US kumpi in Refugee Program adinkhawlna vaitawh kisai UNHCR ii patauhna
(Switzerland, Geneva khuapi aom UNHCR zumpi pan “UNHCR Alarmed at Impact of U.S. Refugee Program Suspension” cih thulu tawh alai khahkhiat uh Zolai in simtheihpak dingin kong letkhiat uh ahihi. ZD Sawltak)
Leitung muntuamtuam aom Refugee gambel tultampitak te USA gamsung ah aluttheih nading Resettlement Process pen genciantheih omlomawk ahih manin kalung nakkham mahmah hi ci’n UN High Commissioner for Refugees Filippo Grandi genkhia hi.
Tukalsung bekbek in US gamsung ah alengding in akithawisa Refugee 800 valbang US kumpithak in agamsungah alutding hongphallo a, hongkhaktancip mawk hi.
Abeisa kum 15 sung khasim in US gamsungah akipuak Refugee phazahte tawh tehkakkik hileng hihbang in US kumpi in agamsung ah Refugee te lutding hongkhakcipna hangin ni 120 sung alengding akituak ciangin Refugee mi 20,000 bangin thuaklawh, alending kipelhlawhmawk uhhi.
Refugee gambel tampitak te khituiluang in kap uh a, lungsim kitamzan in omkhin uhhi. Hih US kumpi ii khakcipna Suspension pen bangtanvei hunlakikding cihpen gentheih hilomawk hi.
American te’n amau ii Security leh Safety alunghimawh mahbang un Refugee gambel tezong amau ii nuntakna sungah Security leh Safety dingin alunghimawh bekthamlo, athuak ngiatte ahi uhhi. Banghanghiam cihleh amaute pen agam uhah tualgal bawlsiatna tuamtuam leh ngongtatna tuamtuam te panin hong taikhia uh ahihi. UNHCR panin USA gamsung ah Resettlement theidingin hongkipuak Refugee tepen ahamsadiak te hizawlai hi. Damlohna hangin Medical Assistance akisamkin te, bawlsiatna panin silo in anungtalai liamliam te leh numei naupang lauhuai atuak phadiakte ahi uhhi.
Hihbangin bawlsiatna tuamtuam athuak Refugee gambel te adingin belhdingdang omlo kawmkal ah gamthumna Resettlement honglaksakte pen mite nuntakna ahonkhia taktakte nahi uhhi.
Leitungbup in Refugee atamzawtham pen gamzawng, gam khangto lualo te vive ah aom uh hi a, tualak panin gamthumna ah Resettlement akipuakthei pen 1% zong acingzolo hilai hi. USA gamsung ah luttheih nadingin akipuak te pen US Security Screening Process tamveipi akibawlkhit ciangin akipuak hipan a, amau adingin nuntakna thak akipanding uh ahihi. Tua ahih manin UNHCR in US gamsung ah asawt hetlo hunsung in Refugee gambel te alutkiktheih nading uh ka lamen mahmah uhhi.
Abeisa kum tampisung United States pen Refugee Protection vaitawh kisai in leitung makaipi Global Leader nahiden uh a, American mite pen cimawh dongtuakte huhna ah zung thukpitak akipkhin te nahi uhhi. Tuabang mahbangin nasepsa nahoihte uh nong zopsuakding uhzong kong lamen mahmah uhhi.
Tua ahih manin minam leh biakna deidanlo in Refugee te’n gamthumna Resettlement paitheih nadingin ka lametsak mahmah uhhi. ZD Sawltak #zomidaily
Comment piaknop aomleh...