Kum 24 naphak nungah kidophuai pawlkhat ~ Job Cinpi
Kum 24 na phak ma kidawm lo ding cihna hi lo hi. Kum 24 na phak ma thei kha lo, kidawm kha lo na hih leh kum 24 khit ciangin kidop huai, theih huai cihna ahi hi.
1. Silh le tan tawh sum beiskana
Mitmuhna tawh deh man lel-in silh le ten lei lei cihte khawl san ta inla a pawthak hihna tawh lei pahpah silh nuam pahpah cihte hih nawn kei in. Na nasepna ah hong kizahtak nading na hihna tawh kituakin silh le ten dan siam sawm in. kha simin silh le ten thak na leina sumte khol zaw inla khat nih khat vei cih bangin sum zat khiam ta in. Picin ding hun ta ahih manin a thak khempuh deih, nuamtuam den cihte ngaihsun nawn kei in. A hoih a thak cihte na teel ding sangin na hoih na thaksuak nading teel zaw in. Na puansilh tawh kilawm hong kisak ding thupi beka na puah a thak ding a thupi ahi kei hi.
2. Na kituakpih loh lawmngiah nusia in
Bang zahtakin na ngai zongin nang tawh kituak lo cih na theih nak leh tua bang mi khat hangin na hun beisak nawn kei in. Nang tawh a kituak ding mi zong inla na kituakpih dingte omzia ding lai sungah gelh pah in. kum tam ta ahih manin a om bangbang, muh peuhpeuh cihte peuhmah gel kha kei in. Na lungkim loh ding mi khat tawh na kiten sangin koppih nei loin na om theih ding kisin zaw in; tua ding hoih zaw lai ding hi. Dam sung lungnuam lo ding, lungkim lo ding cih sangin khatguak bek om ding hoih zaw lai hi.
3. Midangte muhna thupisak lutna pan khawl ta in
Midangte’n kei bangci hong muh ding uh cih theih nopna pen mihing ngeina ahi hi. Ahi zognin mi pawlkhatte in midangte muhna tungah kinga lua uh ahih manin a sep a bawl nop na hoih tampi sem ngam lo bawl ngam loin lawhsam thei uh hi. Gentehna, siavuan sem nuam lo napi siavuan sem le’ng hong kipimuh ding, hong kithusim ding, hong kizahtak ding ci-in midangte muh nading tawh a ut loh a sepnop loh khat a sem pawlkhat om thei uh hi.
Mihing nuntakna pen tom mahmah hi. tua hih manin nasep na bawlnop khat sem inla bawl zawh sawm in. Midangte muhna tawh kalsuan ken la na lungtupna semin gualzawh ding sawm in. tua hi leh midangte muhna zong hong kikhel lel ding hi.
4. Na nu na pate na mawhsakna pan khawl ta in
ka nu ka pate’n hong panpih zo lo uh hi. Ka nu ka pate’n tha hong pia zo lo uh hi. Hong huh zo lo uh hi, cihte gengen nawn kei in. Ka nu ka pate ka nasep nading sum bulpi hong sik zo uh hi leh nasep hoih semin na lianpi sem zo mah ding hi veng, nu le pate’n hong panpih zo lo uh ahih manin bang mah ka sem thei kei hi, cihte gengen nawn kei in. Na nu na pate kua hiam, cih sangin nang a kua na hiam cih thupi zaw ta hi. Kei kua ka hi, ci-in na khutpi na tunglap zawh ding hanciam zaw in.
5. Sum ngahna kiciam om loh manin lungkham kei in
Khasum hoih, nitha hoih na ngah nadingin hanciam toto inla na sep na bawlna peuhah a hoih zaw, a pha zaw na sep na bawl zawh nadingin hanciam den in. Hunbit nasep na ngah zo kei zongin na kivak nasep khatpeuh ah naitha tawh ahi zongin sep ding sawm pah in. Thadah lo a, a sep a bawlna peuh ah khantoh ding a sawm mite ading hun lem hun pha in ngak den uh hi. Tua hun le hun pha a ngahte a ni a nai-in khangto hanhan ding uh hi. Bang mah sem lo bang mah bawl nuam lo a, hun lem hun pha bek a ngakte pen sepna hun bekah hun lem hun pha om ahih manin ngakna tawh a hun uh beisuak lel ding hi.
6. Mi hoih na kineihna pan khawl ta in
Khat veivei ciangin kineih se loin na lungsim bangin na ut kei leh ut lo, na deih kei leh deih lo ci-in nial zaw lel in. Hun na ngah kei leh huhna hong kinget hangin na manlahna thu na gen thei ding zong kisam hi. Midangte kisapna khempeuh huh dingin nang tavuan hong kipia lo hi. Midangte tungah hoih ding kisam lo cihna ahi kei hi. A hoih kineih ding kisam lo hi, cihna ahi hi.
7. Internet tungah na hun beisak ding sawm nawn kei in
Tu hun pen khangthak pilna internet tawh kizom kei le’ng khangual kiban nawn ding hiam cih theih nadingin om hi. Ahi zongin hun a zang le hun a beisak kibang lo hi. Minet sawm le nga hal bangin na phone na et mahmah nop leh hun a beisak na hi ta hi. Kidop huai ta hi. Hun zatna pen hoihna khantohna hi a, hun beisakna pen supna le kiamsukna ahi hi.
8. Cidam nading awlmawh sawm ta in
Khangno lai na hih manin nek le dawn a kipan a kisam a kisam lo cihte hong kilang khia pak nai lo ding hi. Tua ahih manin nek le dawn ahi a, cidam nading kimawlna cihte ahi zongin a kisam bangin zuih ding kipan ta in.
9. A piang bangbanga omna pan tawp ta in
A piang bangbanga omna cih ciangin kisektatna om lo a, ut bangbanga omna, ahi ding banga om lohna, a suak nuam peuh suak hen cih lungsim neihna panin kihem khia ta in. Sumbawm koihna kician nei lo, khedap hoihna kician nei lo, puan khaina kician nei lo, cih bangin om nawn kei in. na sep na bawlna peuh a kician dingin sem pah pah inla na gamtatna khmpeuh sektatna tawh gamtat ding sawm ta in. Kisaktatna cih pen picin nading hi a, sektatna a om kei leh pump le kumte a khan hangin kipicing tuan lo hi. Aung Ko La tt/ Job Cinpi (Zomi Laisim Nuamte)
Comment piaknop aomleh...