Pentecost leh Babel Tausang Ki Keelki (5) ~ Rev. Fr. Damian Dal

Pentecost leh Babel Tausang Ki Keelki (5) ~ Rev. Fr. Damian Dal

Babel tausang akilam lai in, Pasian akumsuk ciang, tua Babel tausanglah kisia in, alammi khempeuh te zong leitungah kithehthang hi. Lasiangtho sungah “Kumsuk in amaute khatlekhat a thugen uh a kitheihloh nadinguh khat ii gen khat in angaihnop loh nadingun a kampau uh va kitukalhsak in,” aci hi (Piancil 11:7). Ei Zolai Laisiangtho sungah “Khat ii gen khat in angaihnoploh nadingun – so that they may not listen to each other” cihpen nakiletkhia khalo hi (King James Version [KJV] pan in naletkhia hikha dinghi). Babel tausang lamlai in, Pasian kumsuk na thu in, amaute kithehthang nading leh, amau te leitungah amaimang nading thu ahihi. Ahizongin Pentecost ni in, Khasiangtho Pasian hong kumsukna thu in, Babel ah Pasian kumsukna thutawh ki keelki hi.

Pentecost ni in, Khasiangtho Pasian kumsuk in, paukitukalh minam tampi te khat le khat kitelsak in, khat le khat thugen akingai nuamlo mite pen, Peter thugen ngaihnopna lungsim, zaknopna lungsim leh, ngaihtheih teltheih nading lungsimte naguansuk hi. Sawltak Laisiangtho sungah:

Tua ciangin sawltak sawmlekhatte tawh a omkhawm Peter hong dingto-in, mihonte tungah nakpitakin thu hong genhi”Hih huging a zak uh ciangin mihon tampi tak hong kikhawm uha, hih Jesu a um mite’ thugen pen amau’ pau ciatin za uh ahih manin lamdang asa mahmah uhhi. Pasian’ sep nalamdang liante a kigenna eimapau ciatin iza hi,” aci uhhi. Amaute in lamdangsa-in lungmang mahmah uha, “Abangci thu ahihiam?” ci-in khat le khat akidong uhhi (Sawltak 2:6,11,12). “Tua ciangin sawltak sawmlekhatte tawh a omkhawm Peter hong dingto-in, mihonte tungah nakpitakin thu hong genhi” (Sawltak 2:14) ci in, na kigelh hi.

Babel tausang akilam lai in, Pasian kumsukna athu in amau te leh Babel tausangpi kisiatna leh maimang na thu himahtase leh, Pentecost pawi ni in, Pasian Khasiangtho hong kumsukna in, Pasian minamthak ahi, Jesu Topa sungah upna anei mikhempeuh te adingin, kipumkhatna athak, nuntakna athak, nuntak zia athak leh khat le khat kingaihsiam na, kitelsiamna lampi thak ah hong tunpihkik hi. Lamkhatpan in genleng, Pentecost nipan kipan in, Jesu Topa a ummi te in, Khasiangtho Pasian makaihna tawh, kipumkhat upna sungah kipumkhat in, Babel tausang bangin mihingte pilna siamna leh, sing le suang tawh kilam innpi leh tausang hi loin, upna tawh akilam Pasian tawh kizopna tausang penpen ahi, thu ummi te kipumkhatna, Khasiangtho Pasian teenna innpi alamdingte ihihi.

Laisiangtho sungah, Paul in Jesu Topa um in, ama thugenna azui mite tungah hibangin nagenhi: “Note pumpi mahmah Khasiantho teenna biakinn ahihi” (1Cor 3:19). Tua thu hangin, thu ummi te kipawlna in, Khasiangtho teenna, Pasian biakinnpi ahihi (1Cor 3:16).

Hihthu hang mahin, Khasiangtho asang mimal khatciat in, Khasiangtho teenna inn hi a, tua Khasiangtho teenna innteng kigawmin pumkhat suak a, tua akigawm pumkhat asuak minam in, Pasian minam, Pasian teenna biakinnpi suak in, Pasian tawh akizom taktak sing, suang, sik te tawh kilam hi lo, Pasian Khasiangtho tawh akilam upna tausang ahi, Pasian tawh kizopna, Jacob in Bethel ah amuhkholhsa Vantung tawh kizopna Kahlei pi (Piancil 28:10–17) tawh Pasian sungah guikhat, nakkhat, bukhat, phukkhat in akilamding te ihihi. Pentecost pawi ni a hong kumsuk Khasiangtho in, Jesu Topa a ummi khempeuh te, Jesu Topa sungah, tua Topa min hangin, tua Topa tawh, tua Topa adingin teltuam minamkhat, guikhat, phungkhat, pumkhat hong suahkik ahihi (1Peter 2:9).

Tua ahihman in, Pentecost ni–in Pasian ading leh Pasian sungah mite kikaihkhoh kikna, Pasian minam kipat kikna, Pasian tawh kizopkikna, a Tapa Jesu Topa hangin, pau kibanglo, awsuah kibanglo, thu kumkhawm theilo, thugenkhawm theilo, thuvai hawmkhawm theilo, munkhat ah atengkhawm theilo, gamkhat kuamkhat a atangkhawm theilo, nakkhat pan tui adawnkhawm theilo, mihingte kiphatsakna hangtawh aki keelki, akikhen thang mite, pumkhat a nuntakkik nading kipatna ni ahihi. Rev. Fr Damian Dal