Minam kemcing Upadi (Law – Dan, Ngeina) – 1

Minam kemcing Upadi (Law – Dan, Ngeina) – 1

Minam Kemcing Upadi (Law) pen 2013 kumin kigen a, 2013 June 9 ni-in Minam, Biakna, Ngeina Kemcing pawl in President U Thein Sein kiang ah laiphah hi. U Thein Sein in Gambup Innpi puak a, Minam Kemcing Upadi bawl ding commission guang hi. Tu-in tua commission in Upna leh biakna khelna, Ta neihzah ciangtanna, Kitenna (zi neihzah ciangtanna) kihel hi.

Upna leh biakna khelna tawh kisaiin mimal suahtakna bulphuh hi a, mi khatpeuh in suakta taka ama ut leh deih banga upna biakna neih thei hi. Upna leh biakna tawh kisaiin kua kumpi, ulian, makai kiang ah phalna kisamlo hi. Theihpihna leh ciaptehna lai zong kisamlo hi. Upa leh biakna ah mihing khat in ama ut bang leh deih bang teel theihna, hih theihna om hi. Upadi (law-ngeina), nulepa, minam leh gam ki-ukna tawh zong kisai zenzen lo hi. Tu-in Upna leh Biakna Upadi (Draft) sungah upna khelnuam mi khatpeuh in Lahwahkah (Immigrant) zum, numei kipawlna zum, Sangsiate leh Biakna zum pan khatciat kigawm Committee in phalna apiak lehbek biakna khel thei ding hi kici hi. Hih committee sungah biakna namkim pan khatciat kihel committee hileh phamawhlo a, biakna tawh akisailo numei, sang, lahwahkah tawh hih thu akisaina om hetlo hi. Buddha biakna simloh adangteng kumpi khutsung ah koihsawmna hi-a, biakna atuam din hinapi amau khutnuai atungsak nuam ahi hi.

June 15 ni-in Chatrium Hotel ah Buddha, Christian, Islam leh Hindu makaite kimuhna nei uh a, Kawl kumpi bawl biakna khelna tawh kisai Danbu pen Biakna 4te Laisiangtho hilhna tawh kituaklo hi ci-in Biakna makai 4te in gen uhi. Shwe Nyah Wa Siadaw U Pinyathiha in Kawlgam ah hibang ngeina Dan koih kullo a, lungnuam takin tenkhopna thupi kisa hi ci-in pulak uhi. Christian makai Prof. Dr. Saw Hlaing Bua (MIT), Islam biakna makai U Taung Lwin Aung leh Hindu Sia U San Myint Hlaing in zong biakna khelna vai kamkuppih uhi. Leitungbup pan USA leh International Religious Freedom Commission kihel adang International Organization 80 val in tua ngeina bawlloh ding ngen hi. Hih Upna biakna kheelna Dan (Ngeina) bawl dingin Minam, Biakna, Ngeina Kemcing pawl in President tung ah 2013 July 9 niin lai tawh ngetna nei a, President in Gambup innpi ap hi. Hithu hangin biakna khempeuh patau linglawng uhi.

Ta neihzah ciangtanna zong tualthah kipatna ahi hi. China gam ah One Child Policy (Ta khat) hangin numei leh pasal kilekkimlo, ta khat neih ding hileh tapa bek kideihin tanu ahih leh anaupailai sukhia ahih kei leh, numei asuahcilin that, gamlak ah nusia, pasal bekbek naupang khangno omin numei nungak omlo-in gamdang panin zi ding lei, la, gu hangin miguk mileina piang hi. Nazi Germany Hitler hunin migina bek ta nei ding ci-in aginalo, tagah, meigong, khutdawh ngen, miphak a kipan mizawng daipamte taneihna thagui attan sakin upadi (law) tawh uk hi. Anunung lam ciangin Aryan minam bek hingkhawi ding ci-in Jews mi million 6 haltumin Gypsy, mivomte zong tua bangin bawlsia-in haltum uh a, Germany minam siang sitset bek omsak ding vaihawm uhi. Ahi zongin Sengam ah buaina pianga, khangthak nunei mipil ding omlo-in innsung, minam leh gamsung ah numei kisam hi. Dr. Chailing makaiin One Child Policy phiat ding kumpi ah gen uh a, kum 50 khit ciangin ta nih nei thei ding cih upadi (law) koih uhi. Hitler pen mi tamthatpen kumpi ciin minsia tang hi. Kawlgam zong Germany Hitler bangin Kawl minam siangtho leh biakna siangtho-minam kemcing upadi hangin minam dangte leh biakna dangte aa ding lauhuai hi. Ta neihzah ding pen upadi (law) tawh uklo-in pitna tawh mimal lungkimzah leh vakzawhzah ding neihtheih ding lam ah mipi thuhilh ding thupizaw hi.

Lang Khan Khai
Editorial
Zomi Times