Nu’ Ni zawhteh aban ding bang

Nu’ Ni zawhteh aban ding bang

“Mother’s Day pen trademark hi. Mothers’ Day hilo hi, tua ahih man in Nute Ni ci lo in Nu’ Ni cih ding kilawm sa ing,”cih Sia Khen Suan Za Nang laikung panin ka muh teh diksa mahmah ing. Laimal in manpha ahihna tel semsem ing. Nu’ Ni zatni hih Lai Siangtho ka sim aa ka khitui hong luang ngelhngelh hi. Piancilna 25:28- ” Isaac in Esau’ sa matsa nene ahih manin Esau mah itzaw a, ahi zongin Rebekah in Jakob itzaw hi.”, ci hi. Nu leh Pa ten Tate it deuh ngaihdeuh neih uh hi cih ki lang mahmah hi. Ahang om ding hi.

Nu’ Ni bek in Nute’ phawk ziauziau lel, Nu’ Ni ciangin hopih pan, sum khak pan, thupha dawh saisai nuam( ngah ding maw guai), bawl pak saisai mi ih om khatam ci-ing. Nu’ Ni beileh phawk khak mahmah in neihlo zel, Nu’ Ni simin phawk kha pak cihte om tham hi. Ih Tuun leh Zua in nang hong phawk den, nang adingin thu hong ngetsak denin Thupha lampi hong sialsakden hi.

“Namit na hak le la hun sungin na pianna Tuun leh Zua phamlo dinga na mitphiat kal hun sungin hong phamsan ziau ding hi,” cih Rev. Cin Za Suan thugenna ka zakteh ka lungsim hong sukha mahmah hi. Nu’ Ni khitzawhte aban ding bang! cih ka lungsim ah hong om hi.

Phamsa ningtui ki tulh theilo aa, phamsa thupha ki la kik theilo ding hi. Tualeh bang cih ding:

1. Leitungbup ah ih pianna Nu khat bek ki neih ahih manin lungkimsak masa leh it in zahtak masa ding

2. Nu leh Pa thupha bek deih man bek tawh amau tungah itna ngaihna laklo ding, a tawn tungin amau adingin thungetna maw, a cidamna ding maw, a lungdamna ding maw..cih thute ngaihsun in sem takpi mai ding

3. Nu leh Pa ten it deuh ngaihdeuh a neih mah bangin amau ngaih deuh dingin bang ka sem ka bawltam cih phawk ding

4. Pianna Tuun leh Zuau ki bang sitset na pi Thupha a ngah deuh mi om hamtang hi. Tuaten bang cih bangin Nu leh Pa bawl uh hiam cihte kanin sem ding

5. Pianna Tuun leh Zua it masa lo, zahtak masa lo in, muh theihloh Pasian ka it ka zahtak icihleh Pasian ahing khem ihi lel hi.

6. Nu leh Pa hong itna bek ngaihsun lo in, ei itna zong Nu leh Pa in hong ngaihsun hileh bang tan hi ding cihte phawk ding

7. Nu leh Pa pilta leh, haita leh, hauta leh, zawngta leh, melsiata leh a ki khel thei ngeilo ahih manin a ki khel ngeilo itna hong neih lam uh phawk tawn tung ding

A dah huai penpen ah Nu leh Pa azahtak lo, itna a neilo khat in Zomi minam hong makaih khak ding lauh huai mahmah hi. Makai dingte a inn kuan sung ki lamzia kancian masak huai hi. Innkuan sung cidam mello khat in Pawlpi sung, minam sung hong makaih leh ki cidam hetlo ding hi. Tua ahih manin Pilna theihna neihna cihte madak mada lo in Tuun leh Zua tungah bang tanin sem cihte theihpih masa hileng ih minam ih pawlpi cidam mahmah dingin mu ing.

Nu’ thupha Pa thupha, Nu itna Pa itna bangtan cih ki teh theilo aa, tate itna ngaihna pen ki thei hi tawh ki bang hi. Nu leh Pa na it zahzah na Taten nang tungah itna hong neih ding uh hi. Nu leh Pa ih bawlbawl bangbang ih Taten ei tungah hong bawl ding uh hileh bangtan hi ding cih ngaisut huai hi.

Nu’ Ni khitteh a bang sepdind bang!!!

Thawn Tuang
Zomi Angvaan
May 13, 2013