Mimal muibutna aading tawhtang ahi P/PC kikhaikimna

Mimal muibutna aading tawhtang ahi P/PC kikhaikimna (P/PC balance for personel effectiveness)

Mihing khat ih hih na tawh ihsepna pepeuh ah muibut ding pen kisam mahmah hi. Tua bangin muibut theih na dingin a kiselcip thusim khat om a, tua in P/PC kikhaikimna ahi hi.

P/PC kikhaikimna ih cih ciangin ih deih a gah (Production) leh a gah piansak theihna (Production capability) kikhaikimna cihna ahi hi.

Ih nuntakna ah sepkhiatna bekbek tawh hikhin lo a, sep khiat zawhnading tha om ding kisam a, tha om nading gilvah ding kisam hi. Hipen leitung thugui paipi (natural law) khat ahi hi. Natural law/principle icih te pen deidan neilo mizawng mihau leitung a om nate tungah akibang in a piang a kikhel pakpaklo thu nam khat ahi hi.

Hih tawh kisai sanglaibu sungah akisin ahi Aesop’s tangthu khat ih sut nuam hi.

“Lokhopa leh khamtui a tui vatawt”

Nikhat lokhopa in a vatawt pi khamtui atui lam hong thei hi. Lamdang salua in a nuam mahmah hi. Vatawt pi in nisim in khamtui tang khatta tui hi. Lokhopa in Tua khamtui nisim in la in khuasung ah zuak zel a, hong hau semsem hi.

Nikhat Lokhopa in hih vatawtpi sungah khamtui tampi tak om kha ngel ding ahihteh, a gilpi kheikham in lakhia leng khamtui nikhat tangkhat ka ngak sang hoih zaw ding hi ci in a vatawtpi man in a gilpi hong kheikham hi. A gilpi sungah khamtui tangkhat zong a omloh lam a muh ciangin lokhopa dah in a vuulcip hi.

Hi tangthu pen “Huaiham loh nading hong gen khat hi ci’n kisang hi. Ahi zongin a hong piak thuthuk pi khat na om lailai hi. Tua in P/PC balance thu ahi hi. Vatawtpi khamtui a tui theih nading in a nuntak ding bek thamloh a gilvah a acidam ding kisam hi. Khamtui pen “Agah” (Production) hi a, vatawtpi pen a gah piangsak (production capability) ahi hi.

Mikhat tung panin na hoih tampi ih lam en hi. Ahi zongin tua mipa panpih ding pen ki thupi sim lo thei hi. A khamtui kideih in, vatawtpi kimanggilh thei hi.

Cycle hat mahmah, to mahmah ding ki deih hi. Ahi zongin tua cycel a hat, a hoih nading engine oil, datsi cihte akipan sit a vel zel ding kisam hi.

Ih tate laipil ding kideih a, laisinna (laikung laidal, hun, sum lepaai) ding ciangin hamsa kisa thei zel hi.

Ih tate pilna ding deihsak lua in laikung laidal sum akipan akisam omsak lo in ih hanciam pih thei hi. Ahi zongin ih tate pilna ding tua pilna thupitna theihsakna ding ahkl pilna lampi lahna ding kimanggilh thei zel hi.

Nasep ih hanciam mahmah hi. Anne manlo, khawl manlo in ih om thei hi. Nasep hanciamna hangin mite pahtak kisuak in khasum tampi kingah hi. Ahi zongin anne manlo in ih omom na hangin ih pumpi zawngkhalna kingah hi. Hun awng neih loh na hangin innkuanpih, lawmlegual tawh ki gamlatna piangsak thei hi. Tua in bangzahta in ih gualzo zongin hunsau ah pumpi, lungsim gimna na suak thei hi.

Ei ii septheih pen vatawtpi nisim a tui (production) theih nading in vatawtpi (Production capability) acidamna ding, a gilvah nading, nop asak nading kisam hi.

Gialvah nading, nopsak nading bek ih thupit sak leh mi thadah kici zel hi. Bangmah gualzawhna omlo hi. Gahkhiatna bek ih thupi sak leh hunsawt ah kisih lawh thei zel hi.

Cycle engine oil khasim laih in datsi ih thun den phial a ih zat kei leh amawkna pi suak hi. Cycle zat cih tak zangin engine oil khek ngeilo, datsi thun ding kin mello, dawm mello in utbangin ih zat gawp leh a sawtlo in tua cycle kisia baih ding ahi hi.

Singgah nading in akung tuibuah kisam in van zel kisam hi. Tuibuah bekbek lah hisamlo a, a gah hun dng bek ngak teta tawh lah bangmah piang theilo hi.

Mihing nuntakna ah zong nasep hoih tampi sepkhiat ding ih utciat hi. Tua nasep sepzawh nading kikhualna kisam zel hi. Nasepna bekbek lah hikhinlo a, kikhualna bekbek lah hikhin lo hi. Relationship khat zong hibang dan mah ahi hi.

Tua hi amuibun mi ihih thei nading in P/PC hi geel pen akikhaikim detding ih nuntakna ah thupi mahmah hi.

(Hi thu pen thuthuk lrh thu laigil khat ahih manin ih ka lai-at tawh zong kitel khin zolo thei ding hi. Kei theih teel naciang tswpna tawh ka gelh ahi hi. A teelnuam zawlai ten mimaljn ih kikum thei aa, anuai dapphah laibu pan zong kikanbeh thei hi)

Nk Khanno (Zingsol)
Laibu dapphah – Steven R Covey, The 7habits of highly effective people.