Theihloh lawhcinna

Theihloh lawhcinna

Scotland gama Minister (Pastor) u-ham khinsa khat in a Pasian nasepna-ah lawhcing a kisak lohna thu, Pastor thugen siam, Ralph W.Sockman kiangah a gen hi. Thugen siampa in, “Kum 20 val lai-a na nasepna-a hong pai den numei khat na thei lai hiam” a ci hi.

Puteekpa in, “Aw, hun sawtlo khat sung hong pai mah hiven, hong kilang nawnlo hi” a ci hi. Pastor thugen siam Ralph W.Sockman in, “Hoih ei, tua numeinu in zukhamkham sanggam pasal khat a nei hi. Na thugen’teng mah a sanggam’pa a hilh den hi. A sanggampa zong a piangthak pah hi. Tua pa pen keimah ka hi hi” a ci hi.

Lawhcing leh lawhcing lo cih thu pen mihing’ aa hilo zaw a, sepding hong kipia khat i sem taktak hiam, cih hizaw hi. “Na lawhcing pha hi” cih hilo-in, “Nasem pha hi” cih hizaw hi. Pasian a kihel’nakleh nasep khat peuh neu-lua sa kei in.

A mun a velpa bek na hithei hi; a lovatpa bek na hithei hi. A khaici zongpa na hithei hi. A vawhpa bek na hithei hi. Gim leh tawl takin, thatang suangin a kho ngiatngiat zong na hithei hi. A hih keileh olno takin a at-ziau zong na hithei hi. Na pianthakna mahmah nangawn nang’ upna leh nang’ private ngaihsutna hi lo thei hi.

Thu-a i sim’kholloh khat ii’ khitui naptui thaman kihi lel ngel thei hi… hithei mah mataw!.. Thamante, lukhu-te, thupha-te i cih pen, i lawmte’ hong guatguat, i galte’ hong piakpiak, na hi gige dinga, tua thamante i san ni ciangin, i lawmte, i galte’ tungah itna leii i ba-tam lua kha deh maw! Hithei gige mah-in teh mataw.

KUMPITE MAH KUMPI ZO SA’NG!

Dean Farrar pen England kumpinu Queen Victoria (1819-1821) innsung pastor hi a, a nih-un nuam kisa mahmah uh hi. Nikhatni-in Topa Jesu hong pai kik ding thu kikum uh a, kumpinu in, “Ka nuntak lai-in hong paileh ut lua ing” a ci hi. Farrar in, “Tua zah-a na ngaklah bang ci nuam na hiam” ci-in dong a, “Ka kumpi lukhu a khephungah ka koih nuam hi” a ci hi.

A LAMDANG VANZAT

Tuipi tunga khualzinte lakah, “Mutiny on the Bounty” a cih tembaw khat pen a minthang mahmah hi. Tua tembaw tungah Bligh a cih pa pen makaipi, (Captain) ahi hi. A gitloh luat manin a nungzuite kipawlin a langpan uh hi. Tembaw neu khat tungah a mah leh a mah a pawlpih teng a khakhia uh hi. Langpang lamte in tembaw a ngah zaw uh hi.

Tua bangin a paipai uhleh New Zealand leh South America kikal, Pitcairn tuikulh a tung uh hi. A tembaw ‘Bounty’ pen a haltum uh hi. Tua tuikulh-a teng mite pen gilo mahmah uh a, kum 10 a phakin tua langpang mite khat bek om lai-in a dang teng tuikulhmite in a thatlum khin uh hi. Tua a om lai pa pen Adam a cih hi a, a lawmte kithat khinin a mah bek a nungta lai ahi hi. Nidanga a tembaw hal’ uh sungah singkuang hoih sim khat om a, tua sungah Lai Siangtho bu khat a om hi.

Tua Lai Siangtho pen Adam in a sim’leh a piangthak ngiau hi. Tua banga a pianthak ciangin tua tuikulha teng mite’ lakah Pasian thu a hilh pah hi. A sawt lo-in khanlawhna piangin, tuikulh migilo hontang teng a piangthak khin-gai hi. Pasian in zatmawh khat beek zong a nei lo ahi hi. Tdkhen