Malaysia gamsung ah Plastic tawh akibawl buhtang “Plastic Rice” om ci’n Report kibawl

Malaysia gamsung ah Plastic tawh akibawl buhtang “Plastic Rice” om cih Complain kibawl ahih manin, hihvai tawh kisai kumpi thunei Ministry of Domestic Trade, Cooperatives and Consumerism (KPDNKK) te’n asitciansak laitak uh cih MMOnline pan kiza hi.

Johor Bahru State sung aom Kulai khuasung Supermarket khatpanin Plastic Rice kizuak cih Report akibawl ciangin KPDNKK te’n Sample nam 3 lakhia uh a, Malaysia Chemistry Department te kiangah sitcianna aneih nading un puaksawn uhhi.

Johor KPDNKK enforcement chief Aris Mamat ii genkhiatna ah Report akibawl ciangin aphual ah kavapai uh a, Supermarket sungah sitcianna kinei cihi. Tuaciangin Sample pawlkhat kila a, tua buhtang te zuaknawnloh dingin thu kipia cihi.

June 07 nitaklam 7pm hunpawl in KPDNKK te Supermarket sungah lut uh a, Rice Sample alakte uhzong Chemistry Department ah sitcianna neiding in puakkhin uh kici hi.

Chemistry Department panin sitcianna Result pen asawtlo in ki tangko khiading hi. Plastic Rice taktak ahih mawkleh mipi te Consumers’ Safety limtak ki vaihawmding cihi.

Hihlo adangkhat zong Plastic Rice vaitawh kisai Report akibawl omkhin ci a, akibang in thu kibawlding hi ci’n Aris Mamat in genkhia hi.

P. Bhaskaran akici kum 61 aphakhin khatin Kuhlai khuasung aom Supermarket khatpanin buhtang 5kg te khat RM21.85 tawh lei hi. Tua buhtang pen anek ciangin haizan hamsa mahmah in, amahzong alung himawh ahih manin meitawh ahalsin ciangin Plastic gimnam cihi.

Tuaciang in hih buhtang pen Plastic tawh akibawl “Plastic Rice” akici te hiding hi ci’n kumpi thunei te kiangah Report bawlpah hi. Tua Report abawl khitzawh hih Plastic Rice vaipen Online Social Media ahzong ki thehthangpah zihziah hi.

Plastic Rice cihpen aom ngei taktakmah hihtuak mawk a, Sente bawlkhiat kici hi. Buhtang pen kuangsung ah tui koih in khiasukleng buhtang taktak ahihleh anuai ah kiasukding a, Plastic Rice ahihleh atungah laamding cihi.

Buhtang taktakte pen meitawh halleng bangmah cipaklo a, ahi zongin Plastic Rice tepen meitawh ihhal ciangin kuangpah cihi. Sawltak #zomidaily