Sisan, sisan luang ~ Sia Do Khup
…. Lia Kimnu in dipkua patau kawmin hong ko (gen) samsam hi. Tangval khat in dailenbuk khuamial sungah zakang (No.4) kisun sim ahih manin a si tampi luangkhiasak kha ahi hi. Thukhun zui-in biakinn pan ciahsak ding hiziau hi. Ahi zongin No.4 kisun khin ahih manin a ci a sa, a na lua teng thuak zo ta hi.
Hoih ding ut lua ahih manin “Sia aw hong ciahsak mahmah ken, kikhel nuam lua ing” hong ci hi. Topa Jesu kiangah ci leh zong “Om lai in” ci ngel ding cih ka ngaihsut manin thukhun palsatin biakinn ah ka omsak kik uh hi.
UT LOPI MAHIN ZANG TEITEI
Kikhel zo liai le uh a kikhel nuam mahmah uh hi a, ci leh sa in a thuak zawhloh manin a hun in a tut teh hoih sa lo pipi mahin a zang tantan kha uh himawk a maw…
KUAN HONG BUM HIAM?
Nidangin sut khat Ks.10,000 kim man ahih manin mihaute tate bek in zang zo uh hi. Tuin Ks.500-1000 man lawmlawm ahih manin zu sangin tawm manzaw ta hi. Khangnote bek hiloin khangham leh naupangnote nangawnin zang ta hi.
KHANG KIBANSAM PAKTAWNG DING IHI HIAM?
Zomi tampitak i sih nading, innsung gal a pian nading, masuan maban nei zolo a i om nadingin damdamin kua in hong lom thah ahi hiam? ngaihsut huai mahmah a, vei huai mahmah ta hi.
THAUTANG SANGIN
Thautang a si sangin khamtheih guihtheih tawh a si Zomi i tamzaw thamtham hi. Mai lamah hong tam semsem lai ding himawk hi. Zogam khua khatah papi teng zavom zakang tawh si khin ahih manin nupa kop a dam lai inn nih bek om lai hi. Bangzahin khasiat huai hiam?
ZOGAM AH KIZEL’
Na theih loh kalin na khua na inn sung hong tung hi. Zogam khuapi khuata ah kizel mahmah ta hi. Bangci do ding ihi hiam? Hih vai-in makaite i tukhawm ngei ta hiam? Pasian nasemte i khitui a luang ngei hiam? Sum hau ten i piakhia nai hiam?
KHUA KHAT AH LAWHCINNA
Topa sawlna tawh Zomite tenna khua khatah giahkuan cialpi i bawl thei a, Khitui Gospel sung pan Pa Sian Liante innkuan in Ks.3,000,000 leh Evan. Lian Min Thang (Thangpi) in Ks.1,000,000 tawh hong inntek pih uh hi. Amaute tungah lungdamna lianpi i ko hi. A dang beina khempeuh eima innkuan pan ahi hi.
PASTOR-TE LEH ZYA IN HONG HUH
Khuasung Pasian nasem kipawlna leh ZYA kipawlin vai khempeuh tavuan hong la uh hi. Kepkep cincin a kul tam mahmah ahih manin gim mahmah uh hi. Amaute tungah lungdamna lianpi i ko hi.
TUNI DONG KIZOM LAI
Khamtheih sila mi 90 val a kikem hi a, ni 7 a cin main a lang bangin thuak zoloin hong ciahsan mawk uh hi. A om suak zo teng in khitui taak keuhkeuhin Pasian kiang hong zuan thei uh hi. Pasian nasem kipawlnate in tuni dong biakinn khat khit khat ah nisimin biakna teci panna neihpih uh ahih manin kip toto uh hi. Sia Do Khup
Comment piaknop aomleh...