Midangte ading natna hithei

Midangte ading natna hithei

Khatvei naupang pawlkhat Bual gei ah hong pai uh-a, Bual sunga om Ukeeng/Uiphuk-te suang tawh a deengin hong kimawl uh-a, gualnuam mahmah uh hi. Tua bangin kimawl kawmin Ukeeng/Uiphuk-te dengdeng uh-a, Ukeeng/Uiphuk pawlkhat si hi.

Tua danin Ukeeng/Uiphuk deenglum in nuamsa mahmah uh, nui kawmin kimawl ziahziah uh hi. Amau bel nuamsa mahmah uh hi.

Tua laitak in Bual sungpan Ukeeng/Uiphuk khat hong awngkhia beba a, “Naupangnote aw, na kimawlna uh khawl un. No adingin ciamnuihna, kimawlna le gualnopna ahih hangin ko adingin sihna hi. Khawl tapeuh un,” a ci hi. (The Boys and the Frog – Fables of Aesop)

Ngaihsut ding

Khatveivei mi thanemnate ciamnuihna in zangin kimawlna in i neih khakpen ei ading gualnopna ahih hang a thuakte adingin natna lianpi piangsak thei ahihlam phawkhuai hi.

Ei lawmtateng gualnop ciamnuihna in midang khat lungtang sungah a na velvel dinga phim tawh i sut na bang thei ahihlam phawkhuai hi.

Ei gualnopna, ei kimawlna, ei ciamnuihna in midang khat ii nuntakna bup siatna sungah tungsak thei ahihlam phawk huai hi.

I ciamnuihna, i gualnopna, i kimawlna in midangte adingin natna na hithei ahih manin i kampauna, i gamtatna, i kalsuanna ah kidawm takin i om ding kisam hi.

Mite ading phattuamna i bawl zo kei zongin mite natna ding a piangsak ihihloh nadingin kidawm in gamta ni…

Deihsakna tawh

Dong Mung
July 14, 2018