Zomi leh Chin gamthumna tungsa te sungah apiangkhin thu

Zomi leh Chin gamthumna tungsa te sungah apiangkhin thu

Gamthum zuan ding a kisa gamnihna ah gambel a om UNHCR siau Zomite tungah ka zaksak nop mahmah thu. A tamzaw pen case bawltawm a piang vetlo thu, a piangbang a gen vive ihih na ah ka tanu galkap ten hong buansak, kazi hong ki buansak, ka pasal/ka pa mang, kazi/kanu mang, ka tapa mang, ka tanu mang cih bang a case bawl te na kisik hun uh ani hong tung kha thei ding hi.

Na case bang linlian in nangtung hongtung kei phial zongin na Innkuan sung ah noploh na, buaina, sihna, man na, ki khenna koi ci hiam khat a hong tung dingin na ngaihsun ngei hiam? hihbang thusia hong tung ngei kenteh na ci ngam hiam? Nang tung leh na innsung ah hong tung ciang lamdang sa kei in maw! Na Zuau gah a ne nahih lamtak natel thei pan bek ding hi.

Hihbang thu kong gen ciang lamdang sakna anei tampi i om kha ding hi. Norway katun zawh kum7 bang a pha ding hi ta, kong genna hangin ah ka theih mahmah, ka ki naih pih, kaki kholhpih, ka lawm, kaveng, ka paamte tung pan ka sin khiat thu ahi hi.

Case manlo a bawl pen kum nih, kum thum khit teh hong tung takpi mawk hi ei, nang le kei in i telpihloh hang amau na ki tel mahmah lel uh hi. Hong tun khit teh bel poitak sam ei maw, cih bek tawh hun bei ziau a, i kisik hang lah hih theih ding bangmah om nawnlo, Case i bawl ma in ngaihsun ditdet le hang ngam huai hetlo bektham lo in Pasian zuau a khem ihih lam ki phawkna pi hangin Pasian in hong maisak lel na inteh cih upna tawh kal i suan tek uh hi.

Hell khuk tun na ding Case manlo a bawlbawl khong i khak ding zong lau huai mahmah hi. Christian innsung pan khang khia ihih na ah LST sung a kigelh thu tawh hong kituak thei hetlo mawk hi.

Hihbang tuahsiat na a thuak kei bekin a milip, ahi zongin ka theih innkuan 8-9 bang omta hi.

1. Motor accident cih bangin (Zomi leh Chin sungah)

2. Lam et lohpih a sihna cih bangin (Zomi leh Chin sungah)

3. Tanu/Tapa maw lamkhial gop guihtheih, nightclub khong ah peuh hun zang (Zomi leh Chin sungah)

4. Thau tawh ki kaplum cih bang (unau Chin te tungah tungnuam pha diak)

5. Gilo, guta a vak, lampam khong giak cih bangin (unau Chin te tungah tungnuam pha diak)

A Case uh hoihtak va dong leng a tung a kagen bang teekteek zuau thu vive tawh gamthumna na tung te vive ahi uh hi.

Amin te uh kong gen loh hang a paisa nung kum sung News pan ahi zongin FaceBook pan na sim khak ding uh hong lam en ing. Mung Pian, Stavanger, Norway