French President thakpa ii azi pen amasang in kum 24 val upazaw

French President thakpa ii azi pen amasang in kum 24 val upazaw

Ihpu ihpa te’n Piancit gam acihcih uh France gamah kumpi kiteelna kinei in, Emmanuel Macron kicipa in President dinmun hong ngahkhia hi. Emmanuel Macron pen Napoleon khitzawh France gam ii akhangno penpen makai “France’s youngest leader” ahihi.

Atung a Photo pen nuta hilo hi, Pitu hilo hi, nupa ahi uhhi. French President Emmanuel Macron pen azi sangin kumtampitak naupangzaw hi. Tukum in amahpen kum 39 hipan a, ahi Brigitte Macron ahihleh kum 64 phakhinta hi.

President Emmanuel Macron leh azi akum uhpen akituak ciangin azi pen kum 24 leh kha 8 tak upazaw mawk hi. Akum atamzawk banah ta 3 neikhinsa ahihi. Atate zong amasangin upazawlai uhhi.

Ki itna ki ngaihna ah kumin bangmah nawngkaisaklo cihpen mitmuh in alakkhia uh nupa te ahihi. Kumtawm mahmah khatleh kumtam mahmah khat kiteeng cihpen itna khauhmahmah cihnazong hikhading hi.

Emmanuel Macron pen France, Amiens City ah 21 December 1977 kumin suak hi. Biakna cihbang aneilo innkuan “Non-religious family” panin akhangkhia himahleh kum 12 aphak ciangin amah ii lunggulhna leh ngetna “Request” tawh Roman Catholic ah ki tuiphum hi.

Amiens City sung aom Jesuit Lycée la Providence ah atamzaw sang akah ahihi. Sangkahna panin sangsiamah Brigitte Auzière tawh hongki ngai uhhi.

Aki muhcil un Emmanuel Macron pen kum 15 bek hipan a, Brigitte Auzière ahihleh kum 39 phakhinta hi.

Brigitte Auzière pen Emmanuel Macron ii apa sangin kum 3 bek anauzaw ahihi. Apa in atapa pen ama khangual khattawh kingai cih atheih ciangin piangthei salo ahih manin Brigitte Auzière tawh aki gamlat nading in Emmanuel Macron pen Paris ah sangkahding in puak ek hi.

Brigitte Auzière pen 22 June 1974 kumin André-Louis Auzière tawh kiteeng uh a, ta 3 nei uhhi. Truchtersheim khua ah 1991 kumdong aomkhit uhciangin Amiens City ah akituah ahihi.

Tua Amiens City ah sangsiama asep ciangin Emmanuel Macron tawh hongkimu uhhi. 2006 kumin apasal masa André-Louis Auzière tawh hongkikhen uh a, Emmanuel Macron tawh 2007 kumin akiteeng uh ahihi.

More: Eiffel Tower pen $21.4 Million bei in Bulletproof Glass tawh dai kikaiding

Tu’n French President pa zi ahi Brigitte Macron in apasal masa tawh akiteeng hunlai in Emmanuel Macron pen suaknailo zawzen hi. 1974 kumin apasal masa tawh akiteeng uh hi a, Emmanuel Macron pen 1977 kumin suakpan hi.

Brigitte Macron ii apasal masa tawh atate pen President Emmanuel Macron sangin upazawlai uhhi. ZD Sawltak #zomidaily