Minthang Coronavirus (Covid-19) ~ Gin Za Khai

Minthang Coronavirus (Covid-19) ~ Gin Za Khai

Na theihbeh nopkhak leh… Hih natna pen huihdiik natna (respiratory disease) a piangsakthei virus khat hang aa piang hi. A virus min pen “SARS-CoV-2” kici in, hih virus hanga apiang natna pen “coronavirus disease of 2019” aih keh “COVID-19” ki ci hi. Apongpong in hih coronvirus pen ii thusimkholloh natna: naasii- naptui, nakbing, khuh, (khuavot thuakna hanga cina hi’ng) ih cihcihte hong piangsak virus namkhat hi lel hi.

Tu aa minthang “SARS-CoV-2” bel hih coronavirus namte hinapi, alawmte sun lo in themkhat lauhuai zawdeuh se ahihman hi. Hihzahta aa hong minthanna pen 2002 leh 2012 kum lai aa tu aa danlian phialmah a hong piangngei a hihna leh, social media leh news media khauhpaih luatna hang hizaw kha in teh.

Tu ciangciang (3/7/20) ih theihna ah bel, hih virus in ii cii sasak, hong khuhsak, leh huihdik haksa sak thei hi. Natna dang tawh kibanglua ahih manin, a cisa khempeuh (>100.4F), akhuh thelhthelh khempeuh leh naak-haksa (huih diiklah) khempeuh in natnanei cihna zong hipah samlo hi. Tuamah bangin, acidam leh thahat tuak mahmah khempeuhin zong hih natna neilo cihna zong hi tuanlo kawikawi hi.

Pawlkhat te’n thuaklah mahmah napi’n pawlkhat te’n lah phawk selo lel uh hi. Atamzaw pen uham zawdeuh (>60) te leh zatep thei te’n hih natna ngahkha le uh uangnat phadeuh thei a, pneumonia (tuapsung meima natna) bang ngah in sihlawh thei uh hi. Kawlgamlam pan ahizong, hih natna kipat khiatna Sen gam kiim nawkkha maw, ahihkeileh hih natna nei khat tawh ii kisukkhakna a om keinak aleh lunghimawh luat kul lo dinghi.

Tuaban ah, natna dang lungtangnatna (heart disease), tuapnatna (lung disease), sikhum natna (diabetes) nei ahih keh, khanghamta (>65) ih hihkei nak aa leh zong, hih natna a ki gengen zah in lauluat ding hilo hi. A hihtheih lebel maw, den aa ih genbang gamdangkhualzin hong lutthak peuhmah hih virus ngahkha aa ii ki upleh hehpihna tawh siavuan te kivelsak hamtang ni.

Mikhat leh khat ii kilawhnapen a tamzaw kamhum lopi aa mimai khawnga ih khuhciang ahi zong, virus baangsa ih khutte tawh ih mit, nak, leh kam ih lawnkhakna hang zong hi thei hi. Ih khutte ih sawp tanghtangh ding kihanthawn kiknuam hangh. Hand sanitizer sang khutsawp hoihzaw pek hi. Tu laitak pen, hih natna donang zatui leh vaccine om nailo takpi hi. Ki dawmsiam ni.

Pawlpi upa khat thugen ka zakngei khat ah, “Pasian gam hong nai mahmah ta in peengkulte zong ki mutkhinta a, agingkhia nailo bek hi” acihse danin, ih Topa hong paiding nailuata ahih teh, tua peuh genpi in neizaw dia… Lungdam, Gin Za Khai, MD