Mimal lunggelna ~ Kam Suan Mung

Mimal lunggelna ~ Kam Suan Mung

Kiho khawm, kimu khawm thei leh maw cici ing ee.. ZRA, ZRA-E, ZNV, ZFU, PDF Zoland, Zomi PDF, CDM Siyin, PDF Tonzang, Zomi thautawi khempeuh… Kawlgam ukna kilaihna vaitawh hong piangkhia Zomi sung a thautawi kipawlna teng maitang kituah in kimu khawm sak zo leng uthuai taktak.

Kua in panla a bangci sepding cih bel ngaihsut hak peuhmah sam in cin. Kigal phinphin, Kigal koko, Kigal mawhsak den cihtawh i vai veng zo hetlo ding in ih minam i mailam buaihuai to semsem le kilawm sa mai hang ee.

Kum 30 valbang gamleminam ading a dingden Pate, Ute in ata anaute khatvei hopih kik in kamkhum tawh kizol thei lai hen la, Naute, taten zong ute, pate thu dong pha kik in kamkup khop ding sawm pha lai hoh le uh ci ngeingau hang ee.

Eile ei vive hihang a maw, Pau kibat loh hang beh kibang hive hang, Beh kibat loh hang khua kibang hive hang, Khua kibat loh hang sisan kibang hive hang, Kuamah akipai thei ding omlo hihang a… Tupna kibang, lunggulh kibang ngel ding a… Totna lampi kibang lokha maw khawng bek hiding in lamen hihang a..

Kimu khawm, kamkum khawm, holim khawm thei leng vai khempeuh hong lem mahmah ding in um ngeungau mai hang ee. Online Social Media (adiak in Facebook) tung pan thuthak khatpeuh na sim teh upding le uploh ding pen,

• 1. Agelh nu agelh pa kuahiam,
• 2. Mi gina mah hiam,
• 3. Mi kician mah hiam,
• 4. Min takpi at mah hiam,
• 5. Photo gina suang mah hiam,

Cihte hoihtak ngaihsun khinkhai masa phot in tuakhit teh upding le uploh ding khentat pan leng.

• Thu gina a hilo,
• Thu kician a hilo,
• Upmawh thute,
• Phuah tawm thute,
• Zuau thute,

Thu manlo hi ci a na khentat lai kisuahte pen hawmsawn selo, kuppih selo le nusiat san ziau le hang minam sung kitel khialhna tampi hong daituam mahmah ding in lamen ngeungau hang ee.

Kum 30 val bang akalsuan khin ZRA in a ta gual ZFU, PDF Zoland, CDM Siyin, Zomi PDF, PDF TEDIM etc teng hong makaih, hong angvan, hong kem, hong cing henla …

A taten zong belh nading, buk nading, tawlngak nading in ZRA phualte hong zang thei bang hi zenzen le bangzah in etlawm in lungmuan huai ding i hiam ci in mimal in ngaih sunsun kha zel ing ee.

Kitelkhialh khakna le buaisung a nuntakna hong piakhia ita inaute khempeuh phawk mahmah ngai mahmah hang ee. Kitelkhialh khakna tawh matlehen a thuak lai ita inaute zong cidam in a manlang in hong suahtak gaiding uh lunggulh mahmah hang ei.

A beisa a gamtat khialhna, sepkhialh khakna, kidawn khialh khakna le ki etkhialh khakna khempeuh i Biak Pa Pasian mintawh kithum, kimaisak zo in,

Zomi thautawi khempeuh kipawl khawm, semkhawm, mapang khawm thei uh hileh Zogam, Zomi le Zosuan tate kikhalum in ki lungmuang mahmah ding hi a maw ci in mimal in lung ah na gelgel ing ei …

More: Siamsin Makai ngeikhat hihna tawh ~ Kam Suan Mung

Nulepa, ulenau a kua mapeuh aw hih pen kei mimal lunggelna hi a, ngaihsut dan akibat keile kimaisak ni ei maw… Leitungbup mite mawhna tankhia ding a hongsuak naungek i itna, daihna le lungnopna Zomibup tung hong tung kim ciat tahen. Kam Suan Mung (Kalaymyo) December 16, 2021 5:50 PM