaciangin alawhcing natawh kizui in vision aneizong omhi. Ahizongin organization lianpipi te in vision kiciantak in aneih khit dikdek uhciangin sepkhiat na kipan pan uhhi. Tuahi a, ‘mission’ cihpen mailam kumbangzah hiamkhatcianga natun nop/theih nadinga tulaitak nasep nate pen’ “Mission” kici hi cih hongkhawm sawm nuam ing.
A etteh huai, ‘vision’ & ‘mission’ nasepna
Antoni Gaudi (1883-1926) in Barcelona khuapi ah biakinn pi ‘Sagrada Familia’ kici lamsawm ahih manin tua biakinn design kum 12 sung (vision casting) bawl hi. March 19, 1882 in foundation kipan uh a, dawl 19 dinga ki design hi-in tu 2018 ciangin dawl 14 ciangzo ta uh a, asan na 102.31 meter phata hi.
Hih building pi pen khang nga (five generations) kizawm a alam uh pen 21stsungin kizo dingin lam en uhhi. Hih building lamna in sumbang zahbei cih kituat theilo himah leh kumkhat sung in tourist te etman sumlut pen Euro 25. Million phahi. Antoni Guadi in kum 12 sung design bawlin (vision casting) tu niciang kum 129 cingta in tua mission kizom toden thei a a vision atangtung dekdek ta ahihi.
Vision khatciangin naibangzah, khabangzah leh kumbangzah atungding cihpen kigen kholthei lohi. Tua vision tunzawhna ding nasepkhiat na tuamtuam te pen ih mission hi a, haksatna (constrain) tampitak tua mission sepsung in omham tang hi. Ahizongin ‘vision’ teltaka mite tungah lahkhiatna in kumbangzah sawtphialtaleh lungkhiang (sight track) omlo in tang’tak in hongpai sak ding hi. Tua vision nangah ma-in lungkiatna, mite kona, mite uplohna atuamtuam omding hi. Ahizongin mimal, innkuan, pawlpi te ah vision kician ihneih nakleh kumkhat ahizong kum 10 leh kum 100 val ahizongin tangtung teitei dingcihna ahihi.
Mimal vision te-ah naikhat sungin kilungkia thei a, innkuan vision te ah nikhat thu in kilungkiathei in, pawlpi leh kipawlna te ah kumkhat khitciangin kilung kia pahpah hi. Adiakin ihpian nagam pua a nasemte vision ihneih samhang kilungkia baih mahmah hi. Vision kician neihlohna pen kammal dangin cileng ‘mailam’ saupi mukhol lo’ tuta dih aidingbek lungngai cihna ahihi.
Thukhupna
2018 kumthak a na vision te nangah lohman in 2019 kumthak adingin natha adah hiam? “mission” sepkhiatna omlo pi in ‘vision’ angak pawlkhatzong ki om hi. Tua bang hileh vision kingah hakmahmah ding hi. Pawlkhat te in vision khatpen kumkhat sunga ngahdingin angen om a, kumkhat in angahloh ciangin nusia (give up) nuam pahpah hi. Tua ahih man in ih vision lenkipa 2019 ah tua vision tun’ zawhna ding in bangsem ding kahiam ci in ngaihsutna kician aneithei dingin kei a kipan Topa in Zomi te ih omna ciatah lam hanglak tahen! Amen Jeffrey Pau Do Lian (Th.M. D.Min. (Ph.D. in progress) December 28, 2018
Comment piaknop aomleh...