Min le Mi
Min ihcih pen mi taangin akizang, mi khat in kua hiam cih ihtheihnading in, tua mi in kua hiam cih hongtheisak leh bangci mi hiam cih hongthei sak dingin akizang ahihi. Min in tua minnei nu, minnei pa tawh cikhat sakhat ahihi. Tua ahih manin, khanglui lai in naumin phuak, naumin piakpen nathupi sak mahmah in, pawipi bangliang in u le nau te samin naumin piakna, naumin phuak na ni nanei uhhi. Min kisapna tawh kisai in ei Pawlpi thuzui mite leh, Pawlpi sungah atangzang midangte tawh akizom mite akipan khat le khat theihna kihopsawn ding deihna in minkisap na khat ihki hawmsawn hi.
1) Leitungah Doctor cih minnei pen atam in tam in, simzawhloh liangin atam ahihi. Mite phattuamna ding in amaute ngah Doctorate azangthei tawh, mite siatna ding le amaute aituam adingbek in amaute ngah Doctorate azangtawh cihbangin anamnam ihmu a, ihthei hi. Doctorate ngahcih ciangin, thukhat lakhat tungah (scientifically) thumongman lamongman in ngaihsunthei leh lakkhia thei cihna ahihi. Tua bangmin angahte pen Doctor ci in mikivawh hi. Tua angah Doctorate in leitung pilna min le vaangbek hi in, Pasian sungah min le vaang hilo hi. Leitungah a sin pilna aciangkhat thei ta hi cih ciapteh na bek ahihi. Tua ahih manin Leitungah aminthang University tampi te ah, Doctorate ngahna bek tawh laihilh khuanna ngawn napia lo in, post-doctoral thesis at masa lai uhhi.
2) Pawlpi sungah Siadaw te (Bishops) te pen Episcopal Consecration – Siadawsuahna angahna tawh Divine Doctor kipia hi. Cihnop na ah, Pasian thutawh kisai thuman hilhkhuan neipa cihna min leh ahilhdingpa cihna zong ahihi. Ahizongin tua Doctor mintawh amau te na kisam lo hi. Mi khatpen amah tawh kituak a saptheihna in ciimna leh pilna khat ahihi. Bishops – Siadaw cihpen min leh za hilo in, thuneihna ahihi. Bangthu neihna hiam ihcih ciangin Pasian thu tawh kisai thuneihna hi in, tua pen nungzuipi te tungpan hongkipia suksuk Christu Topa tungpan hongpai thuneihna (authority) ahihi. Tua thuneihna in apostolic authority – nungzuipi te tawh kizop thuneihna ahihi. Amau te in Doctorate angah manun bishop – Siadaw asuakte hilo in, Pasian teelman in nungzuipite zalaih ahihna tawh, nungzuipi te neih thuneihna anei te ahizaw uhhi. Hih thu hangin, Bishops-Siadaw te pen kua mahin Dr so and so, Dr Peng Lam, Dr Zo Len cihbangin nasam lo hi. Banghanghiam cih leh Doctor cih min pen Bishop khat adingin bangmah man anei ahi kei hi. Bishop cihpen episcopus – cih kammal pan hongpai hi in, upna sungah mite akem akhoi pa hi a, Pasian thutawh kisai in thuman leh thutang hilhtheihna’ng in, Christu Topa piak ahi nungzuipite neih thuneihna anei pa cihna ahihi.
3) Eite Bishop – Siadawpi pa ahi Siadaw Felix pen muntuamtuam leh, huntuamtuam te ah, Dr Felix cih ahizongin, Dr Lian Khen cih ahizongin kisam thei hi. Ei Catholic te in, eite tungah Pasian hongpiak Bishop akici nungzuipi te zaneihna anei, Pasian in Aaron bangin asap tuam mikhat pen, Pasian mai ah bangmah man anei hetlo leitung min le vaang ahi Dr. cih lel tawh ihsel zokei dinghi. Ama thuneihna in leitung Doctorate ngahtuamtuam te thuneihna tawh
akibang in ihkoih zongei kei dinghi. Leitungah a utpeuhin a ama uuk laitawh kituak in Doctorate ngahthei a, Dr min pua thei hi. Tua Dr min zong, University pan in Professors te piak ahihi. Ahizongin Bishop – Siadawpa ii thuneihna in leitungtawh kisai lo in, Pasian sapna leh Topa Jesu in anungzuite tungah apiak thuneihna angah mite bek ahih man in, Pasian in atuamteel mite bek in angah thei ahihi. Tua hi in, mi khatpen amah tawh kituak a saptheihna in mipil nasep leh, mikhangtote kizopzia ahih lam phawk in, tulai khuahun luanzia te etsiamding thupi hi.
Tua ahihman in, Bishop Felix pen Dr Felix ci in hongkisap ciangin, ama ii nungzuipi te zalaih ahihna, ama ii Pasian sungah thuman thutak hilhtheihna thuneihna aneipa ahihna, ama ii neih apostolic authority – nungzuipi te tawh kizopna pan aneih thuneihna khempeuh maimang sak hi. Hihthu hangin, Siadaw te pen nungzuipi te zalaih te, nungzuipi te thuneihna anei te hi ci in a umlo leh, asanglo te in, Siadaw pa pen Dr Lian Khen cih ahi a, Dr Khen no aci a, Dr Felix aci zongin, ei Catholic thuzui te in, kammal nunga akikhaaksa a om thaltangte mu khinkhian in, kammal nuai ah ih upna te asel te ihhih lohding thupi hi. Tua hihman in, ei Catholic thuzui akuama peuh, Bishop Felix tawh kisai in, midang tetawh akizom te in, Bishop pa pen amah tawh kituak min tawh hongsap saknang theihsiam ding thupi ta hi.
Rev Fr Damian Dal
(Nimdildial)
Comment piaknop aomleh...