Miimbang Pianni Ka’ Thelnahleeng ~ Pu Zokhai

Miimbang Pianni Ka’ Thelnahleeng ~ Pu Zokhai

Gimna khua-ul ziat leh vei-ah kaai-in, simlei-a sakmeelhoihpen Liapaal Ngalliam’ laángmaai zeel-a, phamna kaankiil pan-in maaimit gunliang nangawn laamto zolo pipi-mah amuanpen asuanpen ka’ Zuapa leh a’vondeihte lametna dim-tawh maaimit heem-in hongdon-in, hinna lam-hiam, sihna lam-hiam meelzong thei nawnlo zahdong-in ahuu asangkhia ka’ Tuunnu-aw, “miimbang pianni” (Suahni) tuang hongtun sim-in na’ thuakna leh anbang nong’ itna-in sinlaai vabang hongphawl den-e.

Tong-in aleel zawhloh gimna kua-vei sumbang na-tuak nung-ah ka’ Tuai-ngaih’ ading khatvei na’ luang na-kham leuleu-a, Zahtaákbaang leh Amanpha Tuunnu na’ hihna-tawh sihlehhin kaal-a gimna 10-vei nong’ thuak man-in ka’ Ciin leh Tuai teng-tawh simlei-ah “mihing hihna” tang-in Piangsakpa’ Geelna sung-ah guabang ka-hing thei uhhi. Na’ zaalna Thangvaan Kham Vaangkhuapi Tualnuam-ah ka’ Zuapa-tawh laukha muang-in laambang na-paak un! Na’ vondeihte taangbang damkim ung!

Zomi pupa’ khanpih lungsim-ah ka’ Nu-pen tanu 6 akizom-in hongneih ciang-in sihlehhin kaal-a gimna 6-vei athuak ahihang-in “mothak” banglaai-hi. Ka’ Upipa hongpian ciang-in, “Mothak bang-in hong kibawl nawnlo tuamding” ci-in lawpna nei khading-a, ahizong-in patauhna-in vukcip laai veve khadinghi. Ka’ U-nihna hongpian ciang-in, “Tu-in ka’ patauhna phatuam zawdeuh-e” ci-kha dinghi. Kei ka’ pian ciang-in, “Tu’n khamuang taktak ta-ing” ciding-in ka-deihbawl-hi. Ka’ Nau apian ciang-in, “Tu’n angtang mahmah ta-ing” aci ding-in kasehhi.

Miimbang Pianni (Suahni)-pen Zomi Pupate’n bawl ngeilo-hi, banghanghiam cihleh nimit kician ciaptehna Calendar neilo uh-a, ahizong-in Pate’ khang pan-in Khazih Pawlpi paizia hong’ khanna-tawh kituak-in pawlpi laibu sung-ah laisiam upate-in kician tak-in ciaptehna hong neithei-uh ahihi. Suah Nimite kitel theita ahihman-in tua Calender hongguan namliante mah-in amau’ ngeina-tawh suahni abawl-uh paiziate-in Zomite damdam-in hong nawmvalh cihthei hita-hi.

Miimbang Pianni-pen biakna lam-ah Lai Siangtho sung-a kigelh-pen Herod’ Suahni Cialpi hi-a, Tuiphuum Yo’channa (Zawhang)-in sihlawh-hi. Tua ahihman-in biakna lam-ah angentel, akuhkalnuam, acitaknuamte-in bawl lozaw uhhi. Kum 24 ka’ cinkum; 1998 kum-in India lamkaai Zogam khuapi Lamka-ah ka’ innkuanpihte-in lamet hetloh-in hong bawlsak kiau-a, laambang paakna luankhi gialbang kia-hi.

Phai-ah tua-ni innkuan-in ka-hawh uh-a, Pa Nun-in ka’ liangko azaina hong tehsim-in puanpaak khat na-leisim khiinkhian-hi. Dalzazi Laibu no-khatzong leisim khiinkhian-a, nitaak ankuang uumding ciang-in nauteng-in, “Happy Birthday To You…” lasa-in tua citpiakte hongpiak-uh ciang-in ka’ khitui pulh zangzang-in pauthei lo-in ka-omhi. Tua nitaak ciang-in hih lungdamna-tawh kizom-in thu tampi ka-lungngai toto-a, ka’ Nu leh ka’ Pa ka-phawk mahmah-hi. Tua hun-in ka’ Nu Vaaiciahkhin hi-a, ka’ Pa damlaai-hi.

Tu-in, ka’ nulehpa anihtuak-uh’n Vaaiciahkhin-uh ahihang-in taang ka’ sinlaai-ah guabang hingden-hi. Sianmaang hawmsiam-in vondeih nihthum hongpiak nung-ah Tuun leh Zua’ ITNA meel-in thei seem-in, luankhi-tawh zaila ka-khiang zeel-a:

TuunZua Hong Ngaiveng!

Taang Khatna:

• Simlei nunna lung-in geel-in gaaldon kiikleng meelmu-ing,
• Ka’ TuunZua leh Tung Sianmaang-hi, Guabang ka’ Hinna:
• Lummeii kaai, huikhii laangzong’n, tuihualte hong kilokzong’n,
• Albang dahlo maaciang suanden-ing!

Taang Nihna:

• Sianmaang hawmsiam, Angkawi Ngaih-tawh Vondeih nihthum hongpia-a,
• Naubang kapzeel, laambang paakzeel, Vondeih nihthumte:
• Kei’ ading Tuunnu’ Gimna, kei’ ading Zuapa’ Tawlna –
• Meelbang theita’ng, TuunZua hong ngaiveng!

Sakkiik:

• Mubang hong ngai-ing, Tuunnu-aw!
• Anbang hong it-ing, Zuapa-aw!
• Von nihthum naubang kahna’n tong hongleel-e!
• Tuun-aw, Na’ Angnuam ngilh mawh’ng-e,
• Zua-aw, Na’ Khaliim ngilh mawh’ng-e!
• Anbang Nong’ Itna Damtui dawn-nuam laaiveng!

Taang Thumna:

• Laailung muang in, Tuun leh Zua-aw, Na’ vondeih-in hongleel ning,
• Na’ Sawnvonte hambang huai-in Guabang na-hahning!
• Pi leh Pu hong ngilhlo ding-in, khua leh tui hong ngilhlo ding,
• Nong’ Itna-lian Anbang na-muam ning!

TuunZua’ Vondeih, Tunsawmkhai Zokhai

November 10 Ni-in ko’ innkuan sung-ah kei leh anuai-a te-nih ka-piang uhhi:
– Papi (Rev. Zel Heén Maang)
– Tg. D. Nau-Tuang Zokhai

Miimbang Pianni TOPA ZEISU-in Thupha Hongpia Tahen! Amen.