Minam le Innkuan sung cidamna ding ~ Lian Tuang
I minam sung, I pawlpi sung, I kipawlna sung le I innkuan sung ciatah buaina kisiatna cih thuhamsa thunawngkaite a hun zui in a kinei theizel thu ahi hi.
Buaina kipatna
Innkuan khat sungah buaina a kipat ding ciangin thuman kituhna pan ong kipan hi. Akhial zaw ding om loin a nih in a man zaw ahih ciangin kitot kisel le kisiatna dong ong tun thei den ahi hi.
A taktak in thuman I cih pen nam khat bek a om ding a sa kha I hi hi. Thuman I cih pen mimal muhna le thungaihsutna tungah kinga zaw ahih manin mimal om zah in thuman a kici pen zong a om thei ding thu na hi hi. Gtn: Tangval no nih kiangah leitungah bang meh lim pen ahi hiam cileng, khat in voksa meh ci lel dinga adang khat in aksa akl ngasa…, cih bangin ong dawng lel ding uh hi. Hih pan amau mimal tawh kisai hi a, a manzaw a khialzaw ding om lo hi.
Thuman kizatna
Thuman a kilim zatna pen thukhenzum ahi hi. Nungak tangvalte a kingaih mahmah hun laitak pen khat le khat ki itna kitheihsiamna, kikhualna a neih mahmah hun laitak ahi hi. Ahi zongin amaute gel kikal ah thuman zaw ding a kituh uh ciangin kikhenna kiho zawh nawnlohna dong piang pah hi.
Nungak tangval kikal, kipawlna, pawlpi le minam sungah thumanna piciang I nak zat luat leh kikhenna kisiatna tawh ong kizom hamtang ding hi. Apiang khin sa tampi I mu khin ta hi.
Thuhoih le cidamna
Thumanna pen thupi lo cihna hi lo hi. Thuman I cih pen mimal muhna tung kinga in nam tampi om thei hi cihna hi zaw hi.
Paunak khat ah Mihing le buaina pen a ki unau hi a cih mah bangin, buaina hamsatna tawh kidim leitung ahi hi. Tua bangin buaina hamsatna tawh kidimna mun ah thumanna akl kei thubek I cih teltal leh buaina apiangsakte kihizaw kha ding hi.
Thu le la khat peuhpeuh a om ciangin thumanna ( mimal muhna tung kinga ) bek ci tentan loin thuhoihna tawh I et kak theih ding kisam zaw hi.
Thuhoih I cih ciangin thusia lam a hi lo limlim ahi hi. Tua ban ah leitung khuahunluanzia tawh a ton, a om sa ngeina zia le zat thukhunte tawh a kilehngatlo, aituam lungsim nusia in tangpi lungsim neihna, itna deihsak le lainatna tawh kidim gamtat kampau na ahi dingin ka lamen hi.
Tua ahih manin i innkuan sung, I kipawlna sung le I minam sungah cidamna le khantohna a om theihna dingin a kitelkhial thei tawntung thumanna( mimal tung kinga ) cih dinmun sangin thuhoih le thuphate bulphuh leh mitsuan in nei zaw ni cih kizawn nuam hang. (18Nov2018)
Comment piaknop aomleh...