Tulaai Leitung Thuthang Tuamtuam Updates July 21, 2016

Tulaai Leitung Thuthang Tuamtuam Updates July 21, 2016

· Zomi Party ZCD innteekna tawh 21st Pinlong tawh kisai kikamkup khopna nei ding in Yangon khuapi ah July 22, 2016 ni pan kipan July 23 ciang thusunna kinei ziahziah ding a, Chin state pan Party tuamtuam, CSO te leh Minam Makaai te tampi tak ban ah Leitung mun tuamtuam a Zomi ki[pawlna te ong kisam a, hih mun ah zinmuakna aneiding in ZCD President Pu Cin Sian Thang zong Yangon khuapi tungkhin ta hi. VOA

· Hongtungding July 26 nipan kipan Kachin gam Maiyajang khuapi ah kibawlding UNFC- Mualtungmi thautawi te kimuhtuahna khawmpi ah UNA leh NDF zong sam uha, Kipawlna khat pan mi-5 ta kahding in sam uhhi. UNA peen Mualtungmi Party thupi 13 kipawlna hia, NDF pen party neu nono 23 kipawl uh ahihi. UNA sung ah Zomi Party ZCD zong innteek mahmah ahihman in tutung 21st Pinlong tawh kisai Zomi patkhiat ahihmah bang in Zomi te kiu-3 pan panmun laakna aneitheiding ihihi.

Hih thu i et pak ciang I Makaaipipa Pu Cin Sian Thang I thumuh kholhdan leh apil dan iphawk sansan a Topan khansau na ongpiaksak nading in thungetna ikicial phapha hi. Thau tawi keei a gim kul sese lo in amunmun pan Zomi luut theihnading thu Pu Cin Sian Thang in namukhol gige hi. RFA

· US National Security Advisor nambat nihnapa Ben Rhodes leh Daw Aung San Suu Kyi te July 20,2016 ni in kimu khawm uha, gamnih kizopding thu kikum uhhi. Tua ban ah President Obama in ama thuneihna abeima USA gam hawhding a asapna laai zong pia uhhi. Pi Aung San Suut Cing peen 2016 kum beima US gam New York Khuapi a kibawlding Zomi te kahpahpah na UN Khawmpi ah kadingding in geelna nei hi. VOA

· Turkey gam Gaalkaap pawlkhat in thuneihna nung Friday ni alaaksawmna ahang in tuzawh kha thum sung gambup Emergency a cin cip ding Parliament in July 21, 2016 ni in thukimna neita uhhi. Hih kha thum sung in gaalkaap ten gam ukding cihna hituanlo a daaidimdiam phot ding cihna ci uhhi. CNN

· US Republican Party te I Kumcin khawmpi OHIO state Cleveland khua ah July 19 -21 sung thupi tak bawl uha, tuamun ah 2016 US President dem theiding Donald Trump kipsakna zong nei uhhi. Tua ban ah Donald Trump in Vice President ding a a teel Mike Pence in nasiatak in apu phatna thu genkhia hi. Hih tawh kizom mah in Democratic pan 2016 Presdent adem ding Hillary Clinton in zong tukaal sung in a Vice President ding taangko khiatna neiding ci in gen uhhi. BBC

· Syria gam sung a IS te ado US panpih Syria gaalkaap te in IS phualpi khat ahi Manbij khuapi July 20 ni pan nasiatak in sim uha, IS te in nai 48 sung in Manbij khuapi ataisan nading un khauh tak in thupiakna nei uhhi. VOA Lungdam, Thang Khawm Pau ZOMi (Bowling Green , Kentucky, USA)